ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (SBI) ସହ ଜଡିତ ଗ୍ରାହକଙ୍କ ତଥ୍ୟ ଡାର୍କ ୱେବ୍‌ରେ ଥିବା ସନ୍ଦେହ ପରେ ବ୍ୟାଙ୍କ ପକ୍ଷରୁ ତଦନ୍ତ ଆରମ୍ଭ ହୋଇଛି। ପ୍ରାଥମିକ ବିଶ୍ଳେଷଣରେ ପ୍ରାୟ ୩,୭୫,୦୦୦ ରେକର୍ଡ ମଧ୍ୟରୁ ୩,୮୯୭ଟି ଗ୍ରାହକ ରେକର୍ଡରେ ବ୍ୟକ୍ତିଗତ ପରିଚୟ ସୂଚନା (PII) ଥିବା ଚିହ୍ନଟ କରାଯାଇଛି।  

ଏହି ତଥ୍ୟରେ ଗ୍ରାହକଙ୍କ ମୋବାଇଲ୍ ନମ୍ବର, ଜନ୍ମତାରିଖ, ନାମ, ଲିଙ୍ଗ, ଇମେଲ୍ ଠିକଣା, ଆବାସିକ ଠିକଣା, ବ୍ରାଞ୍ଚ ଓ CIF ଆଇଡି, ଲିଡ୍ ଆଇଡି ସହିତ ଋଣ କିମ୍ବା ଲିଡ୍ ରେକର୍ଡ ସମ୍ପର୍କିତ ମେଟାଡାଟା ଥିବା ରିପୋର୍ଟ ହୋଇଛି।

SBI କହିଛି ଯେ ଅକ୍ଟୋବର ୧୬ରେ Threat Intelligence Service Provider, Defence Cyber Agency ଏବଂ CERT-In ପକ୍ଷରୁ ଏହି ସନ୍ଦେହଜନକ ତଥ୍ୟ ଉନ୍ମୋଚନ ସମ୍ପର୍କରେ ସତର୍କ ସୂଚନା ମିଳିଥିଲା। ଏହା ପରେ ବ୍ୟାଙ୍କ ନିଜର cyber incident response ଓ containment protocol ସକ୍ରିୟ କରିଥିଲା ଏବଂ CERT-In ଦ୍ୱାରା ଅନୁମୋଦିତ ଏକ ସ୍ୱାଧୀନ ସାଇବର ସୁରକ୍ଷା ସଂସ୍ଥାକୁ ତଦନ୍ତରେ ନିୟୋଜିତ କରିଛି।

ଏହି ଘଟଣାରେ ଜଡିତ ତଥ୍ୟ ପ୍ରକୃତ ଓ ସମ୍ପୂର୍ଣ୍ଣ କି ନୁହେଁ, ତଥ୍ୟ କେଉଁଠାରୁ ଆସିଛି ଏବଂ ଏହାର ପ୍ରକୃତ ପରିମାଣ କେତେ—ସେନେଇ ତଦନ୍ତ ଚାଲିଛି। ତେଣୁ ଏହାକୁ ଏପର୍ଯ୍ୟନ୍ତ ଏକ suspected data exposure ଭାବେ ଦେଖାଯାଉଛି; ତଥ୍ୟ ଲିକ୍‌ର ସମ୍ପୂର୍ଣ୍ଣ ସତ୍ୟତା ନିଶ୍ଚିତ ହୋଇନାହିଁ। 

ଏକ ଅଜଣା ହ୍ୟାକର୍ ଗ୍ରୁପ୍ ‘Siriusim’ SBI ସହ ଜଡିତ ଗ୍ରାହକଙ୍କ ଗୋପନୀୟ ତଥ୍ୟ ଥିବା ଦାବି କରିଥିବା ରିପୋର୍ଟ ମଧ୍ୟ ଆସିଛି। ତେବେ ଏହି ଦାବିର ସତ୍ୟତା ଓ ତଥ୍ୟର ଉତ୍ସ ଏପର୍ଯ୍ୟନ୍ତ ଯାଞ୍ଚ ହୋଇନାହିଁ। 

SBI ସ୍ପଷ୍ଟ କରିଛି ଯେ ଘଟଣାର କୋର୍ ବ୍ୟାଙ୍କିଂ କାର୍ଯ୍ୟ, ଆର୍ଥିକ ପ୍ରଦର୍ଶନ କିମ୍ବା business continuity ଉପରେ କୌଣସି material impact ପଡ଼ିନାହିଁ ଏବଂ ବ୍ୟାଙ୍କର ମୁଖ୍ୟ କାର୍ଯ୍ୟ ସାଧାରଣ ଭାବେ ଚାଲିଛି।