ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ଆହୁରି ଗମ୍ଭୀର ହୋଇପଡ଼ିଛି। ଆମେରିକା ଲଗାତାର ନବମ ରାତିରେ ଇରାନ ବିରୋଧରେ ସାମରିକ ଆକ୍ରମଣ ଜାରି ରଖିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଇରାନୀ ଆକ୍ରମଣରେ ମୃତ ଆମେରିକୀୟ ସୈନିକଙ୍କ ସ୍ମୃତି ଓ ସମ୍ମାନରେ ଏହି ସାମରିକ ଅଭିଯାନ ଚାଲିଛି।

ଅନ୍ୟପକ୍ଷରେ, ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସମୁଦ୍ର ବାଣିଜ୍ୟ ପଥ ମଧ୍ୟରୁ ଗୋଟିଏ ହର୍ମୁଜ୍ ପ୍ରଣାଳୀରେ ପରିସ୍ଥିତି ଆହୁରି ଅସ୍ଥିର ହୋଇଛି। ୟୁକେ ମେରିଟାଇମ୍ ଟ୍ରେଡ୍ ଅପରେସନ୍ସ ଏଜେନ୍ସି ସୂଚନା ଦେଇଛି ଯେ, ଓମାନର କୁମଜାର ଉପକୂଳ ନିକଟରେ ଏକ ତେଲ ଟ୍ୟାଙ୍କର୍ ଉପରେ ଆକ୍ରମଣ ପରେ ବିସ୍ଫୋରଣ ଘଟି ନିଆଁ ଲାଗିଥିଲା।

ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (ଆଇଆରଜିସି) ଦାବି କରିଛି ଯେ, ଦକ୍ଷିଣ ହର୍ମୁଜ୍ ପ୍ରଣାଳୀରେ ସମୁଦ୍ର ମାଇନ୍ ବିସ୍ଫୋରଣ ଯୋଗୁଁ ଦୁଇଟି ତେଲ ଟ୍ୟାଙ୍କର୍ କ୍ଷତିଗ୍ରସ୍ତ ହୋଇଛି। ଆଇଆରଜିସିର କହିବା ଅନୁଯାୟୀ, ଯେପର୍ଯ୍ୟନ୍ତ ଏହି ଅଞ୍ଚଳରେ ଆମେରିକାର ସାମରିକ ଅଭିଯାନ ଜାରି ରହିବ, ସେପର୍ଯ୍ୟନ୍ତ ହର୍ମୁଜ୍ ପ୍ରଣାଳୀ ସୁରକ୍ଷିତ ରହିବ ନାହିଁ ଏବଂ ତେଲ, ଗ୍ୟାସ୍ ଓ ପେଟ୍ରୋକେମିକାଲ୍ ପରିବହନକୁ ବାଧା ଦିଆଯିବ।

ବିଶ୍ୱକପ୍ ଫାଇନାଲ୍ ପରେ ୱାଶିଂଟନ୍ ଫେରୁଥିବା ସମୟରେ ସାମ୍ବାଦିକଙ୍କ ସହ କଥାବାର୍ତ୍ତାରେ ରାଷ୍ଟ୍ରପତି ଟ୍ରମ୍ପ କହିଥିଲେ, ଆମେରିକୀୟ ସେନା ଇରାନ ବିରୋଧରେ ପୁଣି ଥରେ ଜୋରଦାର ଆକ୍ରମଣ କରିଛି। ଆମେରିକାର କେନ୍ଦ୍ରୀୟ କମାଣ୍ଡ (CENTCOM) ମଧ୍ୟ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ପୋଷ୍ଟ କରି କହିଛି ଯେ, ଇରାନର ସାମରିକ କ୍ଷମତାକୁ ଦୁର୍ବଳ କରିବା ଉଦ୍ଦେଶ୍ୟରେ ଏହି ଅଭିଯାନ ଚାଲିଛି।

ଏପଟେ ଆମେରିକାର ଆକ୍ରମଣର କଡ଼ା ଜବାବ ଦେଇଛି ଇରାନ। କୁଏତ ସରକାର କହିଛନ୍ତି ଯେ, ଇରାନୀ ଡ୍ରୋନ୍ ଆକ୍ରମଣକୁ ପ୍ରତିହତ କରିବା ପାଇଁ ପ୍ରୟାସ ଜାରି ରହିଛି। ସେହିପରି ଇରାନର ରିଭୋଲ୍ୟୁସନାରୀ ଗାର୍ଡ ସିରିଆରେ ଥିବା ଏକ 'ଶତ୍ରୁ କମାଣ୍ଡ ସେଣ୍ଟର' ଉପରେ ଆକ୍ରମଣ କରିଥିବା ଦାବି କରିଛି।

ବାହାରିନର ଗୃହ ମନ୍ତ୍ରଣାଳୟ ମଧ୍ୟ ଇରାନୀ ବିମାନ ଆକ୍ରମଣର ଆଶଙ୍କାରେ ସତର୍କତା ସାଇରନ୍ ଜାରି କରି ନାଗରିକଙ୍କୁ ସୁରକ୍ଷିତ ସ୍ଥାନକୁ ଯିବାକୁ ପରାମର୍ଶ ଦେଇଛି। ଅନ୍ୟପକ୍ଷରେ ଇରାନ ଦାବି କରିଛି ଯେ, କୁଏତରେ ଥିବା ଦୁଇଟି ଆମେରିକୀୟ ସାମରିକ ଘାଟିକୁ ଟାର୍ଗେଟ କରାଯାଇଛି।

ମଧ୍ୟପ୍ରାଚ୍ୟରେ ଚାଲିଥିବା ଏହି ସଂଘର୍ଷ ହର୍ମୁଜ୍ ପ୍ରଣାଳୀ ଦେଇ ହେଉଥିବା ବିଶ୍ୱ ତେଲ ଓ ଗ୍ୟାସ୍ ପରିବହନ ଉପରେ ବଡ଼ ପ୍ରଭାବ ପକାଇପାରେ ବୋଲି ଆନ୍ତର୍ଜାତିକ ମହଳରେ ଚିନ୍ତା ବଢ଼ିଛି।