ଆମେରିକା ଏବଂ ଇରାନ ମଧ୍ୟରେ ପ୍ରସ୍ତାବିତ ଦ୍ୱିତୀୟ ପର୍ଯ୍ୟାୟ ଆଲୋଚନା ପାକିସ୍ତାନର ରାଜଧାନୀ ଇସଲାମାବାଦରେ ହେବ କି ନାହିଁ, ସେନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟତା ଆସିନାହିଁ। ଏହି ଅନିଶ୍ଚିତତା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ପରମାଣୁ କାର୍ଯ୍ୟକ୍ରମକୁ ନେଇ ଗଭୀର ଚିନ୍ତା ପ୍ରକାଶ କରିଛନ୍ତି।

ସେ ଅଧରାତିରେ ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ୍ ସୋସିଆଲ’ ରେ ଲେଖିଥିବା ଏକ ପୋଷ୍ଟରେ କହିଛନ୍ତି ଯେ, ଇରାନର ପରମାଣୁ କେନ୍ଦ୍ରଗୁଡ଼ିକ ତଳେ ପ୍ରାୟ ୪୦୦ କିଲୋଗ୍ରାମ ସମୃଦ୍ଧ ୟୁରାନିୟମ ରହିଛି, ଯାହା ବିଶ୍ୱ ସୁରକ୍ଷା ପାଇଁ ଗମ୍ଭୀର ସଙ୍କେତ।

ଟ୍ରମ୍ପଙ୍କ ଅନୁଯାୟୀ, ଗତବର୍ଷ ଆମେରିକୀୟ ସାମରିକ କାର୍ଯ୍ୟାନୁଷ୍ଠାନରେ ଏହି ସଂସ୍ଥାପନାଗୁଡ଼ିକର ଚାରିପାଖରେ ଥିବା ଅଞ୍ଚଳ କ୍ଷତିଗ୍ରସ୍ତ ହୋଇଥିଲା, ଯାହା ଫଳରେ ୟୁରାନିୟମକୁ ସୁରକ୍ଷିତ ଭାବରେ ବାହାର କରିବା ଏକ କଷ୍ଟସାଧ୍ୟ ପ୍ରକ୍ରିୟା ହୋଇପଡ଼ିଛି। ସେ ୟୁରାନିୟମକୁ ‘ପରମାଣୁ ଧୂଳି’ ବୋଲି କହି ଏହାର ବିପଦଜନକ ସ୍ୱଭାବକୁ ଉଲ୍ଲେଖ କରିଛନ୍ତି।

ଅନ୍ୟପକ୍ଷରେ, ଆମେରିକା ଅଭିଯୋଗ କରୁଛି ଯେ ଇରାନ ଏହି ୟୁରାନିୟମକୁ ପରମାଣୁ ଅସ୍ତ୍ର ପାଇଁ ବ୍ୟବହାର କରୁଛି, କିନ୍ତୁ ଇରାନ ସର୍ବଦା ଏହାକୁ ଶାନ୍ତିପୂର୍ଣ୍ଣ ଉଦ୍ଦେଶ୍ୟରେ କରାଯାଉଛି ବୋଲି ଦାବି କରୁଛି।

ଏହି ସମୟରେ ଇସଲାମାବାଦରେ ଆଲୋଚନା ପାଇଁ ଆମେରିକା ପ୍ରସ୍ତୁତ ଥିବାବେଳେ, ଇରାନ ସ୍ପଷ୍ଟ କରିଛି ଯେ ହର୍ମୁଜ୍ ପ୍ରଣାଳୀରେ ଆମେରିକାର ନୌସେନା ଅବରୋଧ ହଟାଯାଇନଥିଲେ ସେମାନେ କୌଣସି ଆଲୋଚନାରେ ଅଂଶ ନେବେ ନାହିଁ।

ବର୍ତ୍ତମାନ ପରିସ୍ଥିତି ଅତ୍ୟନ୍ତ ସମ୍ବେଦନଶୀଳ ରହିଛି ଏବଂ ବିଶ୍ୱ ଏହା ଦେଖୁଛି ଯେ କୂଟନୈତିକ ପଥରେ ସମାଧାନ ମିଳିବ କିମ୍ବା ପୁଣି ଥରେ ତଣାପୋଡ଼ ବଢ଼ିବ।