ୟୁକ୍ରେନ୍‌ର କ୍ରିଭି ରିହ୍ ସହରରେ ରୁଷିଆର ଡ୍ରୋନ୍ ଆକ୍ରମଣରେ ଧ୍ୱଂସ ହୋଇଥିବା ଏକ ବଡ଼ ସପିଂ ସେଣ୍ଟରର ଧ୍ୱଂସାବଶେଷ ମଧ୍ୟରେ ଉଦ୍ଧାରକାରୀମାନେ ଏବେ ବି ଜୀବିତ ଲୋକଙ୍କୁ ଖୋଜୁଛନ୍ତି। ଶୁକ୍ରବାର ଘଟିଥିବା ଏହି ଆକ୍ରମଣରେ ୧୬ ଜଣଙ୍କ ମୃତ୍ୟୁ ହୋଇଥିବା ବେଳେ ୧୩୦ ଜଣ ଆହତ ହୋଇଛନ୍ତି। ଆଉ ୪ ଜଣ ନିଖୋଜ ଥିବା ଜଣାପଡ଼ିଛି।

ଦୁଇଟି ଡ୍ରୋନ୍ ଅଳ୍ପ ସମୟ ବ୍ୟବଧାନରେ ସପିଂ ସେଣ୍ଟରକୁ ଆକ୍ରମଣ କରିଥିଲା। ଦ୍ୱିତୀୟ ଡ୍ରୋନ୍‌ଟି ଉଦ୍ଧାରକାରୀ ଓ ଜରୁରୀକାଳୀନ କର୍ମଚାରୀଙ୍କୁ ଟାର୍ଗେଟ୍ କରିଥିବା ୟୁକ୍ରେନ୍ ପକ୍ଷରୁ କୁହାଯାଇଛି। ଏଭଳି ଲଗାତାର ଦୁଇଟି ଆକ୍ରମଣକୁ ‘ଡବଲ୍-ଟ୍ୟାପ୍ ଷ୍ଟ୍ରାଇକ୍’ କୁହାଯାଏ।

ୟୁକ୍ରେନ୍ ରାଷ୍ଟ୍ରପତି ଭୋଲୋଦିମିର ଜେଲେନ୍‌ସ୍କି ଏହି ଆକ୍ରମଣକୁ ‘ନିନ୍ଦନୀୟ’ ଓ ‘ନିଷ୍ଠୁର’ ବୋଲି କହିଛନ୍ତି। ତାଙ୍କ ଜନ୍ମସ୍ଥାନ କ୍ରିଭି ରିହ୍‌ରେ ଏହି ଆକ୍ରମଣ ହୋଇଛି।

ଡ୍ନିପ୍ରୋପେଟ୍ରୋଭସ୍କ ଅଞ୍ଚଳର ମୁଖ୍ୟ ଓଲେକ୍ସାଣ୍ଡର ହାନ୍‌ଝାଙ୍କ କହିବା ଅନୁସାରେ, ଶୁକ୍ରବାର ରାତିରେ ଧ୍ୱଂସାବଶେଷରୁ ଆଉ ଜଣଙ୍କ ମୃତଦେହ ମିଳିବା ପରେ ମୃତ୍ୟୁସଂଖ୍ୟା ୧୬ରେ ପହଞ୍ଚିଛି। ବିପର୍ଯ୍ୟୟର ବ୍ୟାପକତା ଏବଂ ଆହୁରି ରୁଷିଆ ଆକ୍ରମଣର ଆଶଙ୍କା ଯୋଗୁଁ ଉଦ୍ଧାର କାର୍ଯ୍ୟ ଆଉ ଦୁଇ ଦିନ ପର୍ଯ୍ୟନ୍ତ ଚାଲିପାରେ।

ଉଦ୍ଧାର କାର୍ଯ୍ୟରେ ସହାୟତା ପାଇଁ ୟୁକ୍ରେନ୍‌ର ଅନ୍ୟ ୭ଟି ଅଞ୍ଚଳରୁ ଉଦ୍ଧାରକାରୀ ଦଳକୁ ତୁରନ୍ତ ଘଟଣାସ୍ଥଳକୁ ପଠାଯାଇଥିଲା। ପ୍ରାୟ ୯,୦୦୦ ବର୍ଗମିଟର ଅଞ୍ଚଳରେ ବ୍ୟାପିଥିବା ଭୟାବହ ନିଆଁ ବର୍ତ୍ତମାନ ନିୟନ୍ତ୍ରଣକୁ ଆସିଛି।

ଶନିବାର ପରବର୍ତ୍ତୀ ଏକ ଅପଡେଟ୍‌ରେ ହାନ୍‌ଝା କହିଛନ୍ତି ଯେ, ୫୨ ଜଣ ଆହତ, ଯେଉଁମାନଙ୍କ ମଧ୍ୟରେ ୧୪ ଜଣ ଶିଶୁ ଅଛନ୍ତି, ଏବେ ବି ସହରର ବିଭିନ୍ନ ହସ୍ପିଟାଲରେ ଚିକିତ୍ସିତ ହେଉଛନ୍ତି। କ୍ରିଭି ରିହ୍‌ର ସାମରିକ ମୁଖ୍ୟ ଓଲେକ୍ସାଣ୍ଡର ଭିଲ୍‌କୁଲ୍‌ଙ୍କ ଅନୁସାରେ, ଅନେକ ଆହତଙ୍କର ଅସ୍ତ୍ରୋପଚାର ହୋଇସାରିଛି।

ଏହି ଘଟଣାକୁ ନେଇ ଡ୍ନିପ୍ରୋପେଟ୍ରୋଭସ୍କ ଅଞ୍ଚଳରେ ଶୋକ ଦିବସ ପାଳନ କରାଯାଉଛି।

ବିବିସି ଯାଞ୍ଚ କରିଥିବା ଭିଡିଓରେ ଜଳୁଥିବା ସପିଂ ସେଣ୍ଟର ଉପରେ ଦ୍ୱିତୀୟ ଡ୍ରୋନ୍ ଆକ୍ରମଣ କରୁଥିବା ଦେଖାଯାଇଛି। ରୁଷିଆର ସେନା ଏହି ଘଟଣା ଉପରେ ଏପର୍ଯ୍ୟନ୍ତ କୌଣସି ମତ ଦେଇନାହିଁ।

ଏହି ଆକ୍ରମଣର ଗୋଟିଏ ଦିନ ପୂର୍ବରୁ ୟୁକ୍ରେନ୍‌ର ରାଜଧାନୀ କିଭ୍‌ରେ ରୁଷିଆର ବଡ଼ ମିସାଇଲ୍ ଓ ଡ୍ରୋନ୍ ଆକ୍ରମଣରେ ୧୭ ଜଣଙ୍କ ମୃତ୍ୟୁ ଓ ୪୦ରୁ ଅଧିକ ଲୋକ ଆହତ ହୋଇଥିଲେ।

ଜେଲେନ୍‌ସ୍କି କହିଛନ୍ତି ଯେ, ୟୁକ୍ରେନ୍‌ର ବିଭିନ୍ନ ସ୍ଥାନରେ ରାତିସାରା ମିସାଇଲ୍ ଓ ଡ୍ରୋନ୍ ଆକ୍ରମଣ ହୋଇଛି। ଆବାସିକ କୋଠା ଓ ସାଧାରଣ ଲୋକଙ୍କ ଭିତ୍ତିଭୂମି ମଧ୍ୟ କ୍ଷତିଗ୍ରସ୍ତ ହୋଇଛି। କିଭ୍‌ରେ ବାଲିଷ୍ଟିକ୍ ମିସାଇଲ୍ ଆକ୍ରମଣରେ ରେଳ ଭିତ୍ତିଭୂମି କ୍ଷତିଗ୍ରସ୍ତ ହୋଇ ଜଣେ ମୃତ ଓ ଜଣେ ଆହତ ହୋଇଛନ୍ତି। ଜାପୋରିଝିଆରେ ଏକ ସହରୀ ବସ୍‌ ଉପରେ ଡ୍ରୋନ୍ ଆକ୍ରମଣରେ ୩ ଜଣ ଆହତ ହୋଇଛନ୍ତି।

ୟୁକ୍ରେନ୍‌ର ଜରୁରୀକାଳୀନ ସେବା ଅନୁସାରେ, କିଭ୍‌ ଅଞ୍ଚଳରେ ଆଉ ଏକ ରୁଷିଆ ଆକ୍ରମଣରେ ୨ ଜଣଙ୍କ ମୃତ୍ୟୁ ହୋଇଛି।

ଅନ୍ୟପଟେ, ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ରାତିରେ ମୋଟ ୪୫୭ଟି ୟୁକ୍ରେନୀୟ ଡ୍ରୋନ୍ ଧ୍ୱଂସ କରାଯାଇଛି। ରୁଷିଆର ଦକ୍ଷିଣ କ୍ରାସ୍ନୋଦାର ଅଞ୍ଚଳର ଏକ ବନ୍ଦର ସହରରେ ଡ୍ରୋନ୍ ଆକ୍ରମଣରେ ୨ ଜଣ ଶିଶୁଙ୍କ ମୃତ୍ୟୁ ଏବଂ ୨ ଜଣ ବୟସ୍କ ଆହତ ହୋଇଥିବା ରାଜ୍ୟପାଳ କହିଛନ୍ତି।

ପଶ୍ଚିମ ବେଲଗୋରୋଡ୍ ଅଞ୍ଚଳରେ ୟୁକ୍ରେନ୍‌ର ଆକାଶମାର୍ଗ ଆକ୍ରମଣ ଓ ଗୋଳାବର୍ଷଣରେ ୨ ଜଣଙ୍କ ମୃତ୍ୟୁ ଏବଂ ୧୩ ଜଣ ଆହତ ହୋଇଥିବା ରୁଷିଆ ପକ୍ଷରୁ କୁହାଯାଇଛି।

ୟୁକ୍ରେନ୍‌ର ସେନା ଦାବି କରିଛି ଯେ ରାତିରେ ରୁଷିଆର ସାମାରା ଅଞ୍ଚଳର ଏକ ତୈଳ ବିଶୋଧନାଗାର ଉପରେ ଆକ୍ରମଣ କରାଯାଇଥିଲା, ଯାହା ପରେ ସେଠାରେ ନିଆଁ ଲାଗିଥିଲା। ରୁଷିଆର ଦ୍ୱିତୀୟ ବୃହତ୍ତମ ଅନଲାଇନ୍ ରିଟେଲର୍ Ozon ମଧ୍ୟ ଏହି ଅଞ୍ଚଳରେ ଥିବା ତାହାର ଏକ ଗୋଦାମ ପ୍ରଥମ ଥର ପାଇଁ ଆକ୍ରମଣରେ କ୍ଷତିଗ୍ରସ୍ତ ହୋଇଥିବା କହିଛି।

୨୦୨୨ ଫେବ୍ରୁଆରୀରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ୍ ୟୁକ୍ରେନ୍ ବିରୋଧରେ ପୂର୍ଣ୍ଣାଙ୍ଗ ଯୁଦ୍ଧ ଆରମ୍ଭ କରିଥିଲେ। ବର୍ତ୍ତମାନ ରୁଷିଆ ୟୁକ୍ରେନ୍‌ର ଦକ୍ଷିଣ-ପୂର୍ବ ଅଞ୍ଚଳର ପ୍ରାୟ ଏକ-ପଞ୍ଚମାଂଶ ଭୂଭାଗ ନିୟନ୍ତ୍ରଣରେ ରଖିଛି।