ନୂଆଦିଲ୍ଲୀ: ଶ୍ରୀ ଶ୍ରୀ ରବିଶଙ୍କରଙ୍କ ନେତୃତ୍ୱାଧୀନ ଆର୍ଟ ଅଫ୍ ଲିଭିଂ ଫାଉଣ୍ଡେସନ୍‌କୁ ବଡ଼ ଆଶ୍ୱସ୍ତି ମିଳିଛି। ଯମୁନା ବନ୍ୟାଭୂମି କ୍ଷତି ମାମଲାରେ ସଂଗଠନ ପକ୍ଷରୁ ଦିଆଯାଇଥିବା ୫ କୋଟି ଟଙ୍କାର ପରିବେଶ କ୍ଷତିପୂରଣ ରାଶି ଫେରାଇବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି।

୨୦୧୬ରେ ଦିଲ୍ଲୀର ଯମୁନା ବନ୍ୟାଭୂମିରେ ଆର୍ଟ ଅଫ୍ ଲିଭିଂ ପକ୍ଷରୁ ୱାର୍ଲ୍ଡ କଲ୍ଚର ଫେଷ୍ଟିଭାଲ୍ ଆୟୋଜନ କରାଯାଇଥିଲା। ଏହି ଆୟୋଜନ ପାଇଁ ଯମୁନା ବନ୍ୟାଭୂମିର ପରିବେଶ ଓ ପରିସଂସ୍ଥାନକୁ କ୍ଷତି ପହଞ୍ଚିଥିବା ଅଭିଯୋଗ ଉଠିଥିଲା।

ଏହି ମାମଲାରେ ଜାତୀୟ ଗ୍ରୀନ୍ ଟ୍ରିବ୍ୟୁନାଲ୍‌ (NGT) ଆର୍ଟ ଅଫ୍ ଲିଭିଂକୁ ପରିବେଶ କ୍ଷତିପୂରଣ ବାବଦରେ ୫ କୋଟି ଟଙ୍କା ଜମା କରିବାକୁ କହିଥିଲା। ପରେ ଏହି ରାଶି ଯମୁନା ବନ୍ୟାଭୂମିର ପୁନରୁଦ୍ଧାର କାର୍ଯ୍ୟରେ ବ୍ୟବହାର କରିବାକୁ ନିର୍ଦ୍ଦେଶ ହୋଇଥିଲା।

ତେବେ ମାମଲା ସୁପ୍ରିମକୋର୍ଟରେ ପହଞ୍ଚିବା ପରେ ଶୀର୍ଷ ଅଦାଲତ ଆର୍ଟ ଅଫ୍ ଲିଭିଂ ପାଇଁ ଆଶ୍ୱସ୍ତି ଦେଇଛନ୍ତି। ରିପୋର୍ଟ ଅନୁସାରେ, ୨୦୧୬ର କାର୍ଯ୍ୟକ୍ରମ ଯୋଗୁଁ ଯମୁନାର ସମ୍ବେଦନଶୀଳ ପରିସଂସ୍ଥାନକୁ ସିଧାସଳଖ କ୍ଷତି ହୋଇଥିବାର ପ୍ରତ୍ୟକ୍ଷ ପ୍ରମାଣ ନଥିବା ଦର୍ଶାଇ ଟଙ୍କା ଫେରସ୍ତ ପାଇଁ ନିର୍ଦ୍ଦେଶ ଦିଆଯାଇଛି।

ଏହା ସହିତ ଯମୁନା ବନ୍ୟାଭୂମିର ସୁରକ୍ଷା ଦାୟିତ୍ୱ ଠିକ୍‌ ଭାବେ ତୁଲିନଥିବାରୁ ଦିଲ୍ଲୀ ଡେଭଲପମେଣ୍ଟ ଅଥରିଟି (DDA) ଉପରେ ମଧ୍ୟ ସୁପ୍ରିମକୋର୍ଟ ପ୍ରଶ୍ନ ଉଠାଇଛନ୍ତି। ଯମୁନା ବନ୍ୟାଭୂମିର ପୁନର୍ବାସ ଓ ପୁନରୁଦ୍ଧାର କାର୍ଯ୍ୟ ଜାରି ରଖିବାକୁ DDAକୁ ନିର୍ଦ୍ଦେଶ ଦିଆଯାଇଛି।