ନୂଆଦିଲ୍ଲୀ: କମ୍ପାନୀ ଓ କର୍ପୋରେଟ୍ ସଂସ୍ଥାଗୁଡ଼ିକର ଗୁରୁତ୍ୱପୂର୍ଣ୍ଣ ଡାଟା ପାଇଁ ନୂଆ ସାଇବର ସୁରକ୍ଷା ଚିନ୍ତା ସୃଷ୍ଟି କରିଛି AI ଏଜେଣ୍ଟ। ଏହି ଏଜେଣ୍ଟଗୁଡ଼ିକ ଅଜାଣତରେ କିମ୍ବା ଯଥେଷ୍ଟ ନିରୀକ୍ଷଣ ବିନା କର୍ପୋରେଟ୍ ଡାଟା ଆକ୍ସେସ୍ କରିପାରନ୍ତି ବୋଲି ଭାରତୀୟ କମ୍ପ୍ୟୁଟର ଇମର୍ଜେନ୍ସି ରେସପନ୍ସ ଟିମ୍ CERT-In ସତର୍କ କରିଛି।

AI ଏଜେଣ୍ଟର ବ୍ୟବହାର ବଢ଼ିବା ସହିତ କମ୍ପାନୀର ଆଭ୍ୟନ୍ତରୀଣ ସିଷ୍ଟମ୍, ଫାଇଲ୍ ଓ ଅନ୍ୟାନ୍ୟ ଡିଜିଟାଲ୍ ସମ୍ପଦ ସହ ଏହାର ସଂଯୋଗ ମଧ୍ୟ ବଢ଼ୁଛି। ଏପରି ସ୍ଥିତିରେ ଯଦି ଆକ୍ସେସ୍ କଣ୍ଟ୍ରୋଲ୍ କିମ୍ବା ସୁରକ୍ଷା ବ୍ୟବସ୍ଥା ଦୁର୍ବଳ ରହେ, ତେବେ ସେନ୍ସିଟିଭ୍ କର୍ପୋରେଟ୍ ତଥ୍ୟ ଅନଧିକୃତ ଭାବେ ଆକ୍ସେସ୍ ହେବାର ଆଶଙ୍କା ରହିଛି।

CERT-Inର ସତର୍କତାରେ ଏକ୍ସପୋଜ୍ଡ କ୍ରେଡେନ୍ସିଆଲ୍ ଏବଂ ଠିକ୍ ଭାବେ ସୁରକ୍ଷିତ ନଥିବା ସିଷ୍ଟମ୍‌କୁ ମଧ୍ୟ ବିପଦର ମୁଖ୍ୟ କାରଣ ଭାବେ ଚିହ୍ନଟ କରାଯାଇଛି। କୌଣସି AI ଏଜେଣ୍ଟକୁ ଅଧିକ ଅନୁମତି ଦିଆଗଲେ, ତାହାର ମାଧ୍ୟମରେ ଆକ୍ସେସ୍ ହେଉଥିବା ଡାଟା ମଧ୍ୟ ବିପଦରେ ପଡ଼ିପାରେ।

ବିଶେଷକରି କମ୍ପାନୀଗୁଡ଼ିକ AI ଏଜେଣ୍ଟକୁ ଇମେଲ୍, କ୍ଲାଉଡ୍ ଷ୍ଟୋରେଜ୍, ଡାଟାବେସ୍ କିମ୍ବା ଅନ୍ୟାନ୍ୟ କର୍ପୋରେଟ୍ ସିଷ୍ଟମ୍ ସହ ଯୋଡ଼ିବା ସମୟରେ ଆକ୍ସେସ୍ ପରମିଶନ୍ ଓ ସୁରକ୍ଷା ବ୍ୟବସ୍ଥାକୁ ଗୁରୁତ୍ୱ ଦେବା ଆବଶ୍ୟକ।

AI ଏଜେଣ୍ଟର ସ୍ୱୟଂଚାଳିତ କାର୍ଯ୍ୟକ୍ଷମତା ଯେତେ ବଢ଼ୁଛି, ସେତେ ଅଧିକ ମାତ୍ରାରେ ଆକ୍ସେସ୍ ମନିଟରିଂ, କ୍ରେଡେନ୍ସିଆଲ୍ ସୁରକ୍ଷା ଏବଂ ଯଥାସମ୍ଭବ ସୀମିତ ଅନୁମତି ଦେବା ଆବଶ୍ୟକ ହେଉଛି। କର୍ପୋରେଟ୍ ଡାଟାକୁ AI ଆଧାରିତ ଟୁଲ୍ ସହ ଯୋଡ଼ିବା ପୂର୍ବରୁ ସୁରକ୍ଷା ବିପଦର ମୂଲ୍ୟାଙ୍କନ କରିବାକୁ ଏହି ସତର୍କତା ଗୁରୁତ୍ୱ ଦେଉଛି।