ଆମେରିକାର ରୁଷ ବିରୋଧୀ ପ୍ରତିବନ୍ଧକ ନୀତିରେ ବଡ଼ ପରିବର୍ତ୍ତନ ଆସିଛି। ରୁଷରୁ ତୈଳ ଏବଂ ପ୍ରାକୃତିକ ଗ୍ୟାସ୍ ଆମଦାନି କରୁଥିବା ଭାରତ, ଚୀନ୍ ସମେତ ଅନ୍ୟ ଦେଶଗୁଡ଼ିକ ପାଇଁ ପ୍ରସ୍ତାବିତ ଶୁଳ୍କକୁ ବହୁ ପରିମାଣରେ କମାଇ ଦିଆଯାଇଛି। ପୂର୍ବରୁ ୫୦୦ ପ୍ରତିଶତ ଶୁଳ୍କ ଲାଗୁ କରିବା ପ୍ରସ୍ତାବ ଥିବାବେଳେ, ସଂଶୋଧିତ ବିଲ୍‌ରେ ଏହାକୁ ସର୍ବାଧିକ ୧୦୦ ପ୍ରତିଶତରେ ସୀମିତ କରାଯାଇଛି।

ଏହି ସଂଶୋଧିତ ବିଲ୍‌କୁ ଆମେରିକୀୟ ସିନେଟରେ ଉପସ୍ଥାପନ କରାଯାଇଛି। ଏହା ମାଧ୍ୟମରେ ଭାରତ, ଚୀନ୍ ଏବଂ ରୁଷରୁ ଶକ୍ତି ଆମଦାନି କରୁଥିବା ଅନ୍ୟ ଦେଶମାନଙ୍କ ଉପରେ ପଡ଼ିବାକୁ ଥିବା ଭାରୀ ଶୁଳ୍କର ଆଶଙ୍କା ଅନେକାଂଶରେ ଦୂର ହୋଇଛି।

୫୦୦% ବଦଳରେ ସର୍ବାଧିକ ୧୦୦% ଶୁଳ୍କ

ଏପ୍ରିଲ୍ ୨୦୨୫ରେ ଆସିଥିବା ମୂଳ ପ୍ରସ୍ତାବରେ ରୁଷରୁ ଇନ୍ଧନ କିଣୁଥିବା ଦେଶମାନଙ୍କ ଉପରେ ୫୦୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲଗାଇବାକୁ କୁହାଯାଇଥିଲା। କିନ୍ତୁ ସଂଶୋଧିତ ପ୍ରସ୍ତାବରେ ଏହାକୁ ରୁଷର ଶ୍ରେଷ୍ଠ ପାଞ୍ଚ ଇନ୍ଧନ କ୍ରେତା ଦେଶ ପାଇଁ ସର୍ବାଧିକ ୧୦୦ ପ୍ରତିଶତରେ ସୀମିତ କରାଯାଇଛି।

ଭାରତ ଓ ଚୀନ୍ ସମେତ ଅନେକ ଦେଶକୁ ରାହତ

ସିନେଟ୍ ସହାୟକଙ୍କ ସୂଚନା ଅନୁଯାୟୀ, ରୁଷର ଅଶୋଧିତ ତୈଳର ସର୍ବବୃହତ କ୍ରେତାଙ୍କ ମଧ୍ୟରେ ଚୀନ୍, ଭାରତ, ସ୍ଲୋଭାକିଆ, ହଙ୍ଗେରୀ ଏବଂ ଆଜରବାଇଜାନ ରହିଛନ୍ତି। ସେହିପରି ପ୍ରାକୃତିକ ଗ୍ୟାସ୍ କ୍ରେତାଙ୍କ ମଧ୍ୟରେ ଚୀନ୍, ଫ୍ରାନ୍ସ, ଜାପାନ, ହଙ୍ଗେରୀ ଓ ବେଲଜିୟମ ସାମିଲ ଅଛନ୍ତି।

କିଛି ଦେଶକୁ ମିଳିବ ସ୍ୱତନ୍ତ୍ର ଛାଡ଼

ନୂତନ ବିଲ୍‌ରେ ଏମିତି ବ୍ୟବସ୍ଥା କରାଯାଇଛି ଯେ, ଯେଉଁ ଦେଶ ରୁଷର ମୋଟ ପ୍ରାକୃତିକ ଗ୍ୟାସ୍ ରପ୍ତାନିର ୧୫ ପ୍ରତିଶତରୁ କମ୍ ଆମଦାନି କରନ୍ତି ଏବଂ ରୁଷ ଉପରେ ନିର୍ଭରଶୀଳତା କମାଇବାକୁ ପଦକ୍ଷେପ ନେଉଛନ୍ତି, ସେମାନଙ୍କୁ ସ୍ୱତନ୍ତ୍ର ରିହାତି ଦିଆଯିବ।

ଏହି ବ୍ୟବସ୍ଥା ଫଳରେ ଜାପାନ, ଫ୍ରାନ୍ସ, ହଙ୍ଗେରୀ ଏବଂ ବେଲଜିୟମ ଭଳି ଦେଶଗୁଡ଼ିକୁ ଆମେରିକୀୟ ପ୍ରତିବନ୍ଧକର ପ୍ରଭାବରୁ ବାହାରେ ରଖାଯାଇଛି।

ରୁଷର ଶକ୍ତି କ୍ଷେତ୍ରକୁ ଟାର୍ଗେଟ

ବିଲ୍‌ରେ ରୁଷର 'ଶାଡୋ ଅଏଲ୍ ଟ୍ୟାଙ୍କର' ନେଟୱର୍କ, କେନ୍ଦ୍ରୀୟ ବ୍ୟାଙ୍କ ସମେତ ବଡ଼ ଆର୍ଥିକ ପ୍ରତିଷ୍ଠାନ ଏବଂ ୟାମାଲ LNG ଓ ଆର୍କଟିକ LNG ଭଳି ବୃହତ ଶକ୍ତି ପ୍ରକଳ୍ପ ଉପରେ କଠୋର କଟକଣା ଲାଗୁ କରିବାର ବ୍ୟବସ୍ଥା ରହିଛି।

ଟ୍ରମ୍ପଙ୍କୁ ମିଳିବ ବିଶେଷ ଅଧିକାର

ସଂଶୋଧିତ ବିଲ୍‌ରେ ଆମେରିକାର ରାଷ୍ଟ୍ରପତିଙ୍କୁ ଏପରି ଅଧିକାର ଦିଆଯାଇଛି ଯେ, ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି ସେ ଚାହିଁଲେ କୌଣସି ପ୍ରତିବନ୍ଧକକୁ ସମ୍ପୂର୍ଣ୍ଣ କିମ୍ବା ଆଂଶିକ ଭାବେ ଛାଡ଼ କରିପାରିବେ।