UPI ପେମେଣ୍ଟକୁ ନେଇ ଲକ୍ଷ ଲକ୍ଷ ଲୋକଙ୍କ ମନରେ ଥିବା ଦ୍ୱନ୍ଦ୍ୱ ଦୂର ହୋଇଛି। ₹୨,୦୦୦ ପର୍ଯ୍ୟନ୍ତ UPI ମାଧ୍ୟମରେ କରାଯାଉଥିବା ପେମେଣ୍ଟ ଉପରେ କୌଣସି ଚାର୍ଜ ଲାଗିବ ନାହିଁ। ସେହିପରି ₹୨,୦୦୦ ପର୍ଯ୍ୟନ୍ତ RuPay ଡେବିଟ୍ କାର୍ଡ ପେମେଣ୍ଟ ମଧ୍ୟ ଶୁଳ୍କମୁକ୍ତ ରହିବ।

କେନ୍ଦ୍ର ଅର୍ଥ ମନ୍ତ୍ରାଳୟର ଗଜେଟ୍ ବିଜ୍ଞପ୍ତିରେ RuPay ଡେବିଟ୍ କାର୍ଡ ଏବଂ ₹୨,୦୦୦ ପର୍ଯ୍ୟନ୍ତ UPI ନେଣଦେଣକୁ ଇଲେକ୍ଟ୍ରୋନିକ୍ ପେମେଣ୍ଟ ମାଧ୍ୟମ ଭାବେ ଅଧିସୂଚିତ କରାଯାଇଛି।

ବିଜ୍ଞପ୍ତି ଅନୁସାରେ, ଏହି ମାଧ୍ୟମରେ ପେମେଣ୍ଟ କରୁଥିବା କିମ୍ବା ପେମେଣ୍ଟ ଗ୍ରହଣ କରୁଥିବା ବ୍ୟକ୍ତିଙ୍କଠାରୁ ବ୍ୟାଙ୍କ କିମ୍ବା ପେମେଣ୍ଟ ସିଷ୍ଟମ୍ ଅପରେଟର୍ ସିଧାସଳଖ କିମ୍ବା ପରୋକ୍ଷ ଭାବେ ଶୁଳ୍କ ଆଦାୟ କରିପାରିବେ ନାହିଁ। Payment and Settlement Systems Act, 2007 ଅଧୀନରେ ଥିବା କ୍ଷମତା ବ୍ୟବହାର କରି ସରକାର ଏହି ବ୍ୟବସ୍ଥା କରିଛନ୍ତି।

ସମ୍ପ୍ରତି ପେମେଣ୍ଟ ଆଣ୍ଡ ସେଟଲମେଣ୍ଟ ସିଷ୍ଟମ୍ସ ଆକ୍ଟରେ ପରିବର୍ତ୍ତନ ପରେ UPI ନେଣଦେଣ ଉପରେ ଭବିଷ୍ୟତରେ ଚାର୍ଜ ଲାଗିବ କି ନାହିଁ, ତାକୁ ନେଇ ଆଶଙ୍କା ଦେଖାଦେଇଥିଲା। ଏବେ ସରକାରଙ୍କ ସ୍ପଷ୍ଟୀକରଣ ପରେ ଏହି ଦ୍ୱନ୍ଦ୍ୱ ଦୂର ହୋଇଛି।

ସାଧାରଣ ଲୋକଙ୍କ ମଧ୍ୟରେ ହେଉଥିବା Person-to-Person (P2P) UPI ପେମେଣ୍ଟ ମଧ୍ୟ ମାଗଣା ରହିବ ବୋଲି ସରକାର ପୂର୍ବରୁ ସ୍ପଷ୍ଟ କରିଛନ୍ତି। ଅନ୍ୟପଟେ ବ୍ୟବସାୟୀଙ୍କଠାରୁ ନିଆଯାଉଥିବା Merchant Discount Rate (MDR) ନେଇ ମଧ୍ୟ ସରକାର କହିଛନ୍ତି ଯେ ସବୁ ବ୍ୟବସାୟୀଙ୍କ ଉପରେ ବ୍ୟାପକ ଭାବେ MDR ଲାଗୁ କରାଯିବ ନାହିଁ।

ଭବିଷ୍ୟତରେ ଯଦି କିଛି ବିଶେଷ ଶ୍ରେଣୀର ବ୍ୟବସାୟୀଙ୍କ ନେଣଦେଣ ଉପରେ MDR ଲାଗୁ କରାଯାଏ, ତେବେ ଏହା ନିର୍ଦ୍ଦିଷ୍ଟ ସୀମାଠାରୁ ଅଧିକ ଟଙ୍କାର ପେମେଣ୍ଟ ପାଇଁ ଏବଂ କମ୍ ହାରରେ ଲାଗୁ ହେବ ବୋଲି ସରକାର କହିଛନ୍ତି।