ନୂଆଦିଲ୍ଲୀ: ରୋଗୀଙ୍କୁ ମହଙ୍ଗା ଔଷଧ ଲେଖିବା ପାଇଁ ଡାକ୍ତରମାନଙ୍କୁ ଔଷଧ କମ୍ପାନିଗୁଡ଼ିକ ମହଙ୍ଗା ଉପହାର ଓ ବିଭିନ୍ନ ସୁବିଧା ପ୍ରଦାନ କରୁଥିବା ଅଭିଯୋଗକୁ ନେଇ ସୁପ୍ରିମକୋର୍ଟ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଏପରି ଅନୈତିକ ମାର୍କେଟିଂ ପ୍ରଥା ଉପରେ ରୋକ ଲଗାଇବା ଏବଂ ନିୟାମକ ବ୍ୟବସ୍ଥାକୁ ସୁଦୃଢ଼ କରିବା ଦିଗରେ କେନ୍ଦ୍ର ସରକାରଙ୍କୁ ପଦକ୍ଷେପ ନେବାକୁ କୋର୍ଟ କହିଛନ୍ତି।

ଗଠନ ହେବ ୩ ସଦସ୍ୟ ବିଶିଷ୍ଟ ବିଶେଷଜ୍ଞ କମିଟି

ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ, ଔଷଧ କମ୍ପାନିଗୁଡ଼ିକର ମାର୍କେଟିଂ ପଦ୍ଧତିରେ ଥିବା ଅନୈତିକ ଅଭ୍ୟାସକୁ ଯାଞ୍ଚ କରିବା ପାଇଁ କେନ୍ଦ୍ର ସରକାର ତିନି ସଦସ୍ୟ ବିଶିଷ୍ଟ ବିଶେଷଜ୍ଞ କମିଟି ଗଠନ କରିବେ। ବ୍ୟକ୍ତି ଓ ବିଭିନ୍ନ ସଂଗଠନର ପରାମର୍ଶ ଏବଂ ଆପତ୍ତିକୁ ବିଚାର କରି କମିଟି ଡାକ୍ତରମାନଙ୍କୁ ମହଙ୍ଗା ଉପହାର ଓ ଅନ୍ୟାନ୍ୟ ଲାଭ ଦେବା ଭଳି ପ୍ରଥାକୁ ରୋକିବା ପାଇଁ ସୁପାରିଶ କରିବ।

ଜଷ୍ଟିସ୍ ବିକ୍ରମ ନାଥ ଏବଂ ଜଷ୍ଟିସ୍ ସନ୍ଦୀପ ମେହେଟ୍ଟାଙ୍କ ଖଣ୍ଡପୀଠ କେନ୍ଦ୍ର ସରକାରଙ୍କୁ କମିଟିର ସୁପାରିଶ ଏବଂ ଏହା ଉପରେ ନିଆଯାଇଥିବା ପଦକ୍ଷେପ ସମ୍ପର୍କରେ ରିପୋର୍ଟ ଦାଖଲ କରିବାକୁ କହିଛନ୍ତି।

ଡାକ୍ତରଙ୍କ ପାଇଁ ପୂର୍ବରୁ ରହିଛି ନିୟମ

କେନ୍ଦ୍ର ସରକାର କୋର୍ଟଙ୍କୁ ଜଣାଇଛନ୍ତି ଯେ, ଔଷଧ କମ୍ପାନିଗୁଡ଼ିକଠାରୁ ଉପହାର, ଯାତ୍ରା, ଆତିଥ୍ୟ କିମ୍ବା ନଗଦ ଓ ଅନ୍ୟାନ୍ୟ ଆର୍ଥିକ ଲାଭ ଗ୍ରହଣ କରୁଥିବା ଡାକ୍ତରମାନଙ୍କ ବିରୋଧରେ ନିୟମ ପୂର୍ବରୁ ଲାଗୁ ରହିଛି।

ଜାତୀୟ ଚିକିତ୍ସା କମିସନ ଆଇନ, ୨୦୧୯ ଏବଂ ବୃତ୍ତିଗତ ଆଚରଣ ସମ୍ପର୍କିତ ନିୟମ ଅନୁସାରେ ଏପରି ନିୟମ ଉଲ୍ଲଂଘନ କଲେ ଡାକ୍ତରଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବାର ବ୍ୟବସ୍ଥା ରହିଛି।

ଫାର୍ମା କମ୍ପାନିଙ୍କ ପାଇଁ ନୂଆ ନିୟମର ଆବଶ୍ୟକତା

କେନ୍ଦ୍ର ସରକାର ସ୍ୱୀକାର କରିଛନ୍ତି ଯେ, ଔଷଧ କମ୍ପାନିଗୁଡ଼ିକ ଡାକ୍ତରଙ୍କୁ ପ୍ରଭାବିତ କରିବା ପାଇଁ କରୁଥିବା ଅନୈତିକ ଅଭ୍ୟାସକୁ ସିଧାସଳଖ ନିୟନ୍ତ୍ରଣ କରିବାରେ ବର୍ତ୍ତମାନର ନିୟାମକ ବ୍ୟବସ୍ଥାରେ କିଛି ତ୍ରୁଟି ରହିଛି।

ଏହି ତ୍ରୁଟିଗୁଡ଼ିକର ସମୀକ୍ଷା କରି କମିଟି ନିର୍ଣ୍ଣୟ କରିବ ଯେ ଔଷଧ କମ୍ପାନିଗୁଡ଼ିକ ପାଇଁ ପୃଥକ ବୈଧାନିକ ଢାଞ୍ଚା ଆବଶ୍ୟକ କି ନାହିଁ। ନଚେତ ବର୍ତ୍ତମାନ ଥିବା ଆଇନ ଓ ନିୟମକୁ ଆହୁରି ସୁଦୃଢ଼ କରି ଏପରି ଅନୈତିକ ମାର୍କେଟିଂକୁ ରୋକାଯାଇପାରିବ କି ନାହିଁ, ସେନେଇ ମଧ୍ୟ କମିଟି ସୁପାରିଶ କରିବ।

୨୦୨୭ ଜାନୁଆରି ୨୯ରେ ପରବର୍ତ୍ତୀ ଶୁଣାଣି

କେନ୍ଦ୍ର ସରକାର କୋର୍ଟରେ ଏହି ନିର୍ଦ୍ଦେଶର କାର୍ଯ୍ୟକାରିତା ସମ୍ପର୍କରେ ସତ୍ୟପାଠ ଦାଖଲ କରିବେ। ସୁପ୍ରିମକୋର୍ଟ ମାମଲାର ପରବର୍ତ୍ତୀ ଶୁଣାଣି ୨୦୨୭ ଜାନୁଆରି ୨୯ରେ କରିବେ।

ଏହି ମାମଲାରେ ଅଭିଯୋଗ ହୋଇଥିଲା ଯେ, କିଛି ଔଷଧ କମ୍ପାନି ନିଜ କମ୍ପାନିର ମହଙ୍ଗା ଔଷଧ ରୋଗୀଙ୍କୁ ଲେଖିବା ପାଇଁ ଡାକ୍ତରମାନଙ୍କୁ ଦାମୀ ଉପହାର, ବିଦେଶ ଯାତ୍ରା ଓ ଅନ୍ୟାନ୍ୟ ସୁବିଧା ପ୍ରଦାନ କରୁଛନ୍ତି। ଏହି ପ୍ରଥାକୁ ରୋକିବା ପାଇଁ କୋର୍ଟଙ୍କ ହସ୍ତକ୍ଷେପ ଦାବି କରାଯାଇଥିଲା।