ପାକିସ୍ତାନରେ ଆର୍ଥିକ ସଙ୍କଟ ମଧ୍ୟରେ ଏବେ ଖାଦ୍ୟ ସଙ୍କଟ ଆହୁରି ଗଭୀର ହୋଇଛି। ରାଜଧାନୀ ଇସଲାମାବାଦ ଏବଂ ରାୱଲପିଣ୍ଡି ସମେତ ଅନେକ ପ୍ରମୁଖ ସହରରେ ଅଟାର ଭୟଙ୍କର ଅଭାବ ଦେଖାଦେଇଛି। ଗହମ ଯୋଗାଣ ବାଧାପ୍ରାପ୍ତ ହେବାରୁ ପ୍ରାୟ ୪୫ଟି ବଡ଼ ଅଟାକଳ ବନ୍ଦ ହେବା ସ୍ଥିତିକୁ ଆସିପହଞ୍ଚିଛି।

ସୂଚନା ଅନୁଯାୟୀ, ପଞ୍ଜାବ ପ୍ରଦେଶର ଖାଦ୍ୟ ବିଭାଗ ଜୁଲାଇ ୧୩ରେ ଗହମ ପରିବହନ ପରମିଟ୍ ଉପରେ ମୌଖିକ ରୋକ୍ ଲଗାଇଥିଲା। ଏହା ପରେ ଇସଲାମାବାଦ ଏବଂ ରାୱଲପିଣ୍ଡିକୁ ପ୍ରତିଦିନ ଯାଉଥିବା ପ୍ରାୟ ୮,୦୦୦ ଟନ୍ ଗହମ ଯୋଗାଣ ସମ୍ପୂର୍ଣ୍ଣ ବନ୍ଦ ହୋଇଯାଇଛି।

ଏହି ନିଷ୍ପତ୍ତିକୁ ଫ୍ଲୋର ମିଲ୍ ମାଲିକମାନେ ‘ତୁଘଲକି ଫରମାନ’ ବୋଲି ଅଭିହିତ କରିଛନ୍ତି। ସେମାନଙ୍କ କହିବା ଅନୁଯାୟୀ, କୌଣସି ଲିଖିତ ଆଦେଶ ବିନା ଗହମ ପରିବହନ ବନ୍ଦ କରାଯିବାରୁ ମିଲ୍‌ଗୁଡ଼ିକରେ କଞ୍ଚାମାଲ ଅଭାବ ସୃଷ୍ଟି ହୋଇଛି।

ପାକିସ୍ତାନ ଫ୍ଲୋର ମିଲ୍ସ ଆସୋସିଏସନର ଅଧ୍ୟକ୍ଷ ରିୟାଜୁଲ୍ଲା ଖାନ କହିଛନ୍ତି, ଯଦି ତୁରନ୍ତ ଗହମ ଯୋଗାଣ ସ୍ୱାଭାବିକ ନହୁଏ, ତେବେ ବଜାରରେ ଅଟାର ଭୟଙ୍କର ଅଭାବ ଦେଖାଦେବ। ଅନେକ ସ୍ଥାନରେ କଳାବଜାରୀମାନେ ଅଧିକ ଦାମରେ ଅଟା ବିକ୍ରି କରୁଥିବା ମଧ୍ୟ ଅଭିଯୋଗ ହୋଇଛି।

ମିଲ୍ ମାଲିକମାନେ ପରମିଟ୍ ବ୍ୟବସ୍ଥାକୁ ପୁଣି ଅନଲାଇନ୍ କରିବାକୁ ଦାବି କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ବର୍ତ୍ତମାନର ମୌଖିକ ବ୍ୟବସ୍ଥା ଦ୍ୱାରା ଦୁର୍ନୀତି ବଢ଼ୁଛି ଏବଂ ଖାଦ୍ୟ ଯୋଗାଣ ବ୍ୟବସ୍ଥା ପ୍ରଭାବିତ ହେଉଛି।

ଏହି ସ୍ଥିତିକୁ ନେଇ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ିଛି। ଲୋକମାନେ ପଞ୍ଜାବ ମୁଖ୍ୟମନ୍ତ୍ରୀ ମରିୟମ ନୱାଜଙ୍କ ହସ୍ତକ୍ଷେପ ଦାବି କରିଛନ୍ତି। ବିଶେଷଜ୍ଞମାନଙ୍କ ମତରେ, ଯଦି ଗହମ ଯୋଗାଣ ଶୀଘ୍ର ସ୍ୱାଭାବିକ ନହୁଏ, ତେବେ ଦେଶରେ ଖାଦ୍ୟ ସଙ୍କଟ ଆହୁରି ଗୁରୁତର ହୋଇପାରେ।