ନୂଆଦିଲ୍ଲୀ: ଦେଶର ସୁରକ୍ଷା ପାଇଁ ସାହସ, ବୀରତ୍ୱ ଓ ତ୍ୟାଗ ପ୍ରଦର୍ଶନ କରିଥିବା ସୈନିକ ଏବଂ ସେମାନଙ୍କ ପରିବାର ପାଇଁ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏକ ନୂଆ ପଦକ୍ଷେପ ନିଆଯାଇଛି। ବୀରତା ପାଇଁ ସେନା ପଦକ, ନୌସେନା ପଦକ ଓ ବାୟୁସେନା ପଦକ ପାଇଥିବା ଯବାନଙ୍କୁ ଭାରତୀୟ ରେଳରେ ଜୀବନବ୍ୟାପୀ ଯାତ୍ରା ରିହାତି ସୁବିଧା ଦିଆଯିବ।

ଏହି ସୁବିଧା ଯୋଗ୍ୟ ବୀରତା ପୁରସ୍କାର ବିଜେତାଙ୍କ ଜୀବନସାଥୀଙ୍କୁ ମଧ୍ୟ ମିଳିବ। ଜୀବନସାଥୀଙ୍କ ମୃତ୍ୟୁ ହେଲେ, ପୁନଃବିବାହ ନକରିବା ପର୍ଯ୍ୟନ୍ତ ଏହି ସୁବିଧା ଜାରି ରହିବ। ଏହାସହ ମରଣୋତ୍ତର ବୀରତା ପୁରସ୍କାର ପାଇଥିବା ଅବିବାହିତ ଯବାନଙ୍କ ପିତାମାତାଙ୍କୁ ମଧ୍ୟ ଏହି ସୁବିଧାରେ ସାମିଲ କରାଯାଇଛି।

କେଉଁ ଶ୍ରେଣୀରେ ମିଳିବ ରିହାତି?

ଯୋଗ୍ୟ ହିତାଧିକାରୀମାନେ ଭାରତୀୟ ରେଳର ପ୍ରଥମ ଶ୍ରେଣୀ, ଦ୍ୱିତୀୟ ଏସି ଓ ଏସି ଚେୟାର କାର୍‌ରେ ରିହାତି ସୁବିଧାରେ ଯାତ୍ରା କରିପାରିବେ।

ସୁବିଧା ପାଇବାର ପ୍ରକ୍ରିୟାକୁ ସରଳ କରିବା ପାଇଁ ସମଗ୍ର ବ୍ୟବସ୍ଥାକୁ ଡିଜିଟାଲ୍ ଓ କାଗଜବିହୀନ କରାଯାଇଛି।

ଅନଲାଇନ୍ ପଞ୍ଜୀକରଣ, ମିଳିବ ଇଲେକ୍ଟ୍ରୋନିକ୍ ପାସ୍

ଯୋଗ୍ୟ ହିତାଧିକାରୀଙ୍କୁ ଭାରତୀୟ ରେଳର ରିହାତି କାର୍ଡ ପୋର୍ଟାଲରେ ଅନଲାଇନ୍ ପଞ୍ଜୀକରଣ କରିବାକୁ ପଡ଼ିବ। ଆବଶ୍ୟକ ଯାଞ୍ଚ ଓ ପ୍ରମାଣୀକରଣ ପରେ ଯୋଗ୍ୟ ବ୍ୟକ୍ତିଙ୍କୁ ଅନଲାଇନ୍‌ରେ ଇଲେକ୍ଟ୍ରୋନିକ୍ ଯାତ୍ରା ପାସ୍ ଜାରି କରାଯିବ।

ଏହି ଇଲେକ୍ଟ୍ରୋନିକ୍ ପାସ୍ ଆଧାରରେ ଟିକେଟ୍ ବୁକିଂ ସୁବିଧା ୧ ନଭେମ୍ବର ୨୦୨୬ରୁ IRCTC ୱେବ୍ ପୋର୍ଟାଲ ମାଧ୍ୟମରେ ଆରମ୍ଭ ହେବ।

ବୀର ସୈନିକଙ୍କ ସେବାକୁ ସମ୍ମାନ

ପ୍ରତିରକ୍ଷା ମନ୍ତ୍ରଣାଳୟର ଏହି ପଦକ୍ଷେପ ବୀର ସୈନିକ ଓ ସେମାନଙ୍କ ପରିବାରର ସେବା ଏବଂ ବଳିଦାନକୁ ସମ୍ମାନ ଦେବା ସହ ରେଳ ଯାତ୍ରାର ରିହାତି ପ୍ରକ୍ରିୟାକୁ ଆହୁରି ସରଳ କରିବ ବୋଲି କୁହାଯାଇଛି।