ସାଗରମାଳା କାର୍ଯ୍ୟକ୍ରମ ଅଧୀନରେ ଓଡ଼ିଶା ଦେଶର ଅଗ୍ରଣୀ ରାଜ୍ୟ ଭାବେ ଉଭା ହୋଇଛି। ରାଜ୍ୟରେ ୫୮ଟି ବନ୍ଦର-ସଂଯୁକ୍ତ ଭିତ୍ତିଭୂମି ପ୍ରକଳ୍ପ ପାଇଁ ୫୬,୩୫୦ କୋଟି ଟଙ୍କାରୁ ଅଧିକ ନିବେଶ କରାଯାଇଛି କିମ୍ବା ପ୍ରକଳ୍ପଗୁଡ଼ିକ ବିଭିନ୍ନ ପର୍ଯ୍ୟାୟରେ କାର୍ଯ୍ୟାନ୍ୱୟନ ହେଉଛି। ଏହି ସୂଚନା ରାଜ୍ୟସଭାରେ କେନ୍ଦ୍ର ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରୀ ସର୍ବାନନ୍ଦ ସୋନୋୱାଲ ପ୍ରଦାନ କରିଛନ୍ତି।

ବିଜେଡି ସାଂସଦ ସସ୍ମିତ ପାତ୍ରଙ୍କ ପ୍ରଶ୍ନର ଉତ୍ତରରେ ମନ୍ତ୍ରୀ କହିଥିଲେ ଯେ, ସାଗରମାଳା ଯୋଜନା ଅଧୀନରେ ୩୫୦ କୋଟି ଟଙ୍କାର ୬ଟି ପ୍ରକଳ୍ପକୁ କେନ୍ଦ୍ର ଅନୁମୋଦନ କରିଛି। ଏହାଛଡ଼ା ପ୍ରାୟ ୫୬ ହଜାର କୋଟି ଟଙ୍କାର ୫୨ଟି ପ୍ରକଳ୍ପ ପାରାଦୀପ ପୋର୍ଟ ଅଥରିଟି, ଓଡ଼ିଶା ସରକାର, ଭାରତୀୟ ରେଳବାଇ, ଏନଏଚଏଆଇ ଓ କନକର୍ ଭଳି ସଂସ୍ଥା ଦ୍ୱାରା କାର୍ଯ୍ୟକରାଯାଉଛି।

ଏହି ପ୍ରକଳ୍ପଗୁଡ଼ିକ ମାଧ୍ୟମରେ ପ୍ରତିବର୍ଷ ପ୍ରାୟ ୮୩ ମିଲିୟନ୍ ଟନ୍ କାର୍ଗୋ ପରିଚାଳନା କ୍ଷମତା ବୃଦ୍ଧି ପାଇବ, ଯାହା ଓଡ଼ିଶାକୁ ଦେଶର ଏକ ପ୍ରମୁଖ ଲଜିଷ୍ଟିକ୍ସ ଓ ସାମୁଦ୍ରିକ ହବ୍ରେ ପରିଣତ କରିବ।

କେନ୍ଦ୍ରୀୟ ଅର୍ଥ ସହାୟତା ପାଉଥିବା ୬ଟି ପ୍ରକଳ୍ପ ମଧ୍ୟରେ ଭଦ୍ରକର କଣିନାଳୀରୁ କେନ୍ଦ୍ରାପଡ଼ାର ତାଳଚୁଆ ଏବଂ ଖୋର୍ଦ୍ଧାର ବାଲୁଗାଁରୁ ପୁରୀର କୃଷ୍ଣପ୍ରସାଦ ଗଡ଼ା ପର୍ଯ୍ୟନ୍ତ ରୋ-ପ୍ୟାକ୍ସ ଜେଟି, ପାରାଦୀପ ମତ୍ସ୍ୟ ବନ୍ଦରର ଆଧୁନିକୀକରଣ, ବାଲେଶ୍ୱରର ଚାନ୍ଦିପୁରରେ ନୂତନ ମତ୍ସ୍ୟ ବନ୍ଦର ଏବଂ ଡିଡିୟୁ-ଜିକେୱାଇ ଅଧୀନରେ ଦୁଇଟି କୌଶଳ ବିକାଶ ପ୍ରକଳ୍ପ ସାମିଲ ଅଛି। ଏଥିରୁ ୫ଟି ପ୍ରକଳ୍ପ ୨୦୨୬ ଶେଷ ସୁଦ୍ଧା ସମ୍ପୂର୍ଣ୍ଣ ହେବାର ଲକ୍ଷ୍ୟ ରହିଛି।

ପାରାଦୀପ, ଧାମରା, ଗୋପାଳପୁର, ଅସ୍ତରଙ୍ଗ ଏବଂ ସୁବର୍ଣ୍ଣରେଖା ବନ୍ଦରକୁ କେନ୍ଦ୍ର କରି ରେଳ, ସଡ଼କ, ଲଜିଷ୍ଟିକ୍ସ ଏବଂ ବନ୍ଦର ଭିତ୍ତିଭୂମିର ଉନ୍ନତି କରାଯାଉଛି। ହରିଦାସପୁର-ପାରାଦୀପ ରେଳ ଲିଙ୍କ, ଅନୁଗୁଳ-ସୁକିନ୍ଦା ରେଳ ଲାଇନ୍, ପାରାଦୀପ ମଲ୍ଟି-ମୋଡାଲ୍ ଲଜିଷ୍ଟିକ୍ସ ପାର୍କ ଏବଂ ଡୁବୁରୀ-ପାଣିକୋଇଲି ସଡ଼କ ପ୍ରକଳ୍ପ ପୂର୍ବରୁ ସମ୍ପୂର୍ଣ୍ଣ ହୋଇସାରିଛି।

ଏହା ସହିତ ପାରାଦୀପରେ ୭,୬୦୦ କୋଟି ଟଙ୍କାର ସ୍ମାର୍ଟ ଇଣ୍ଡଷ୍ଟ୍ରିଆଲ୍ ପୋର୍ଟ ସିଟି, ପାରାଦୀପ ପୋର୍ଟର ଇନର୍ ହାର୍ବର ବିସ୍ତାର ପାଇଁ ୩,୦୦୫ କୋଟି ଟଙ୍କା, ଭଦ୍ରକ-ବିଜୟନଗରମ ତୃତୀୟ ରେଳ ଲାଇନ୍ ପାଇଁ ୪,୬୯୫ କୋଟି ଟଙ୍କା ଏବଂ ଡୁବୁରୀ-ଚାଣ୍ଡିଖୋଲ-ପାରାଦୀପ ରାଜପଥ ପାଇଁ ୩,୭୪୭ କୋଟି ଟଙ୍କାର ପ୍ରକଳ୍ପ ଚାଲିଛି।

ଏହାଛଡ଼ା, କେନ୍ଦ୍ରୀୟ ବଜେଟ୍ ୨୦୨୬-୨୭ରେ ଘୋଷିତ ନ୍ୟାସନାଲ୍ ୱାଟରୱେ-୫ ପ୍ରକଳ୍ପକୁ ଅନୁମୋଦନ ମିଳିବା ଅପେକ୍ଷାରେ ରହିଛି। ଏହା କାର୍ଯ୍ୟକରୀ ହେଲେ ତାଳଚେର ଓ ଅନୁଗୁଳର ଖଣିଜ ସମୃଦ୍ଧ ଅଞ୍ଚଳକୁ କଳିଙ୍ଗନଗର, ପାରାଦୀପ ଏବଂ ଧାମରା ବନ୍ଦର ସହ ସଂଯୋଗ କରିବ।