ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସାର୍ବଜନୀନ ଜୀବନର ୨୫ ବର୍ଷ ପୂରଣ ଅବସରରେ କେନ୍ଦ୍ର କ୍ୟାବିନେଟ୍ ତାଙ୍କୁ ଅଭିନନ୍ଦନ ଜଣାଇ ଏକ ପ୍ରସ୍ତାବ ପାରିତ କରିଛି। ୨୦୦୧ ଅକ୍ଟୋବର ୭ରେ ମୋଦୀ ଗୁଜରାଟର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ। ୨୦୨୬ ଅକ୍ଟୋବର ୭ରେ ତାଙ୍କର ସାର୍ବଜନୀନ ପଦବୀରେ ୨୫ ବର୍ଷ ପୂରଣ ହେଉଛି।

ଏହା ପୂର୍ବରୁ ଜୁନ୍ ୧୦, ୨୦୨୬ରେ ମୋଦୀ ଭାରତର ସବୁଠାରୁ ଦୀର୍ଘ ସମୟ ଧରି କ୍ରମାଗତ ଭାବେ ଦାୟିତ୍ୱରେ ଥିବା ନିର୍ବାଚିତ ପ୍ରଧାନମନ୍ତ୍ରୀ ହୋଇଥିଲେ। ସେ ୪,୩୯୯ ଦିନର କ୍ରମାଗତ କାର୍ଯ୍ୟକାଳ ସହ ପୂର୍ବତନ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କ ୪,୩୯୮ ଦିନର ରେକର୍ଡକୁ ଅତିକ୍ରମ କରିଥିଲେ।

କ୍ୟାବିନେଟ୍‌ର ପ୍ରସ୍ତାବରେ ମୋଦୀଙ୍କ ‘ନେସନ୍ ଫର୍ଷ୍ଟ’ ଭାବନା, ଗରିବ ଓ ବଞ୍ଚିତ ବର୍ଗଙ୍କ କଲ୍ୟାଣ, ମହିଳା ସଶକ୍ତୀକରଣ, ଯୁବଶକ୍ତି, କୃଷକ କଲ୍ୟାଣ, ଜାତୀୟ ସୁରକ୍ଷା ଏବଂ ଭାରତକୁ ବିକଶିତ ଦେଶରେ ପରିଣତ କରିବାର ଲକ୍ଷ୍ୟକୁ ଉଲ୍ଲେଖ କରାଯାଇଛି। 

ପ୍ରସ୍ତାବରେ ଗରିବଙ୍କ ପାଇଁ ପକ୍କା ଘର, ବିଦ୍ୟୁତ, ପାନୀୟ ଜଳ ଓ ପ୍ରତ୍ୟକ୍ଷ ଲାଭ ହସ୍ତାନ୍ତର ଭଳି ଯୋଜନା ସହିତ ୮୦ କୋଟିରୁ ଅଧିକ ଲୋକଙ୍କୁ ମାଗଣା ରାସନ ଏବଂ ୬୦ କୋଟିରୁ ଅଧିକ ଗରିବଙ୍କୁ ମାଗଣା ଚିକିତ୍ସା ସୁବିଧା ଦିଆଯାଇଥିବା ଦାବିକୁ ମଧ୍ୟ ଉଲ୍ଲେଖ କରାଯାଇଛି। 

କ୍ୟାବିନେଟ୍ ମୋଦୀଙ୍କ ନେତୃତ୍ୱରେ ଭାରତର ଜାତୀୟ ସୁରକ୍ଷା, ଆତ୍ମନିର୍ଭରତା, ମାନୁଫାକ୍ଚରିଂ, ଷ୍ଟାର୍ଟଅପ୍, ମହାକାଶ ବିଜ୍ଞାନ ଏବଂ ବିଶ୍ୱସ୍ତରରେ ଭାରତର ଭୂମିକାକୁ ମଧ୍ୟ ପ୍ରଶଂସା କରିଛି। ପ୍ରସ୍ତାବର ଶେଷରେ ପ୍ରଧାନମନ୍ତ୍ରୀଙ୍କ ଉତ୍ତମ ସ୍ୱାସ୍ଥ୍ୟ ଓ ଦୀର୍ଘାୟୁ କାମନା କରାଯାଇଛି।