ବାଲେଶ୍ୱର: ବାଲେଶ୍ୱର ଜିଲ୍ଲା ଭୋଗରାଇ ଅଞ୍ଚଳର ଜଙ୍ଗଲରୁ ୫ଟି ଶିଶୁ ଓରାଙ୍ଗଉଟାନ୍ ଉଦ୍ଧାର ଘଟଣାକୁ ନେଇ ରହସ୍ୟ ଆହୁରି ଘନୀଭୂତ ହୋଇଛି। ଘଟଣାର ତଦନ୍ତକୁ ବ୍ୟାପକ କରି ଅନ୍ୟ ରାଜ୍ୟ ସହ ଲିଙ୍କ୍ ଖୋଜୁଛି ଓଡ଼ିଶା STF।

ସୂଚନା ଅନୁସାରେ, ଓଡ଼ିଶା STF ଏବେ ଆସାମ, ମିଜୋରାମ ଓ ମହାରାଷ୍ଟ୍ର ପୋଲିସ ସହ ଯୋଗାଯୋଗ କରିବାକୁ ଯୋଜନା କରିଛି। ଏହି ୩ଟି ରାଜ୍ୟରେ ପୂର୍ବରୁ ଓରାଙ୍ଗଉଟାନ୍ ଉଦ୍ଧାର ଘଟଣା ସାମ୍ନାକୁ ଆସିଥିଲା। ସେହି ଘଟଣାଗୁଡ଼ିକର ତଥ୍ୟ ଓଡ଼ିଶା ମାମଲାର ତଦନ୍ତରେ ସହାୟକ ହୋଇପାରେ ବୋଲି ତଦନ୍ତକାରୀମାନେ ଆଶା କରୁଛନ୍ତି।

ପୂର୍ବ ଘଟଣା ଉପରେ ନଜର

୨୦୨୨ରେ ଆସାମର କାଚାର ଜିଲ୍ଲାରୁ ୨ଟି ଶିଶୁ ଓରାଙ୍ଗଉଟାନ୍ ଉଦ୍ଧାର ହୋଇଥିଲା। ସେହିପରି ୨୦୨୩ ଅକ୍ଟୋବରରେ ମିଜୋରାମର ଆଇଜଲ୍ ଜିଲ୍ଲାରୁ ଆଉ ଗୋଟିଏ ଓରାଙ୍ଗଉଟାନ୍ ଉଦ୍ଧାର ହୋଇଥିଲା। ୨୦୨୪ରେ ମହାରାଷ୍ଟ୍ରର ଥାଣେ ଜିଲ୍ଲା ଡୋମ୍ବିଭଲିର ଏକ ଆପାର୍ଟମେଣ୍ଟରୁ ମଧ୍ୟ ଗୋଟିଏ ଓରାଙ୍ଗଉଟାନ୍ ଉଦ୍ଧାର ହୋଇଥିଲା।

ବାଲେଶ୍ୱର ଜଙ୍ଗଲରୁ ଏକାଥରକେ ୫ଟି ଶିଶୁ ଓରାଙ୍ଗଉଟାନ୍ ମିଳିବା ପରେ ଏହା ପଛରେ ବନ୍ୟଜନ୍ତୁ ଚୋରାଚାଲାଣର ବଡ଼ ନେଟୱର୍କ ରହିଛି କି ନାହିଁ, ତାହା ନେଇ ସନ୍ଦେହ ବଢ଼ିଛି। ତେଣୁ ପୂର୍ବରୁ ହୋଇଥିବା ଉଦ୍ଧାର ଘଟଣାରେ ସାମିଲ ଅଧିକାରୀଙ୍କଠାରୁ ତଥ୍ୟ ସଂଗ୍ରହ କରିବାକୁ STF ପ୍ରସ୍ତୁତ ହେଉଛି।

ତଦନ୍ତରେ ପଶ୍ଚିମବଙ୍ଗ ପୋଲିସ ମଧ୍ୟ ଓଡ଼ିଶା STFକୁ ସହଯୋଗ କରୁଛି।

CCTVରେ କଳା SUV, ତଦନ୍ତରେ ନୂଆ ଦିଗ

ତଦନ୍ତକାରୀମାନେ ପୂର୍ବରୁ STF ହାତରେ ଆସିଥିବା CCTV ଫୁଟେଜ୍କୁ ମଧ୍ୟ ଯାଞ୍ଚ କରିଛନ୍ତି। ଫୁଟେଜ୍ରେ ବାଲେଶ୍ୱର ଜଙ୍ଗଲ ଅଞ୍ଚଳ ନିକଟରେ ଏକ କଳା ରଙ୍ଗର SUV ଯାଉଥିବା ଦେଖାଯାଇଥିବା ଜଣାପଡ଼ିଛି। ଏହି ଗାଡ଼ିଟି ଓରାଙ୍ଗଉଟାନ୍ମାନଙ୍କୁ ଓଡ଼ିଶାକୁ ଆଣିବାରେ ବ୍ୟବହୃତ ହୋଇଥିଲା କି ନାହିଁ, ତାହା ତଦନ୍ତରେ ଖୋଜାଯାଉଛି।

ଉକ୍ତ ଗାଡ଼ିଟି ଥାର୍ ବୋଲି ଜଣାପଡ଼ିଥିବା ବେଳେ ଏହାକୁ ଦୀଘାର ଏକ ହୋଟେଲ ପର୍ଯ୍ୟନ୍ତ ଟ୍ରାକ୍ କରାଯାଇଥିବା ସୂଚନା ମିଳିଛି। ତେବେ ଗାଡ଼ିରେ ଥିବା ବ୍ୟକ୍ତିମାନେ ଓରାଙ୍ଗଉଟାନ୍ମାନଙ୍କୁ ଓଡ଼ିଶାକୁ ଆଣିଥିଲେ କିମ୍ବା ଜଙ୍ଗଲରେ ଛାଡ଼ି ଯାଇଥିଲେ କି ନାହିଁ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

୫ଟି ଶିଶୁ ଓରାଙ୍ଗଉଟାନ୍ କେଉଁଠାରୁ ଆସିଲେ, ସେମାନଙ୍କୁ କିଏ ଓ କିପରି ଓଡ଼ିଶାକୁ ଆଣିଲା ଏବଂ ଏହା ପଛରେ କୌଣସି ଆନ୍ତର୍ଜାତୀୟ ବନ୍ୟଜନ୍ତୁ ଚୋରାଚାଲାଣ ନେଟୱର୍କ ଅଛି କି ନାହିଁ—ଏସବୁ ଦିଗରେ ତଦନ୍ତ ଜାରି ରହିଛି।