ଉତ୍ତର ପ୍ରଦେଶର ସୁଲତାନପୁର ଜିଲ୍ଲାରେ ହଠାତ୍ ଆସିଥିବା ଭୟଙ୍କର ଝଡ଼ ଓ ବର୍ଷା ଭୟାବହ ତଣ୍ଡବ ସୃଷ୍ଟି କରିଛି। ଏହି ପ୍ରାକୃତିକ ବିପର୍ଯ୍ୟୟରେ ଦୁଇ ଶିଶୁ ସହ ମୋଟ 7 ଜଣଙ୍କ ମୃତ୍ୟୁ ଘଟିଥିବାବେଳେ 20ରୁ ଅଧିକ ଲୋକ ଆହତ ହୋଇଛନ୍ତି।

ଜିଲ୍ଲାର ବଲଦିରାଇ, ହାଲିଆପୁର, ଅଖଣ୍ଡ ନଗର, ବନ୍ଧୁଆ କଳା ଓ କୁଡ଼ୱାର ଅଞ୍ଚଳରେ ଝଡ଼ର ପ୍ରଭାବ ଅଧିକ ଦେଖାଯାଇଥିଲା। ବହୁ ସ୍ଥାନରେ ଘର ଭାଙ୍ଗିପଡ଼ିବା, ବିଦ୍ୟୁତ୍ ଖୁଟି ଓ ଗଛ ଉପଡ଼ିପଡ଼ିବା ଯୋଗୁଁ ଜୀବନହାନି ଘଟିଛି।

କୁଡ଼ୱାରରେ 20 ବର୍ଷୀୟ ମହେନ୍ଦ୍ର ତିୱାରୀଙ୍କ ଉପରେ ବିଦ୍ୟୁତ୍ ଖୁଟି ପଡ଼ିଯାଇଥିବାରୁ ସେ ଘଟଣାସ୍ଥଳରେ ମୃତ୍ୟୁବରଣ କରିଥିଲେ। ତାଙ୍କ ଭଉଣୀଙ୍କ ବିବାହ ପାଇଁ ସେ ଘରକୁ ଫେରିଥିଲେ।

ବଲଦିରାଇରେ 8 ବର୍ଷୀୟା ମହିମାଙ୍କ ଘର ଉପରେ ଇଟ୍ ପଡ଼ିବାରୁ ମୃତ୍ୟୁ ଘଟିଥିଲା। ସେହିପରି ରାମବରଣ ନାମକ ଜଣେ ବ୍ୟକ୍ତିଙ୍କ ଘର ଉପରେ ଗଛ ପଡ଼ିଯିବାରୁ ତାଙ୍କ ମୃତ୍ୟୁ ହୋଇଥିଲା।

ହାଲିଆପୁରରେ କାଦୁଆ ଦେଓଲି ଓ ଛାଣ ଘର ଭାଙ୍ଗିପଡ଼ିବାରୁ ରୀତା ନାମକ ଜଣେ ମହିଳାଙ୍କ ମୃତ୍ୟୁ ଘଟିଥିଲା। ଅଖଣ୍ଡ ନଗରରେ 8 ବର୍ଷୀୟ ସୁରେମନ ମୃତ୍ୟୁବରଣ କରିଥିବାବେଳେ ଅନ୍ୟମାନେ ଗୁରୁତର ଆହତ ହୋଇଛନ୍ତି।

ପୁର୍ବାଞ୍ଚଳ ଏକ୍ସପ୍ରେସୱେରେ ମଧ୍ୟ କ୍ଷତି

ଝଡ଼ର ପ୍ରଭାବରେ ପୁର୍ବାଞ୍ଚଳ ଏକ୍ସପ୍ରେସୱେର ଟୋଲ୍ ପ୍ଲାଜାରେ ଭାରି କ୍ଷତି ଘଟିଥିଲା, ଯାହା ଯାତାୟାତକୁ କିଛି ଘଣ୍ଟା ପାଇଁ ବାଧାଗ୍ରସ୍ତ କରିଥିଲା।

ରାହାତ ଓ ସହାୟତା କାର୍ଯ୍ୟ ଜାରି

ଜିଲ୍ଲା ପ୍ରଶାସନ ତୁରନ୍ତ ଉଦ୍ଧାର ଓ ସହାୟତା କାର୍ଯ୍ୟ ଆରମ୍ଭ କରିଛି। ମୃତକଙ୍କ ପରିବାରକୁ State Disaster Response Fund ରୁ 24 ଘଣ୍ଟା ମଧ୍ୟରେ କ୍ଷତିପୂରଣ ଦେବାକୁ ନିର୍ଦ୍ଦେଶ ଦିଆଯାଇଛି।