ସହରୀୟ ସୁରକ୍ଷା ବ୍ୟବସ୍ଥାକୁ ଆହୁରି ସୁଦୃଢ଼ କରିବା ଓ ଆଇନ-ଶୃଙ୍ଖଳା ପରିସ୍ଥିତିରେ ତ୍ୱରିତ ପ୍ରତିକ୍ରିୟା ପାଇଁ କମିଶନରେଟ୍ ପୋଲିସ ଗୁରୁବାର କଟକ-ଭୁବନେଶ୍ୱର ଟ୍ୱିନ୍ ସିଟିରେ STU ଓ STG ନାମରେ ଦୁଇଟି ବିଶେଷ ଟିମ୍ ଗଠନ କରିଛି। ଏହି ବିଶେଷ ୟୁନିଟ୍ଗୁଡ଼ିକ ଜନତା ହିଂସା, ଆପାତକାଳୀନ ପରିସ୍ଥିତି ଓ ସହରୀୟ ସୁରକ୍ଷା ଚ୍ୟାଲେଞ୍ଜ ମୁକାବିଲାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇବେ।
ପୋଲିସ ସୂତ୍ର ଅନୁଯାୟୀ, ଏହି ଟିମ୍ଗୁଡ଼ିକୁ ERSS (Emergency Response Support System) ଓ PCR ଭ୍ୟାନ୍ରେ ନିଯୁକ୍ତ କରାଯିବ। ଟ୍ୱିନ୍ ସିଟିର ସମ୍ବେଦନଶୀଳ ଓ ଗୁରୁତ୍ୱପୂର୍ଣ୍ଣ ସ୍ଥାନରେ ସେମାନେ ମୋତାୟେନ ରହିବେ। କୌଣସି ଅଞ୍ଚଳରେ ହଠାତ୍ ଜନତା ହିଂସା କିମ୍ବା ଅଶାନ୍ତି ସୃଷ୍ଟି ହେଲେ ଏହି ପ୍ରଶିକ୍ଷିତ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିବେ।
ଏହି ବିଶେଷ ୟୁନିଟ୍ରେ ଚୟନିତ କର୍ମଚାରୀମାନେ ଜନତାଙ୍କ ଆକ୍ରମକ ବ୍ୟବହାର ନିୟନ୍ତ୍ରଣ, ଆପାତକାଳୀନ ପଦକ୍ଷେପ ଓ ତ୍ୱରିତ ଅଭିଯାନ ସମ୍ପର୍କିତ ବିଶେଷ ପ୍ରଶିକ୍ଷଣ ନେଇଥିବା ଜଣାପଡ଼ିଛି।
ଜନତା ହିଂସା ନିୟନ୍ତ୍ରଣ ସହିତ STU ଓ STG ଟିମ୍କୁ ସହରୀୟ ଆତଙ୍କବାଦ ବିରୋଧୀ ଅଭିଯାନର ଦାୟିତ୍ୱ ମଧ୍ୟ ଦିଆଯିବ। ଅଧିକାରୀମାନେ କହିଛନ୍ତି ଯେ, ଏହି ଟିମ୍ଗୁଡ଼ିକ ଭିଡ଼ଭାଡ଼ ଅଞ୍ଚଳରେ ସନ୍ଦେହଜନକ ଗତିବିଧି ଉପରେ ନଜର ରଖିବେ ଏବଂ ଲୋକଙ୍କ ସୁରକ୍ଷାକୁ ବିପଦରୁ ରକ୍ଷା କରିବାକୁ କାମ କରିବେ। VVIP ଗତିବିଧି ଓ ଉଚ୍ଚ ସୁରକ୍ଷା ବ୍ୟବସ୍ଥା ସମୟରେ ମଧ୍ୟ ସେମାନେ ସତର୍କ ନଜର ରଖିବେ।
ପୋଲିସ ଅଧିକାରୀମାନଙ୍କ ମତରେ, ଏହି ପଦକ୍ଷେପ ସହର ଅଞ୍ଚଳରେ ଆପାତକାଳୀନ ପ୍ରତିକ୍ରିୟା କ୍ଷମତାକୁ ବଢ଼ାଇବ ଓ ସୁରକ୍ଷା ବ୍ୟବସ୍ଥା ପ୍ରତି ଲୋକଙ୍କ ଆସ୍ଥାକୁ ସୁଦୃଢ଼ କରିବ। ଏବେ ସହରଗୁଡ଼ିକରେ ହଠାତ୍ ଭିଡ଼ ହିଂସା ଓ ସୁରକ୍ଷା ଚ୍ୟାଲେଞ୍ଜ ବଢ଼ୁଥିବା ପରିପ୍ରେକ୍ଷୀରେ ଏହି ବିଶେଷ ୟୁନିଟ୍ର ଗଠନକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଦେଖାଯାଉଛି।
ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, “ଏହି STU ଓ STG ଟିମ୍ଗୁଡ଼ିକ ପୂର୍ବରୁ ବିଧାନସଭା ସୁରକ୍ଷାରେ ନିଯୁକ୍ତ ଥିଲେ। ଏବେ ସେମାନଙ୍କୁ ସହରୀୟ ଅଞ୍ଚଳରେ ଜନତା ହିଂସା ନିୟନ୍ତ୍ରଣ ପାଇଁ ପୂର୍ଣ୍ଣ ଭାବେ ମୋତାୟେନ କରାଯିବ। କୌଣସି ସ୍ଥାନରେ ଜନତା ହିଂସା ଘଟିଲେ ସେମାନେ ତୁରନ୍ତ ERSS କଲ୍ରେ ସାଡ଼ା ଦେଇ ଘଟଣାସ୍ଥଳରେ ପହଞ୍ଚି ପରିସ୍ଥିତି ନିୟନ୍ତ୍ରଣ କରିବେ।”
ଉଲ୍ଲେଖଯୋଗ୍ୟ ଯେ, ପୂର୍ବରୁ ବାଲିଅନ୍ତା ଅଞ୍ଚଳରେ GRP କନଷ୍ଟେବଲ୍ ସୌମ୍ୟ ରଞ୍ଜନ ସ୍ୱାଇଁଙ୍କୁ ନିର୍ମମ ଭାବେ ହତ୍ୟା କରାଯାଇଥିବା ଘଟଣା ଘଟିଥିଲା। ଏପରି ଘଟଣା ପୁନରାବୃତ୍ତି ରୋକିବା ପାଇଁ କମିଶନରେଟ୍ ପୋଲିସ ଏହି ପଦକ୍ଷେପ ନେଇଥିବା ସୂଚନା ମିଳିଛି।
ଆଇପିଏଲ୍‌ ୨୦୨୬ରେ ରାଜସ୍ଥାନ ରୟାଲ୍ସର ଓପେନିଂ ଯୋଡ଼ି...
ଆଇପିଏଲ୍‌ ୨୦୨୬ରେ ସନରାଇଜର୍ସ ହାଇଦ୍ରାବାଦ ଓ ରୟାଲ୍&...
ଭେନେଜୁଏଲାର କାର୍ଯ୍ୟବାହକ ରାଷ୍ଟ୍ରପତି ଡେଲସି ରୋଡ୍ରିଗେଜ୍...
ଆଇପିଏଲ୍ ୨୦୨୬ରୁ କୋଲକାତା ନାଇଟ୍ ରାଇଡର୍ସ ବାଦ୍ ପଡ଼ିବା ପ...
ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଭାରତ-ରୁଷ ପ୍ରତିରକ୍ଷା...
ଇରାନ୍ ସହ ସମ୍ଭାବ୍ୟ ଶାନ୍ତି ଚୁକ୍ତିକୁ ନେଇ ଆମେରିକୀୟ ରାଷ...
ଦିଲ୍ଲୀ କ୍ୟାପିଟାଲ୍ସ ଅଧିନାୟକ ଅକ୍ଷର ପଟେଲ୍‌ ଚଳିତ...
ଇସ୍ଲାମ ଧର୍ମର ପାଞ୍ଚଟି ପ୍ରମୁଖ ସ୍ତମ୍ଭ ମଧ୍ୟରୁ ଗୋଟିଏ ପବ...
