ଆମେରିକା ଓ ଇରାନ ମଧ୍ୟରେ ବଢ଼ୁଥିବା ଭୂ-ରାଜନୈତିକ ଉତ୍ତେଜନା ମଧ୍ୟରେ ଆମେରିକା ବ୍ରାଜିଲ ବିରୋଧରେ ବଡ଼ ବାଣିଜ୍ୟିକ ପଦକ୍ଷେପ ନେଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବ୍ରାଜିଲରୁ ଆମଦାନି ହେଉଥିବା ଅଧିକାଂଶ ସାମଗ୍ରୀ ଉପରେ୨୫ ପ୍ରତିଶତ ଶୁଳ୍କଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି।

ଆମେରିକାର ଅଭିଯୋଗ ଅନୁସାରେ, ବ୍ରାଜିଲ ସରକାର ଦ୍ୱିପାକ୍ଷିକ ବାଣିଜ୍ୟ ଏବଂ କୂଟନୀତିକ ପ୍ରସଙ୍ଗରେ ସଚ୍ଚୋଟ ଭାବେ ସହଯୋଗ କରୁନାହାନ୍ତି। ଆମେରିକାର ବିଦେଶ ମନ୍ତ୍ରୀ ମାର୍କୋ ରୁବିଓ ସୋସିଆଲ ମିଡିଆ ପ୍ଲାଟଫର୍ମ ‘X’ରେ ପୋଷ୍ଟ କରି କହିଛନ୍ତି ଯେ, ରାଷ୍ଟ୍ରପତି ଟ୍ରମ୍ପ ଯୁକ୍ତରାଷ୍ଟ୍ର ବାଣିଜ୍ୟ ପ୍ରତିନିଧିଙ୍କୁ ବ୍ରାଜିଲୀୟ ସାମଗ୍ରୀ ଉପରେ ଶୁଳ୍କ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି।

ଅନ୍ୟପଟେ ବ୍ରାଜିଲ ରାଷ୍ଟ୍ରପତି ଲୁଲା ଡା ସିଲଭା ଏହି ନିଷ୍ପତ୍ତିକୁ କଡ଼ା ଭାବେ ସମାଲୋଚନା କରିଛନ୍ତି। ସେ କହିଛନ୍ତି ଯେ, କୌଣସି ଦେଶ ବିରୋଧରେ ଏଭଳି ଏକପାଖିଆ ପଦକ୍ଷେପ ଗ୍ରହଣ କରିବା ଉଚିତ ନୁହେଁ। ସେ ଦାବି କରିଛନ୍ତି ଯେ, ଗତ ୧୫ ବର୍ଷରେ ଆମେରିକା ବ୍ରାଜିଲ ସହ ବାଣିଜ୍ୟରୁ ବ୍ୟାପକ ଲାଭ ପାଇଛି।

ଲୁଲା କହିଛନ୍ତି ଯେ, ୨୦୨୫ରେ ବ୍ରାଜିଲକୁ ଆସିଥିବା ୭୬ ପ୍ରତିଶତ ଆମେରିକୀୟ ସାମଗ୍ରୀ ଉପରେ କୌଣସି ଶୁଳ୍କ ଲାଗିନଥିଲା ଏବଂ ହାରାହାରି ଶୁଳ୍କ ମାତ୍ର ୩.୧ ପ୍ରତିଶତ ଥିଲା। ତେଣୁ ଆମେରିକାର ଏହି ନିଷ୍ପତ୍ତି ଯୁକ୍ତିସଙ୍ଗତ ନୁହେଁ ବୋଲି ସେ କହିଛନ୍ତି।

ବ୍ରାଜିଲ ସରକାର ଚେତାବନୀ ଦେଇଛନ୍ତି ଯେ, ଯଦି ଆମେରିକା ଏହି ଶୁଳ୍କ ପ୍ରତ୍ୟାହାର ନ କରେ, ତେବେ‘ରେସିପ୍ରୋସିଟି ଲ’ଅନୁସାରେ ପାଲଟା ପଦକ୍ଷେପ ନିଆଯିବ। ଏହାସହ ବ୍ରାଜିଲ ଏହି ବିବାଦକୁ ବିଶ୍ୱ ବାଣିଜ୍ୟ ସଂଗଠନ (WTO) ନିକଟକୁ ନେବାକୁ ମଧ୍ୟ ସଙ୍କେତ ଦେଇଛି।

ଆମେରିକା-ବ୍ରାଜିଲ ମଧ୍ୟରେ ବଢ଼ୁଥିବା ଏହି ବାଣିଜ୍ୟିକ ବିବାଦ ଆଗାମୀ ଦିନରେ ବିଶ୍ୱ ବାଣିଜ୍ୟ ଓ ଆର୍ଥିକ ସମ୍ପର୍କ ଉପରେ ପ୍ରଭାବ ପକାଇପାରେ।