ବିଶ୍ୱ ରୋଗୀ ସୁରକ୍ଷା ଦିବସ ଅବସରରେ ରାୟଗଡ଼ା ଜିଲ୍ଲାର ଅମ୍ବାଦଳା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର (PHC)ରେ ସ୍ୱାସ୍ଥ୍ୟସେବା ଓ ରୋଗୀ ସୁରକ୍ଷାକୁ ନେଇ ଅନେକ ସମସ୍ୟା ସାମ୍ନାକୁ ଆସିଛି। ଏଠାରେ ମାତ୍ର ଜଣେ ଡାକ୍ତର ରୋଗୀଙ୍କ ଚିକିତ୍ସା ଦାୟିତ୍ୱ ସମ୍ଭାଳୁଥିବା ସୂଚନା ମିଳିଛି।

ସୂଚନା ଅନୁଯାୟୀ, ଉକ୍ତ ଡାକ୍ତର ଗତ ପ୍ରାୟ ଦୁଇ ବର୍ଷ ଧରି ଡେପୁଟେସନରେ କାର୍ଯ୍ୟ କରୁଛନ୍ତି। ପ୍ରତିଦିନ ପ୍ରାୟ ୧୫୦ରୁ ୨୦୦ ରୋଗୀ PHCକୁ ଆସୁଥିବା ବେଳେ ଜଣେ ଡାକ୍ତରଙ୍କ ଉପରେ ସମଗ୍ର ରୋଗୀଙ୍କ ଚିକିତ୍ସା ଦାୟିତ୍ୱ ରହିଛି।

ଅମ୍ବାଦଳା PHCରେ ଆବଶ୍ୟକ ଆଧୁନିକ ଚିକିତ୍ସା ଉପକରଣର ମଧ୍ୟ ଅଭାବ ଥିବା ଅଭିଯୋଗ ହୋଇଛି। ଫଳରେ ଜଟିଳ କିମ୍ବା ବିଶେଷଜ୍ଞ ଚିକିତ୍ସା ଆବଶ୍ୟକ କରୁଥିବା ରୋଗୀଙ୍କୁ ଅନ୍ୟ ହସ୍ପିଟାଲକୁ ରେଫର କରାଯାଉଛି। କିନ୍ତୁ ରେଫର ହୋଇଥିବା ରୋଗୀଙ୍କୁ ଅନ୍ୟ ହସ୍ପିଟାଲକୁ ନେବା ପାଇଁ ଆମ୍ବୁଲାନ୍ସର ଅଭାବ ମଧ୍ୟ ସମସ୍ୟା ସୃଷ୍ଟି କରୁଛି।

ସ୍ଥାନୀୟ ବାସିନ୍ଦାଙ୍କ ଅନୁଯାୟୀ, ୮ଟି ଗ୍ରାମ ପଞ୍ଚାୟତର ଲୋକଙ୍କ ସ୍ୱାସ୍ଥ୍ୟସେବା ପାଇଁ ମାତ୍ର ଗୋଟିଏ ଆମ୍ବୁଲାନ୍ସ ଉପଲବ୍ଧ ରହିଛି। ଜରୁରୀ ସମୟରେ ରୋଗୀଙ୍କୁ ଅନ୍ୟ ଚିକିତ୍ସାକେନ୍ଦ୍ରକୁ ସ୍ଥାନାନ୍ତର କରିବାରେ ଏହା ଅସୁବିଧା ସୃଷ୍ଟି କରୁଥିବା ସ୍ଥାନୀୟ ଲୋକେ କହିଛନ୍ତି।

ରୋଗୀ ମଦନ ନାଗ କହିଛନ୍ତି ଯେ, ସେ ପ୍ରାୟ ୩୦ରୁ ୩୫ କିଲୋମିଟର ଦୂରରୁ ଡାକ୍ତରଙ୍କୁ ଦେଖାଇବାକୁ ଆସିଥିଲେ। ଏଠାରେ ଜଣେ ମାତ୍ର ଡାକ୍ତର ଥିବାରୁ ଏବଂ ଡାକ୍ତର ଛୁଟିରେ ରହିଲେ ଲୋକଙ୍କୁ ଅଧିକ ସମସ୍ୟା ହେଉଥିବା ସେ କହିଛନ୍ତି।

PHCରେ ନିଯୁକ୍ତ ଡାକ୍ତର ସୁଧାଂଶୁ ବୈଦ କହିଛନ୍ତି ଯେ, ସେ ଜୁନ୍ ୨୦୨୩ରେ ମୁନିଗୁଡ଼ା PHCରେ ଯୋଗ ଦେଇଥିଲେ। ସେଠାରେ ପ୍ରାୟ ଦେଢ଼ ବର୍ଷ କାମ କରିବା ପରେ ଅମ୍ବାଦଳାକୁ ଡେପୁଟେସନରେ ଆସିଛନ୍ତି। ପ୍ରତିଦିନ ୧୨୦ରୁ ଅଧିକ ରୋଗୀ ଆସୁଥିବା ବେଳେ ସୋମବାର ଦିନ ଏହି ସଂଖ୍ୟା ୨୦୦ରୁ ଅଧିକ ହୋଇଯାଏ। ଏତେ ସଂଖ୍ୟକ ରୋଗୀଙ୍କୁ ଏକାକୀ ଦେଖିବା କଷ୍ଟକର ବୋଲି ସେ କହିଛନ୍ତି।

ଅମ୍ବାଦଳା PHC ଉପରେ ନିର୍ଭର କରୁଥିବା ଲୋକମାନେ ଅଧିକ ଡାକ୍ତର, ଆବଶ୍ୟକ ଚିକିତ୍ସା ଉପକରଣ ଏବଂ ପର୍ଯ୍ୟାପ୍ତ ଆମ୍ବୁଲାନ୍ସ ବ୍ୟବସ୍ଥା ଦାବି କରିଛନ୍ତି।

ଦୁର୍ଗମ ଅଞ୍ଚଳରେ ସହଜରେ ସ୍ୱାସ୍ଥ୍ୟସେବା ପହଞ୍ଚାଇବା, ଆବଶ୍ୟକ ମାନବସମ୍ବଳ ଯୋଗାଇବା ଏବଂ ଜରୁରୀ ରୋଗୀ ପରିବହନ ବ୍ୟବସ୍ଥା ସୁଦୃଢ଼ କରିବା ନେଇ ଏହି ଘଟଣା ପୁଣିଥରେ ପ୍ରଶ୍ନ ଉଠାଇଛି।