ରାଜସ୍ଥାନର ଦୌସା ଜିଲ୍ଲାର ଜୟପୁର-ବାନ୍ଦିକୁଇ ଏକ୍ସପ୍ରେସୱେରେ ବୁଧବାର ଭୋର ସମୟରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଋଷିକେଶରୁ ଇନ୍ଦୋର ଅଭିମୁଖେ ଯାଉଥିବା ଏକ ଯାତ୍ରୀବାହୀ ବସ୍ ଅନ୍ୟ ଏକ ଯାନ ସହ ଧକ୍କା ହେବା ପରେ ବସ୍‌ରେ ହଠାତ୍ ନିଆଁ ଲାଗିଯାଇଥିଲା।

ଦୌସା ଜିଲ୍ଲା ପ୍ରଶାସନର ସୂଚନା ଅନୁସାରେ, ଏହି ଦୁର୍ଘଟଣା ଭୋର ପ୍ରାୟ ୩.୧୫ରୁ ୩.୩୦ ମଧ୍ୟରେ ଘଟିଥିଲା। ନିଆଁ ବ୍ୟାପିବା ପୂର୍ବରୁ ପ୍ରାୟ ୨୪ରୁ ୨୫ ଜଣ ଯାତ୍ରୀ ବସ୍‌ରୁ ବାହାରି ଆସିବାରେ ସଫଳ ହୋଇଥିଲେ। ସେମାନଙ୍କୁ ଉଦ୍ଧାର କରାଯାଇଛି ଏବଂ ସେମାନେ ସୁରକ୍ଷିତ ଥିବା କୁହାଯାଇଛି।

ଦୌସା (ଏସ୍‌ଟି) ଲୋକସଭା ସାଂସଦ ମୁରାରୀ ଲାଲ୍ ମୀଣା କହିଛନ୍ତି ଯେ ଘଟଣାସ୍ଥଳରୁ ଏପର୍ଯ୍ୟନ୍ତ ୮ଟି ସମ୍ପୂର୍ଣ୍ଣ ପୋଡ଼ିଯାଇଥିବା ମୃତଦେହ ଉଦ୍ଧାର କରାଯାଇଛି। ସେହିପରି ୧୧ ଜଣ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।

ଜିଲ୍ଲାପାଳ ଡ଼ା. ସୌମ୍ୟା ଝା କହିଛନ୍ତି, ଦୁର୍ଘଟଣା ପରେ ବସ୍‌ରେ ନିଆଁ ଲାଗିଥିଲା। ଘଟଣାସ୍ଥଳରେ ପ୍ରଥମେ ଦୁଇ ଜଣଙ୍କ ମୃତ୍ୟୁ ନିଶ୍ଚିତ ହୋଇଥିଲା। ପରେ ନିଆଁକୁ ନିୟନ୍ତ୍ରଣକୁ ଆଣିବା ପରେ ଉଦ୍ଧାରକାରୀ ଦଳ କିଛି ପୋଡ଼ିଯାଇଥିବା ମାନବ ଅବଶେଷ ଉଦ୍ଧାର କରିଥିଲେ, ଯାହାକୁ ପରିଚୟ ପାଇଁ ହସ୍ପିଟାଲକୁ ପଠାଯାଇଛି।

ପ୍ରଶାସନ କହିଛି ଯେ ମୃତକଙ୍କ ସଠିକ୍ ସଂଖ୍ୟା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ପ୍ରାଥମିକ ଭାବେ ୭ରୁ ୮ ଜଣଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି। ଉଦ୍ଧାର ଓ ତଦନ୍ତ କାର୍ଯ୍ୟ ଜାରି ରହିଥିବାରୁ ମୃତାହତଙ୍କ ସଂଖ୍ୟାରେ ପରିବର୍ତ୍ତନ ହୋଇପାରେ।