୨୦୩୬ ଅଲିମ୍ପିକ୍ସ ଆୟୋଜନ କରିବା ପାଇଁ ଭାରତର ଦାବି ଏବେ ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ପହଞ୍ଚିଛି। ଅନ୍ତର୍ଜାତୀୟ ଅଲିମ୍ପିକ୍ କମିଟି (IOC) ଅନୁସାରେ ଭାରତ ସମେତ ମୋଟ ୭ଟି ଦେଶ ୨୦୩୬ ଗ୍ରୀଷ୍ମକାଳୀନ ଅଲିମ୍ପିକ୍ସ ଆୟୋଜନ ପାଇଁ ପ୍ରାରମ୍ଭିକ ଆଲୋଚନାରେ ଅଛନ୍ତି। ଏହି ତାଲିକାରେ ଭାରତ ସହ ଜର୍ମାନୀ, କତାର, ହଙ୍ଗେରୀ, ତୁର୍କୀ, ଦକ୍ଷିଣ ଆଫ୍ରିକା ଓ ଦକ୍ଷିଣ କୋରିଆ ରହିଛନ୍ତି।

ଭାରତ ପ୍ରଥମ ଥର ପାଇଁ ଅଲିମ୍ପିକ୍ସ ଆୟୋଜନ କରିବାର ଲକ୍ଷ୍ୟ ନେଇ ଆଗକୁ ବଢ଼ୁଛି। ଭାରତର ୨୦୩୬ ଅଲିମ୍ପିକ୍ସ ପ୍ରସ୍ତାବର କେନ୍ଦ୍ରବିନ୍ଦୁ ଭାବେ ଅହମଦାବାଦକୁ ରଖାଯାଇଛି। ଅହମଦାବାଦ ୨୦୩୦ କମନ୍‌ୱେଲ୍ଥ ଗେମ୍ସ ଆୟୋଜନ କରିବାକୁ ମଧ୍ୟ ଯାଉଛି। 

IOCର ନୂଆ ଚୟନ ପ୍ରକ୍ରିୟା ଅନୁସାରେ ୨୦୨୭ ମାର୍ଚ୍ଚରେ ଆଗ୍ରହୀ ଦେଶଗୁଡ଼ିକର ପ୍ରାରମ୍ଭିକ ସର୍ଟଲିଷ୍ଟ ପ୍ରସ୍ତୁତ ହେବ। ଏହା ପରେ ଚୟନ ହୋଇଥିବା ପ୍ରାର୍ଥୀମାନେ Strategic Dialogue ପର୍ଯ୍ୟାୟକୁ ଯିବେ। ୨୦୨୮ରେ Targeted Dialogue ଆରମ୍ଭ ହେବ ଏବଂ ୨୦୨୯ ମଧ୍ୟଭାଗରେ ଚୂଡ଼ାନ୍ତ ଆୟୋଜକ ଚୟନ କରାଯିବ। 

IOC ଅନୁସାରେ ସମ୍ଭାବ୍ୟ ଆୟୋଜକମାନଙ୍କର ଭେନ୍ୟୁ, ଆଥଲେଟ୍‌ମାନଙ୍କ ପାଇଁ ସୁବିଧା, ଆର୍ଥିକ କ୍ଷମତା, ଭିତ୍ତିଭୂମି, ସରକାରୀ ସମର୍ଥନ ଓ ଦୀର୍ଘକାଳୀନ legacy ଭଳି ବିଷୟ ଉପରେ ମୂଲ୍ୟାଙ୍କନ କରାଯିବ। IOC ଅଧ୍ୟକ୍ଷ କର୍ଷ୍ଟି କୋଭେଣ୍ଟ୍ରି କହିଛନ୍ତି ଯେ ଯେଉଁଠାରେ ଅଲିମ୍ପିକ୍ସ ଆୟୋଜିତ ହେଉ, ଆଥଲେଟ୍‌ମାନଙ୍କୁ ସବୁବେଳେ କେନ୍ଦ୍ରରେ ରଖିବା ଆବଶ୍ୟକ। 

ବର୍ତ୍ତମାନ ୨୦୨୮ ଅଲିମ୍ପିକ୍ସ ଲସ୍ ଆଞ୍ଜେଲସ୍‌ରେ ଏବଂ ୨୦୩୨ ଅଲିମ୍ପିକ୍ସ ବ୍ରିସବେନ୍‌ରେ ହେବା ନିର୍ଦ୍ଧାରିତ ହୋଇଛି। ୨୦୩୬ ପାଇଁ ଅନ୍ୟ ଦେଶ ଅକ୍ଟୋବର ୩୧, ୨୦୨୬ ପର୍ଯ୍ୟନ୍ତ ନିଜ ଆଗ୍ରହ ପ୍ରକାଶ କରିପାରିବେ।