ଭୁବନେଶ୍ୱର: ଭିଜିଲାନ୍ସ ଜାଲରେ ପଡ଼ିଛନ୍ତି କଟକ ଜଗତପୁର ମହାନଦୀ ଉତ୍ତର ଡିଭିଜନର ଅଧୀକ୍ଷଣ ଯନ୍ତ୍ରୀ ପ୍ରସନ୍ନଜିତ୍ ଦାସ। ବିଭିନ୍ନ କଣ୍ଟ୍ରାକ୍ଟରଙ୍କଠାରୁ ଲାଞ୍ଚ ଆଦାୟ ଅଭିଯୋଗରେ ଓଡ଼ିଶା ଭିଜିଲାନ୍ସ ତାଙ୍କୁ ଭୁବନେଶ୍ୱର ଏଜି ଛକ ନିକଟରୁ ଅଟକ କରିଥିଲା। ତାଙ୍କ ସରକାରୀ ବୋଲେରୋ ଗାଡ଼ି ସହ ତାଙ୍କୁ କାବୁ କରାଯାଇଥିଲା।

ପ୍ରାଥମିକ ତଲାସି ସମୟରେ ତାଙ୍କ ନିକଟରୁ ୭ ଲକ୍ଷ ୨୮ ହଜାର ୬୨୦ ଟଙ୍କାର ସନ୍ଦେହଜନକ ନଗଦ ଅର୍ଥ ଜବତ ହୋଇଥିଲା। ଏହାପରେ ଶନିବାର ସକାଳେ ଭୁବନେଶ୍ୱର ଘାଟିକିଆସ୍ଥିତ ଟ୍ରାଇଡେଣ୍ଟ ଗାଲାକ୍ସିରେ ଥିବା ତାଙ୍କ ଭଡ଼ା ଫ୍ଲାଟ ଏବଂ ବଡ଼ଗଡ଼ସ୍ଥିତ ପୈତୃକ ଘରେ ଏକକାଳୀନ ଚଢ଼ାଉ କରାଯାଇଥିଲା।

ଚଢ଼ାଉ ସମୟରେ ଭଡ଼ା ଫ୍ଲାଟରୁ ଆଉ ୧୪ ଲକ୍ଷ ୬୦ ହଜାର ଟଙ୍କା ନଗଦ ମିଳିଥିଲା। ଫଳରେ ଭିଜିଲାନ୍ସ ଏପର୍ଯ୍ୟନ୍ତ ମୋଟ ୨୧ ଲକ୍ଷ ୮୮ ହଜାର ୬୨୦ ଟଙ୍କା ଜବତ କରିଛି।

ଜବତ ହୋଇଥିବା ଏହି ବିପୁଳ ନଗଦ ଟଙ୍କାର ସନ୍ତୋଷଜନକ ହିସାବ ଦେଇପାରିନଥିବାରୁ ପ୍ରସନ୍ନଜିତ୍ ଦାସଙ୍କୁ ଅଧିକ ପଚରାଉଚରା କରାଯାଉଛି।

ଏହି ଘଟଣାରେ ଭୁବନେଶ୍ୱର ଭିଜିଲାନ୍ସ ଥାନାରେ ଦୁର୍ନୀତି ନିବାରଣ ଆଇନ ଅନୁଯାୟୀ ମାମଲା ରୁଜୁ ହୋଇଛି। ଘଟଣାର ତଦନ୍ତ ଜାରି ରହିଛି।

ଭିଜିଲାନ୍ସ ପକ୍ଷରୁ ଜବତ ହୋଇଥିବା ଟଙ୍କାର ଉତ୍ସ, ଲାଞ୍ଚ କାରବାର ସହ ଏହାର ସମ୍ପର୍କ ଏବଂ ଅନ୍ୟାନ୍ୟ ସମ୍ପତ୍ତି ସମ୍ପର୍କରେ ମଧ୍ୟ ତଦନ୍ତ କରାଯାଉଛି। 🔎