ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (SBI) ନିଜ ଗ୍ରାହକଙ୍କ ତଥ୍ୟ ସମ୍ପର୍କିତ ଏକ ବଡ଼ ସାଇବର ସୁରକ୍ଷା ଘଟଣାକୁ ନିଶ୍ଚିତ କରିଛି। ବ୍ୟାଙ୍କର ସୂଚନା ଅନୁସାରେ, ଡାର୍କ ୱେବ୍‌ରେ ପ୍ରକାଶିତ ପ୍ରାୟ ୩.୭୫ ଲକ୍ଷ ରେକର୍ଡର ପ୍ରାରମ୍ଭିକ ବିଶ୍ଳେଷଣରେ ୩,୮୯୭ ଗ୍ରାହକଙ୍କ ରେକର୍ଡରେ ବ୍ୟକ୍ତିଗତ ପରିଚୟ ସୂଚନା (PII) ଥିବା ଚିହ୍ନଟ ହୋଇଛି।

ଏହି ତଥ୍ୟରେ ଗ୍ରାହକଙ୍କ ନାମ, ପଞ୍ଜୀକୃତ ମୋବାଇଲ୍ ନମ୍ବର, ଜନ୍ମତାରିଖ, ଲିଙ୍ଗ, ଇମେଲ୍ ଠିକଣା ଏବଂ ବାସସ୍ଥାନ ଠିକଣା ଭଳି ସମ୍ବେଦନଶୀଳ ବ୍ୟକ୍ତିଗତ ସୂଚନା ରହିଥିବା ଜଣାପଡ଼ିଛି।

ଏହା ସହିତ ବ୍ୟାଙ୍କ ଶାଖା ଏବଂ ଗ୍ରାହକ ସୂଚନା ଫାଇଲ୍ ଆଇଡି, ଲିଡ୍ ଆଇଡି ଏବଂ ଲୋନ୍ ଓ ଲିଡ୍ ରେକର୍ଡ ସହ ଜଡ଼ିତ ମେଟାଡାଟା ମଧ୍ୟ ରେକର୍ଡଗୁଡ଼ିକରେ ଥିବା କହିଛି।

କିପରି ଜଣାପଡ଼ିଲା?

ଅକ୍ଟୋବର ୧୬ରେ SBIକୁ ଏହି ଘଟଣା ସମ୍ପର୍କରେ Threat Intelligence Service Provider, Defence Cyber Agency ଏବଂ CERT-In ପକ୍ଷରୁ ସତର୍କ କରାଯାଇଥିଲା। ଏହା ପରେ ବ୍ୟାଙ୍କ ପକ୍ଷରୁ ପ୍ରାରମ୍ଭିକ ଯାଞ୍ଚ ଆରମ୍ଭ କରାଯାଇଥିଲା।

SBI କହିଛି ଯେ, ଡାର୍କ ୱେବ୍‌ରେ ମିଳିଥିବା ସମସ୍ତ ତଥ୍ୟର ସତ୍ୟତା ଓ ସମ୍ପୂର୍ଣ୍ଣତା ଯାଞ୍ଚ କରିବା, ତଥ୍ୟର ସମ୍ଭାବ୍ୟ ଉତ୍ସ ଚିହ୍ନଟ କରିବା ଏବଂ ଗ୍ରାହକ ଓ ବ୍ୟାଙ୍କ ଉପରେ ଏହାର ବିପଦ ଆକଳନ କରିବା ପାଇଁ ଅଧିକ ବିସ୍ତୃତ ତଦନ୍ତ ଆବଶ୍ୟକ।

କୋର୍ ବ୍ୟାଙ୍କିଂ ସେବା ପ୍ରଭାବିତ ହୋଇନାହିଁ

ତଥ୍ୟ ଲିକ୍ ଘଟଣା ସାମ୍ନାକୁ ଆସିଥିଲେ ମଧ୍ୟ SBIର କୋର୍ ବ୍ୟାଙ୍କିଂ ଅପରେସନ୍‌ରେ କୌଣସି ବାଧା ହୋଇନଥିବା ବ୍ୟାଙ୍କ ସ୍ପଷ୍ଟ କରିଛି। ବ୍ୟାଙ୍କର ମୁଖ୍ୟ ବ୍ୟବସାୟିକ କାର୍ଯ୍ୟ ସାଧାରଣ ଭାବେ ଚାଲୁଥିବା ଏବଂ ଘଟଣା ପରେ ସାଇବର ଇନ୍ସିଡେଣ୍ଟ ରେସପନ୍ସ ଓ କଣ୍ଟେନମେଣ୍ଟ ପ୍ରୋଟୋକଲ୍ ସକ୍ରିୟ କରାଯାଇଥିବା SBI କହିଛି।

ପୂର୍ବରୁ ଏକ ଅଜ୍ଞାତ ହ୍ୟାକର୍ ଗୋଷ୍ଠୀ ଡାର୍କ ୱେବ୍‌ରେ ୩.୭୫ ଲକ୍ଷ SBI ଗ୍ରାହକଙ୍କ ତଥ୍ୟ ହାସଲ କରିଥିବା ଦାବି କରିଥିଲା। ତେବେ SBI ଏହି ଘଟଣା ପାଇଁ କୌଣସି ନିର୍ଦ୍ଦିଷ୍ଟ ହ୍ୟାକର୍ ଗୋଷ୍ଠୀର ନାମ ଘୋଷଣା କରିନାହିଁ।

ବ୍ୟାଙ୍କ କହିଛି ଯେ ତଦନ୍ତ ଜାରି ରହିଛି ଏବଂ ଚିହ୍ନଟ ହୋଇଥିବା ୩,୮୯୭ ଗ୍ରାହକ ରେକର୍ଡ ସମ୍ପର୍କରେ ଉପଯୁକ୍ତ ନିୟାମକୀୟ ପଦକ୍ଷେପ ନିଆଯିବ।