ଆମେରିକା ଓ ଇରାନ ମଧ୍ୟରେ ଶାନ୍ତି ଚୁକ୍ତିକୁ ନେଇ ପୁଣି ଥରେ ଅନିଶ୍ଚିତତା ଓ ଦ୍ୱନ୍ଦ୍ୱ ଦେଖାଦେଇଛି। ଏକପଟେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଚୁକ୍ତିର ଖସଡ଼ା ପ୍ରସ୍ତାବକୁ ସ୍ୱୀକୃତି ଦେଇଥିବା ଦାବି କରିଥିବାବେଳେ ଅନ୍ୟପଟେ ଇରାନ ଏହି ଦାବିକୁ ଖଣ୍ଡନ କରିଛି।

ଗୁରୁବାର ହ୍ୱାଇଟ୍ ହାଉସର ଓଭାଲ ଅଫିସରେ ସାମ୍ବାଦିକମାନଙ୍କ ସହ ଆଲୋଚନା ବେଳେ ଟ୍ରମ୍ପ କହିଥିଲେ ଯେ, ଇରାନର ସର୍ବୋଚ୍ଚ ନେତୃତ୍ୱ ପକ୍ଷରୁ ଏକ ଖସଡ଼ା ଶାନ୍ତି ଚୁକ୍ତିକୁ ମଞ୍ଜୁର କରାଯାଇଛି। ଏହି ପ୍ରସ୍ତାବ ଅନୁଯାୟୀ ଇରାନ ଯୁଦ୍ଧବିରତି ବୃଦ୍ଧି କରିବା, ହର୍ମୁଜ୍ ପ୍ରଣାଳୀକୁ ପୁନଃ ଖୋଲିବା ଏବଂ ନିଜର ପରମାଣୁ କାର୍ଯ୍ୟକ୍ରମ ଉପରେ ୬୦ ଦିନିଆ ଆଲୋଚନା ଆରମ୍ଭ କରିବାକୁ ରାଜି ହୋଇଛି।

ଟ୍ରମ୍ପ ଆହୁରି ଦାବି କରିଥିଲେ ଯେ, ନୂତନ ଚୁକ୍ତି ଅନୁସାରେ ଇରାନ କେବେ ମଧ୍ୟ ପରମାଣୁ ଅସ୍ତ୍ର ରଖିବ ନାହିଁ ବୋଲି ସହମତ ହୋଇଛି। ସେ କହିଥିଲେ ଯେ, ଚୁକ୍ତି ସମ୍ପର୍କିତ ମୁଖ୍ୟ ବିଷୟଗୁଡ଼ିକୁ ଆମେରିକା, ଇସ୍ରାଏଲ, ସାଉଦି ଆରବ, ୟୁଏଇ, କତାର, ତୁର୍କୀ, ପାକିସ୍ତାନ, ବାହାରିନ, କୁଏତ, ଜୋର୍ଡାନ ଓ ଇଜିପ୍ଟ ସମେତ ବିଭିନ୍ନ ଦେଶ ଅନୁମୋଦନ କରିଛନ୍ତି।

ସେ ସାମାଜିକ ଗଣମାଧ୍ୟମ ‘ଟ୍ରୁଥ୍ ସୋସିଆଲ’ରେ ମଧ୍ୟ ଏହି ସମ୍ପର୍କରେ ପୋଷ୍ଟ କରିଥିଲେ। ଟ୍ରମ୍ପଙ୍କ କହିବା ଅନୁସାରେ, ଚୁକ୍ତି ଚୂଡ଼ାନ୍ତ ନହେବା ପର୍ଯ୍ୟନ୍ତ ଆମେରିକା ହର୍ମୁଜ୍ ପ୍ରଣାଳୀ ଉପରେ ନିୟନ୍ତ୍ରଣ ଜାରି ରଖିବ।

ତେବେ ଇରାନର ଅର୍ଦ୍ଧ-ସରକାରୀ ସମ୍ବାଦ ସଂସ୍ଥା ଫାର୍ସ ନ୍ୟୁଜ୍ ଏଜେନ୍ସି ଟ୍ରମ୍ପଙ୍କ ଦାବିକୁ ଖଣ୍ଡନ କରିଛି। ସଂସ୍ଥାର ରିପୋର୍ଟ ଅନୁସାରେ, ଆମେରିକା ସହିତ କୌଣସି ପ୍ରାରମ୍ଭିକ ବୁଝାମଣାପତ୍ର କିମ୍ବା ଚୁକ୍ତିକୁ ଏପର୍ଯ୍ୟନ୍ତ ଅନୁମୋଦନ କରାଯାଇନାହିଁ।

ଇରାନର ତସନିମ୍ ନ୍ୟୁଜ୍ ଏଜେନ୍ସି ମଧ୍ୟ ଟ୍ରମ୍ପଙ୍କ ଘୋଷଣାକୁ ଅବିଶ୍ୱସନୀୟ ବୋଲି କହିଛି। ସଂସ୍ଥାର ମତାନୁସାରେ, ଟ୍ରମ୍ପ ପୂର୍ବରୁ ମଧ୍ୟ ଏଭଳି ଦାବି କରିଥିଲେ କିନ୍ତୁ ସେଥିରୁ କୌଣସି ଠୋସ ପରିଣାମ ବାହାରି ନଥିଲା।

ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଇସମାଇଲ ବଘାଇ କହିଛନ୍ତି ଯେ, ଚୁକ୍ତିର ଅନେକ ସର୍ତ୍ତ ଉପରେ ଆଲୋଚନା ହୋଇଥିଲେ ମଧ୍ୟ କୌଣସି ଚୂଡ଼ାନ୍ତ ସମଝୌତା ହୋଇନାହିଁ। ସେ ଆହୁରି କହିଛନ୍ତି ଯେ, ଆମେରିକା ବାରମ୍ବାର ନିଜ ସ୍ଥିତି ବଦଳାଉଥିବାରୁ ଆଲୋଚନା ପ୍ରକ୍ରିୟା ଜଟିଳ ହୋଇପଡ଼ୁଛି।

ଇରାନ ସ୍ପଷ୍ଟ କରିଛି ଯେ, ଦେଶର ସାର୍ବଭୌମତ୍ୱ ଓ ଜାତୀୟ ସ୍ୱାର୍ଥ ବିରୋଧୀ କୌଣସି ସର୍ତ୍ତ ତା' ଉପରେ ଥୋପାଗଲେ ତାହାକୁ ଗ୍ରହଣ କରାଯିବ ନାହିଁ। ଏହା ସହିତ ଆମେରିକା-ଇରାନ ଶାନ୍ତି ଆଲୋଚନାର ଭବିଷ୍ୟତକୁ ନେଇ ଅନିଶ୍ଚିତତା ଜାରି ରହିଛି।