UPI ବ୍ୟବହାରକାରୀଙ୍କ ପାଇଁ ଏକ ବଡ଼ ଆଶ୍ୱସ୍ତିକର ଖବର ଆସିଛି। UPIର ନିର୍ଦ୍ଦିଷ୍ଟ ଉଚ୍ଚମୂଲ୍ୟର ମର୍ଚ୍ଚାଣ୍ଟ ଟ୍ରାଞ୍ଜାକ୍ସନ୍‌ ଉପରେ ଛୋଟ ଫି’ ଲାଗିଲେ ମଧ୍ୟ ଏହା ଡିଜିଟାଲ୍ ପେମେଣ୍ଟର ଟ୍ରାଞ୍ଜାକ୍ସନ୍‌ ଭଲ୍ୟୁମ୍‌କୁ ବଡ଼ ଭାବେ ପ୍ରଭାବିତ କରିବ ନାହିଁ ବୋଲି RBI ଗଭର୍ଣ୍ଣର ସଞ୍ଜୟ ମଲହୋତ୍ରା କହିଛନ୍ତି।

RBIର ଅକ୍ଟୋବର ମୁଦ୍ରାନୀତି ସମୀକ୍ଷା ପରେ ସାମ୍ବାଦିକଙ୍କ ସହ ଆଲୋଚନା ବେଳେ ମଲହୋତ୍ରା କହିଛନ୍ତି ଯେ, ବର୍ତ୍ତମାନ ସୁଦ୍ଧା UPI ଟ୍ରାଞ୍ଜାକ୍ସନ୍‌ ଭଲ୍ୟୁମ୍‌ରେ କୌଣସି ହ୍ରାସ ଦେଖାଯାଇନାହିଁ। ଏକ ଛୋଟ ଫି’ ଯୋଗୁଁ UPI ବ୍ୟବହାରରେ ବଡ଼ ପ୍ରଭାବ ପଡ଼ିବ ବୋଲି ସେ ବ୍ୟକ୍ତିଗତ ଭାବେ ମନେ କରୁନଥିବା କହିଛନ୍ତି। 

ଅକ୍ଟୋବର ୧୫ରୁ କ’ଣ ବଦଳିବ?

ନୂଆ ବ୍ୟବସ୍ଥା ଅନୁସାରେ ଅକ୍ଟୋବର ୧୫ରୁ ₹୨,୦୦୦ରୁ ଅଧିକ ଯୋଗ୍ୟ Person-to-Merchant (P2M) UPI ଟ୍ରାଞ୍ଜାକ୍ସନ୍‌ ଉପରେ ୦.୪% MDR ଲାଗୁ ହେବ। ₹୭୫,୦୦୦ କିମ୍ବା ତା’ଠାରୁ ଅଧିକ ଟ୍ରାଞ୍ଜାକ୍ସନ୍‌ ପାଇଁ MDR ସର୍ବାଧିକ ₹୩୦୦ରେ ସୀମିତ ରହିବ। 

ତେବେ ଏହି MDR ଗ୍ରାହକଙ୍କ ଉପରେ ସିଧାସଳଖ ଲାଗୁ ହେବ ନାହିଁ। UPIରେ ପେମେଣ୍ଟ କରିବା ସମୟରେ ଗ୍ରାହକଙ୍କୁ ଅତିରିକ୍ତ ଫି’ ଦେବାକୁ ପଡ଼ିବ ନାହିଁ। ମର୍ଚ୍ଚାଣ୍ଟମାନେ ମଧ୍ୟ ଏହି MDRକୁ ଅଲଗା ଚାର୍ଜ ଭାବେ ଗ୍ରାହକଙ୍କଠାରୁ ଆଦାୟ କରିପାରିବେ ନାହିଁ। 

₹୨,୦୦୦ ପର୍ଯ୍ୟନ୍ତ UPI ପେମେଣ୍ଟ ଏବଂ Person-to-Person (P2P) ଟ୍ରାଞ୍ଜାକ୍ସନ୍‌ ପୂର୍ବଭଳି ମାଗଣା ରହିବ। ତେଣୁ ସାଧାରଣ ଛୋଟ ଡିଜିଟାଲ୍ ପେମେଣ୍ଟ ଉପରେ ଏହାର ପ୍ରଭାବ ପଡ଼ିବ ନାହିଁ।