ମୟୂରଭଞ୍ଜ ଜିଲ୍ଲାର ଉଦଳା ବନଖଣ୍ଡ ଅଧୀନରେ ଥିବା ସଂରକ୍ଷିତ ଜଙ୍ଗଲ ଅଞ୍ଚଳଗୁଡ଼ିକ ଏବେ ଆବର୍ଜନା ଫିଙ୍ଗିବା ସ୍ଥାନରେ ପରିଣତ ହେଉଥିବା ଅଭିଯୋଗ ଆସିଛି। ବେଆଇନ ଭାବେ ବିଭିନ୍ନ ପ୍ରକାରର ବର୍ଜ୍ୟବସ୍ତୁ ଫିଙ୍ଗାଯାଉଥିବାରୁ ପରିବେଶବିତ୍ ଓ ସ୍ଥାନୀୟ ବାସିନ୍ଦାମାନେ ଚିନ୍ତା ପ୍ରକାଶ କରିଛନ୍ତି।
ସୂଚନା ଅନୁଯାୟୀ, ଉଦଳା ବନଖଣ୍ଡ ଅଧୀନରେ ଥିବା ପାଞ୍ଚରୁ ଅଧିକ ସଂରକ୍ଷିତ ଜଙ୍ଗଲ ଅଞ୍ଚଳରେ ନିୟମ ଉଲ୍ଲଂଘନ କରି ଆବର୍ଜନା ଓ ଅନ୍ୟାନ୍ୟ ବର୍ଜ୍ୟ ପଦାର୍ଥ ପକାଯାଉଛି। ଫଳରେ ଜଙ୍ଗଲର ପ୍ରାକୃତିକ ସୌନ୍ଦର୍ଯ୍ୟ କ୍ଷତିଗ୍ରସ୍ତ ହେବା ସହ ବନ୍ୟଜନ୍ତୁଙ୍କ ବାସସ୍ଥାନ ଉପରେ ମଧ୍ୟ କୁପ୍ରଭାବ ପଡ଼ୁଛି।
ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ରାତି ସମୟରେ ଲୁଚିଛପି ବିଭିନ୍ନ ପ୍ରକାରର ଅଳିଆ, ମୃତ ପଶୁ, ମୃତ କୁକୁଡ଼ା ଓ କୁକୁଡ଼ା ପର ଭଳି ବର୍ଜ୍ୟବସ୍ତୁ ଜଙ୍ଗଲ ଭିତରେ ଫିଙ୍ଗାଯାଉଛି। ଏହା ଦ୍ୱାରା ପ୍ରଦୂଷଣ ବଢ଼ିବା ସହ ଜଙ୍ଗଲର ଜୈବ ବିବିଧତା ମଧ୍ୟ ବିପଦରେ ପଡ଼ୁଛି।
ପରିବେଶବିତ୍ ପ୍ରଦ୍ୟୁମ୍ନ ଦାଶ କହିଛନ୍ତି ଯେ, ସ୍ଥାନୀୟ ଲୋକେ ଜଙ୍ଗଲକୁ ନିଜର ସମ୍ପତ୍ତି ଭାବେ ନେଉନାହାନ୍ତି। ଅନ୍ୟପଟେ ବନ ବିଭାଗରେ କର୍ମଚାରୀ ଅଭାବ ଥିବାରୁ ସବୁ ସ୍ଥାନ ଉପରେ ନଜର ରଖିବା ସମ୍ଭବ ହେଉନାହିଁ।
ସେ କହିଛନ୍ତି, “କିଏ କେବେ ମୃତ କୁକୁଡ଼ା କିମ୍ବା ତାହାର ପର ଆଣି ଫିଙ୍ଗୁଛି, କିଏ ମୃତ ଗୋରୁ ଫିଙ୍ଗୁଛି ଓ କିଏ ଆବର୍ଜନା ପକାଉଛି, ତାହା ଜାଣିବା କଷ୍ଟକର। ଅଧିକାଂଶ ଲୋକ ରାତିରେ ଏଭଳି କାମ କରି ପଳାଇଯାଉଛନ୍ତି।”
ଏହି ଘଟଣାକୁ ନେଇ ସ୍ଥାନୀୟ ଲୋକେ ଜିଲ୍ଲା ପ୍ରଶାସନ ଓ ବନ ବିଭାଗର ହସ୍ତକ୍ଷେପ ଦାବି କରିଛନ୍ତି। ଜଙ୍ଗଲ ଅଞ୍ଚଳରେ ବର୍ଜ୍ୟବସ୍ତୁ ପକାଇବା ରୋକିବା, କଡ଼ା ନଜରଦାରୀ ବ୍ୟବସ୍ଥା ଏବଂ ପରିବେଶ ଆଇନର କଡ଼ା କାର୍ଯ୍ୟକାରିତା ପାଇଁ ଦାବି ଉଠିଛି।
ସ୍ଥାନୀୟ ବାସିନ୍ଦାଙ୍କ ମତରେ, ଯଦି ଶୀଘ୍ର ପଦକ୍ଷେପ ନିଆନଯାଏ, ତେବେ ଏହା ମୟୂରଭଞ୍ଜର ଜଙ୍ଗଲ ପରିବେଶ ଏବଂ ବନ୍ୟଜନ୍ତୁ ସମ୍ପଦ ପାଇଁ ଦୀର୍ଘମିଆଦି କ୍ଷତିର କାରଣ ହୋଇପାରେ।
ଝାଡ଼ଖଣ୍ଡର ଧନବାଦ ଜିଲ୍ଲାରୁ ଏକ ଚାଞ୍ଚଲ୍ୟକର ହତ୍ୟାକାଣ୍ଡ...
ମୌସୁମୀ ଅଧିବେଶନ ପୂର୍ବରୁ କେନ୍ଦ୍ର ମନ୍ତ୍ରୀମଣ୍ଡଳରେ ସମ୍ଭ...
ଲଦାଖର ଟାଙ୍ଗତ୍ସେ ଅଞ୍ଚଳରେ ଗତ ମେ ୨୦ ତାରିଖରେ ଘଟିଥିବା ଚ...
ଆଗାମୀ ବିଧାନସଭା ଓ ସାଧାରଣ ନିର୍ବାଚନ ପୂର୍ବରୁ କଂଗ୍ରେସ ଦ...
ଉତ୍ତରାଖଣ୍ଡର କର୍ଣ୍ଣପ୍ରୟାଗ ଓ ନାଗରାସୁ ଗୁରୁଦ୍ୱାରକୁ କେନ...
ରେଳବାଇରେ ସରକାରୀ ଚାକିରି କରିବାକୁ ଇଚ୍ଛୁକ ପ୍ରାର୍ଥୀଙ୍କ...
