ରାୟଗଡ଼ା: ଗଣେଶ ପୂଜାକୁ ନେଇ ରାୟଗଡ଼ା ସହର ଏବେ ଚଳଚଞ୍ଚଳ। ପୂଜା ପୂର୍ବରୁ ଗଜପତି ଛକରେ ବିଭିନ୍ନ ଡିଜାଇନ୍‌ର ଗଣେଶ ମୂର୍ତ୍ତି ବିକ୍ରି ହେଉଥିବା ବେଳେ ଏହାକୁ କିଣିବା ପାଇଁ ଗ୍ରାହକଙ୍କ ଭିଡ଼ ଜମୁଛି।

ବିଶେଷକରି ଆନ୍ଧ୍ରପ୍ରଦେଶର ଆନକାପାଲ୍ଲିରୁ ଆସିଥିବା ପ୍ଲାଷ୍ଟର ଅଫ୍ ପ୍ୟାରିସ୍‌ (POP) ଗଣେଶ ମୂର୍ତ୍ତି ଲୋକଙ୍କ ଆକର୍ଷଣର କେନ୍ଦ୍ର ପାଲଟିଛି। ମୂର୍ତ୍ତିଗୁଡ଼ିକର ଡିଜାଇନ୍‌ ଓ ଗଠନଶୈଳୀ ଭିନ୍ନ ଭିନ୍ନ ରହିଛି। କେଉଁଠି ଗଣେଶଙ୍କୁ ନୃତ୍ୟରତ ଅବସ୍ଥାରେ ଦେଖିବାକୁ ମିଳୁଛି, ତ ଆଉ କେଉଁଠି ମହାଦେବ ଶିବ ଓ ମାତା ପାର୍ବତୀଙ୍କ ସହ ଗଣପତିଙ୍କୁ ଦେଖାଯାଇଛି।

କେତେକ ମୂର୍ତ୍ତିରେ ଗଣେଶଙ୍କୁ ଶିବଙ୍କ କୋଳରେ ବସିଥିବା ଦେଖାଯାଉଛି। ଆଉ କେତେକ ମୂର୍ତ୍ତିରେ ସୁନ୍ଦର ପଗଡ଼ି ପିନ୍ଧି ବଡ଼ ସିଂହାସନରେ ବିରାଜମାନ ଅଛନ୍ତି ଅଗ୍ରପୂଜ୍ୟ ଗଣପତି। ଏହି ଆକର୍ଷଣୀୟ ମୂର୍ତ୍ତିଗୁଡ଼ିକୁ ଦେଖି ରାସ୍ତାରେ ଯାଉଥିବା ଲୋକେ ମଧ୍ୟ ଅଟକି ଯାଉଥିବା ଦେଖାଯାଉଛି।

ମୂର୍ତ୍ତି କିଣିବା ପାଇଁ ବିଭିନ୍ନ ସ୍କୁଲ୍‌ର ଛାତ୍ରଛାତ୍ରୀ, ଶିକ୍ଷକ-ଶିକ୍ଷୟିତ୍ରୀଙ୍କ ସମେତ ବିଭିନ୍ନ ପୂଜା ମଣ୍ଡପର ଆୟୋଜକମାନେ ଆସୁଛନ୍ତି। ବ୍ୟବସାୟୀଙ୍କ କହିବା ଅନୁସାରେ, ପ୍ରାୟ ୪୨ ବର୍ଷ ଧରି ରାୟଗଡ଼ାର ଗଜପତି ଛକରେ ଏଭଳି POP ଗଣେଶ ମୂର୍ତ୍ତି ବିକ୍ରି ହୋଇଆସୁଛି।

ଏଠାରେ ୬ ଇଞ୍ଚରୁ ଆରମ୍ଭ କରି ୧୦ ଫୁଟ୍‌ ପର୍ଯ୍ୟନ୍ତ ବିଭିନ୍ନ ଆକାରର ମୂର୍ତ୍ତି ଉପଲବ୍ଧ ରହିଛି। ମୂର୍ତ୍ତିର ଆକାର, ଡିଜାଇନ୍‌ ଓ ଗଠନ ଅନୁଯାୟୀ ଦାମ ମଧ୍ୟ ଭିନ୍ନ ରହିଛି। ୫୦ ଟଙ୍କାରୁ ଆରମ୍ଭ କରି ପ୍ରାୟ ୨୫ ହଜାର ଟଙ୍କା ପର୍ଯ୍ୟନ୍ତ ମୂର୍ତ୍ତି ମିଳୁଥିବା ବ୍ୟବସାୟୀମାନେ କହିଛନ୍ତି।

କେବଳ ରାୟଗଡ଼ା ଜିଲ୍ଲା ନୁହେଁ, ପଡ଼ୋଶୀ କୋରାପୁଟ ଓ କଳାହାଣ୍ଡି ଜିଲ୍ଲାରୁ ମଧ୍ୟ ଲୋକେ ରାୟଗଡ଼ା ଆସି ଏହି ମୂର୍ତ୍ତି କିଣି ନେଉଥିବା ବ୍ୟବସାୟୀମାନେ କହିଛନ୍ତି।

ଗଣେଶ ପୂଜା ପାଖେଇ ଆସିବା ସହ ମୂର୍ତ୍ତି ବଜାରରେ ଆହୁରି ଭିଡ଼ ବଢ଼ିବା ଆଶା କରାଯାଉଛି। 🙏🐘