ଭାରତୀୟ କ୍ରିକେଟ୍‌ର ଷ୍ଟାର୍‌ ବିରାଟ କୋହଲି ଏବେ ବଲିଉଡ୍‌ରେ ପାଦ ଥାପିବେ କି? ଏହି ପ୍ରଶ୍ନକୁ ନେଇ ଚର୍ଚ୍ଚା ଜୋର ଧରିଛି। ଏହାର କାରଣ ହେଉଛି ପୂର୍ବତନ ଭାରତୀୟ କ୍ରିକେଟର୍‌ ରାହୁଲ ଦ୍ରାବିଡଙ୍କ ଏକ ମଜାଦାର ଟିପ୍ପଣୀ।

BBC Asian Network ସହ ଏକ ଆଲୋଚନା ସମୟରେ ଦ୍ରାବିଡଙ୍କୁ ପଚରାଯାଇଥିଲା ଯେ ତାଙ୍କ ପୂର୍ବତନ ସାଥୀ କ୍ରିକେଟର୍‌ମାନଙ୍କ ମଧ୍ୟରୁ କିଏ ଜଣେ ଭଲ ବଲିଉଡ୍‌ ଅଭିନେତା ହୋଇପାରିବେ। କିଛି ସମୟ ଭାବିବା ପରେ ସେ ବିରାଟ କୋହଲିଙ୍କ ନାମ ନେଇଥିଲେ। 

ଦ୍ରାବିଡଙ୍କ କହିବା ଅନୁଯାୟୀ, ଭାରତୀୟ ଦଳରେ ବିରାଟ ଯେତେବେଳେ ନୂଆ ଖେଳାଳି ଥିଲେ, ସେତେବେଳେ ସେ ଅନ୍ୟମାନଙ୍କର ମିମିକ୍ରି ବହୁତ ଭଲ କରୁଥିଲେ। ଏହି ଦକ୍ଷତା ତାଙ୍କ ମଧ୍ୟରେ ଆଜି ମଧ୍ୟ ରହିଥିବା ଦ୍ରାବିଡ କହିଛନ୍ତି। ଏହା ସହିତ ବିରାଟ ବର୍ଷ ବର୍ଷ ଧରି ଅନେକ ବିଜ୍ଞାପନରେ କାମ କରିଥିବାରୁ କ୍ୟାମେରା ସାମ୍ନାରେ ସେ ଅଭ୍ୟସ୍ତ ବୋଲି ଦ୍ରାବିଡ ମତ ଦେଇଛନ୍ତି। 

ଏହି ଆଲୋଚନାରେ ବିରାଟଙ୍କ ପତ୍ନୀ ତଥା ଅଭିନେତ୍ରୀ ଅନୁଷ୍କା ଶର୍ମାଙ୍କ ନାମ ମଧ୍ୟ ଉଠିଥିଲା। ବିରାଟ ଓ ଅନୁଷ୍କା ପ୍ରଥମେ ଏକ ବିଜ୍ଞାପନର ଶୁଟିଂ ସମୟରେ ପରସ୍ପରଙ୍କୁ ଭେଟିଥିଲେ। ଦ୍ରାବିଡ ମଜାକିଆ ଭାବରେ କହିଥିଲେ ଯେ ବିରାଟ କେବେ ଅଭିନୟକୁ ଆସିଲେ ଅନୁଷ୍କା ତାଙ୍କୁ କିଛି ଅଭିନୟ ଟିପ୍ସ ଦେଇପାରନ୍ତି। 

ତେବେ ବିରାଟ କୋହଲି ବର୍ତ୍ତମାନ ପର୍ଯ୍ୟନ୍ତ କୌଣସି ବଲିଉଡ୍‌ ଫିଲ୍ମରେ ଅଭିନୟ କରିନାହାନ୍ତି। ତାଙ୍କ ବଲିଉଡ୍‌ ଡେବ୍ୟୁ ନେଇ ମଧ୍ୟ କୌଣସି ଅଧିକାରିକ ଘୋଷଣା ହୋଇନାହିଁ। ତେଣୁ ଏବେ ଚାଲିଥିବା ଚର୍ଚ୍ଚାକୁ କେବଳ ଦ୍ରାବିଡଙ୍କ ମତାମତ ଏବଂ ସମ୍ଭାବନା ଭାବେ ଦେଖିବା ଉଚିତ। 

ଅନ୍ୟପକ୍ଷରେ, ବିରାଟ ଓ ଅନୁଷ୍କାଙ୍କୁ ନେଇ ‘ହନୁମାନ ଅଂଶ’ର ପରବର୍ତ୍ତୀ ଭାଗରେ କ୍ୟାମିଓ ଭୂମିକା ନେଇ ମଧ୍ୟ ପୂର୍ବରୁ ଚର୍ଚ୍ଚା ହୋଇଛି। ତେବେ ନିର୍ମାତାଙ୍କ ପକ୍ଷରୁ ବିରାଟଙ୍କ ଭୂମିକା ସମ୍ପର୍କରେ ଏପର୍ଯ୍ୟନ୍ତ କୌଣସି ନିଶ୍ଚିତ କାଷ୍ଟିଂ ଘୋଷଣା ହୋଇନାହିଁ।