ଆଫଗାନିସ୍ତାନରେ ତାଲିବାନ ଶାସନ ଅଧୀନରେ ଲାଗୁ ହୋଇଥିବା କଡ଼ା ଇସଲାମିକ ନିୟମକୁ ନେଇ ପୁଣିଥରେ ଚର୍ଚ୍ଚା ଜୋର ଧରିଛି। ଇରାନ ସୀମାନ୍ତ ନିକଟରେ ଥିବା ଏକ ଶରଣାର୍ଥୀ ସ୍ୱାଗତ କେନ୍ଦ୍ରରୁ ପ୍ରାୟ ୨୦ ଜଣ ମାନବୀୟ ସହାୟତା କର୍ମୀଙ୍କୁ ତାଲିବାନର ନୈତିକତା ପୋଲିସ ଅଟକ ରଖିଥିବା ଖବର ସାମ୍ନାକୁ ଆସିଛି।

ରିପୋର୍ଟ ଅନୁସାରେ, ଅଟକ ହୋଇଥିବା କର୍ମଚାରୀମାନେ ବିଭିନ୍ନ ମାନବୀୟ ସହାୟତା ସଂଗଠନ ଓ ମିଳିତ ଜାତିସଂଘ ସହ ସଂପୃକ୍ତ ସଂସ୍ଥାଗୁଡ଼ିକରେ କାର୍ଯ୍ୟରତ ଥିଲେ। ସେମାନେ ଶରଣାର୍ଥୀମାନଙ୍କୁ ସହାୟତା ଯୋଗାଇବା କାର୍ଯ୍ୟରେ ନିୟୋଜିତ ଥିବାବେଳେ ତାଲିବାନର ଅଧିକାରୀମାନେ ସେଠାରେ ପହଞ୍ଚିଥିଲେ।

ତାଲିବାନର Ministry for the Promotion of Virtue and Prevention of Vice ଅଧୀନସ୍ଥ ଅଧିକାରୀମାନେ କର୍ମଚାରୀଙ୍କ ଦାଢ଼ି ନିର୍ଦ୍ଧାରିତ ନିୟମ ଅନୁଯାୟୀ ଲମ୍ବା ନଥିବା, ଟ୍ରିମ୍ କରାଯାଇଥିବା କିମ୍ବା ସେଭ୍ କରାଯାଇଥିବା ଦର୍ଶାଇ ସେମାନଙ୍କୁ ଅଟକ ରଖିଥିଲେ।

ଅଟକ ହୋଇଥିବା କିଛି କର୍ମଚାରୀଙ୍କୁ ଶନିବାର ମୁକ୍ତ କରାଯାଇଥିବା ବେଳେ ବାକି ସମସ୍ତଙ୍କୁ ରବିବାର ଛାଡ଼ି ଦିଆଯାଇଥିଲା। ତେବେ ଏହି ଘଟଣା ନେଇ ତାଲିବାନ ସରକାର ପକ୍ଷରୁ କୌଣସି ଆନୁଷ୍ଠାନିକ ବୟାନ ଜାରି କରାଯାଇ ନାହିଁ।

ଉଲ୍ଲେଖଯୋଗ୍ୟ ଯେ, ୨୦୨୪ ଅଗଷ୍ଟରେ ଲାଗୁ ହୋଇଥିବା ତାଲିବାନର ନୈତିକତା ଆଇନ ଅନୁଯାୟୀ ପୁରୁଷମାନଙ୍କ ପାଇଁ ଅତିକମରେ ଗୋଟିଏ ବନ୍ଦ ମୁଠା ଲମ୍ବର ଦାଢ଼ି ରଖିବା ବାଧ୍ୟତାମୂଳକ କରାଯାଇଛି। ଦାଢ଼ି କାଟିବା କିମ୍ବା ଅତ୍ୟଧିକ ଟ୍ରିମ୍ କରିବାକୁ ନିୟମ ଉଲ୍ଲଂଘନ ଭାବେ ଦେଖାଯାଏ।

ଏହା ସହିତ ପାଶ୍ଚାତ୍ୟ ଶୈଳୀର ପୋଷାକ, କିଛି ବିଶେଷ ହେୟାରଷ୍ଟାଇଲ୍ ଏବଂ ଅନ୍ୟାନ୍ୟ ଆଧୁନିକ ଫ୍ୟାଶନ୍ ପ୍ରଚଳନ ଉପରେ ମଧ୍ୟ କଟକଣା ଲାଗୁ କରାଯାଇଛି। ୨୦୨୧ରେ ପୁନର୍ବାର କ୍ଷମତାକୁ ଆସିବା ପରେ ତାଲିବାନ ଏଭଳି ନିୟମ ଉଲ୍ଲଂଘନ ଅଭିଯୋଗରେ ଅନେକ ଲୋକଙ୍କୁ ଅଟକ କରିବା ସହ ବହୁ ସେଲୁନ ଏବଂ ବାର୍ବର ଦୋକାନ ବନ୍ଦ କରିଛି।