ଭାରତୀୟ କ୍ରିକେଟ୍ର ତାରକା ବିରାଟ କୋହଲି ପୁଣି ଥରେ ଦିଲ୍ଲୀ ପାଇଁ ଘରୋଇ କ୍ରିକେଟ୍ ଖେଳିବେ। ଦିଲ୍ଲୀ ଆଣ୍ଡ ଡିଷ୍ଟ୍ରିକ୍ଟ କ୍ରିକେଟ୍ ଆସୋସିଏସନ୍ (DDCA) ସଭାପତି ରୋହନ ଜେଟଲୀ ସ୍ପଷ୍ଟ କରିଛନ୍ତି ଯେ, ଅନ୍ତର୍ଜାତୀୟ ପ୍ରତିବଦ୍ଧତା ଓ ୱର୍କଲୋଡ୍ ମ୍ୟାନେଜମେଣ୍ଟ ଅନୁମତି ଦେଲେ କୋହଲି ଦିଲ୍ଲୀ ପାଇଁ ନିଶ୍ଚିତ ଭାବେ ଖେଳିବେ।

କୋହଲି ବର୍ତ୍ତମାନ କେବଳ ଭାରତ ପାଇଁ ODI କ୍ରିକେଟ୍ ଖେଳୁଛନ୍ତି। ସେପ୍ଟେମ୍ବର ୨୭ରୁ ୱେଷ୍ଟଇଣ୍ଡିଜ୍ ବିପକ୍ଷରେ ଭାରତର ୩ ମ୍ୟାଚ୍ର ODI ସିରିଜ୍ ଆରମ୍ଭ ହେବ। ଏହାପରେ ନଭେମ୍ବରରେ ଭାରତ ନ୍ୟୁଜିଲାଣ୍ଡ ବିପକ୍ଷରେ ୫ଟି ODI ଖେଳିବ। ଡିସେମ୍ବରରେ ଶ୍ରୀଲଙ୍କା ବିପକ୍ଷରେ ଭାରତ ୩ଟି ODI ଖେଳିବାକୁ ଥିବାରୁ କୋହଲିଙ୍କ ଘରୋଇ କ୍ରିକେଟ୍ ଉପଲବ୍ଧତା ଗୁରୁତ୍ୱପୂର୍ଣ୍ଣ ହେବ।

୨୦୨୫ରେ ୧୩ ବର୍ଷ ପରେ କୋହଲି ପ୍ରଥମ ଥର ପାଇଁ ଦିଲ୍ଲୀ ପାଇଁ ରଣଜୀ ଟ୍ରଫି ଖେଳିଥିଲେ। ଏହାର କିଛି ମାସ ପରେ ସେ ଟେଷ୍ଟ କ୍ରିକେଟ୍ରୁ ଅବସର ଘୋଷଣା କରିଥିଲେ। ସେହି ବର୍ଷ ପରେ ସେ ବିଜୟ ହଜାରେ ଟ୍ରଫିରେ ମଧ୍ୟ ଦିଲ୍ଲୀ ପାଇଁ ଦୁଇଟି ମ୍ୟାଚ୍ ଖେଳିଥିଲେ।

DDCAର ବାର୍ଷିକ ପୁରସ୍କାର ବିତରଣୀ ସମାରୋହ ଅବସରରେ ରୋହନ ଜେଟଲୀ କୋହଲିଙ୍କ ଘରୋଇ କ୍ରିକେଟ୍କୁ ନେଇ କହିଥିଲେ, “ଏହା ତାଙ୍କର ହୋମ୍ ଆସୋସିଏସନ୍। ଆମେ ତାଙ୍କୁ ଖେଳିବାକୁ ଅନୁମତି ଦେବୁ କି ନାହିଁ, ଏଭଳି ପ୍ରଶ୍ନ ହିଁ ନାହିଁ। ଏହି ରାଜ୍ୟ ଯେତିକି ତାଙ୍କର, ସେତିକି ମୋର।”

ସେ ଆହୁରି କହିଛନ୍ତି ଯେ, ରାଜ୍ୟ ପାଇଁ କୋହଲିଙ୍କ ପ୍ରତିବଦ୍ଧତା ଅତ୍ୟନ୍ତ ଦୃଢ଼। ତେଣୁ ଅନ୍ତର୍ଜାତୀୟ ଦାୟିତ୍ୱ ଓ ୱର୍କଲୋଡ୍ ମ୍ୟାନେଜମେଣ୍ଟକୁ ଧ୍ୟାନରେ ରଖି ସେ ଯେତେବେଳେ ଉପଲବ୍ଧ ହେବେ, ସେତେବେଳେ ପୁଣି ଦିଲ୍ଲୀ ପାଇଁ ଖେଳିବେ।

ଏହି ସମୟରେ DDCA ଦିଲ୍ଲୀର ଗ୍ରାସରୁଟ୍ କ୍ରିକେଟ୍ ଓ ଭିତ୍ତିଭୂମି ବିକାଶ ଉପରେ ମଧ୍ୟ ଗୁରୁତ୍ୱ ଦେଉଛି। ସଂଘ ପକ୍ଷରୁ BCCI ସହ ଆଲୋଚନା କରି ଏକ ୱର୍ଲ୍ଡ-କ୍ଲାସ୍ ଷ୍ଟାଡିୟମ୍ ପାଇଁ ଜମି ଚିହ୍ନଟ କରାଯାଉଥିବା ରୋହନ ଜେଟଲୀ କହିଛନ୍ତି।

୨୦୨୫-୨୬ ସିଜନ୍ ପାଇଁ DDCA କ୍ଲବ୍ କ୍ରିକେଟରମାନଙ୍କ ପୁରସ୍କାର ରାଶିରେ ୧୦ ପ୍ରତିଶତ ବୃଦ୍ଧି କରି ମୋଟ ୧.୪୩ କୋଟି ଟଙ୍କା ପ୍ରଦାନ କରିଛି। ଦିଲ୍ଲୀ କ୍ରିକେଟ୍କୁ ପୁଣି ଘରୋଇ କ୍ରିକେଟ୍ର ଶୀର୍ଷସ୍ତରକୁ ନେବା DDCAର ଲକ୍ଷ୍ୟ ବୋଲି ଜେଟଲୀ କହିଛନ୍ତି।