ଅକ୍ଟୋବର ମାସ ଗଞ୍ଜାମବାସୀଙ୍କ ପାଇଁ ସବୁବେଳେ ଏକ ଚିନ୍ତାର ମାସ ଭାବେ ରହିଆସିଛି। ପୂର୍ବରୁ ଫାଇଲିନ୍, ହୁଡହୁଡ୍, ତିତଲି, ଗୁଲାବ, ଦାନା ଓ ଅନ୍ୟାନ୍ୟ ବାତ୍ୟାର ସ୍ମୃତି ଏହି ଅଞ୍ଚଳର ଲୋକଙ୍କୁ ଅକ୍ଟୋବର ଆସିଲେ ସତର୍କ କରିଦିଏ।

ନିକଟରେ ଗଭୀର ଅବପାତ ଓ ଲଗାଣ ବର୍ଷାରେ ବ୍ରହ୍ମପୁର ସହ ଗଞ୍ଜାମ ଓ ଗଜପତିର ଅନେକ ଅଞ୍ଚଳ ପ୍ରଭାବିତ ହୋଇଥିଲା। ବର୍ଷା ପରେ ପରିସ୍ଥିତି ସାଧାରଣ ହେବାକୁ ଲାଗିଥିବାବେଳେ, ଏବେ ପୁଣି ନୂଆ ପାଣିପାଗ ବ୍ୟବସ୍ଥାର ସମ୍ଭାବନା ଲୋକଙ୍କ ଚିନ୍ତା ବଢ଼ାଇଛି।

IMDର extended-range outlook ଅନୁସାରେ, ଅକ୍ଟୋବର 12 ଚାରିପାଖରେ ଉତ୍ତର ଆଣ୍ଡାମାନ ସାଗରରେ ଏକ upper-air cyclonic circulation ଗଠନ ହୋଇପାରେ। ଏହାର ପ୍ରଭାବରେ ଅକ୍ଟୋବର 13 ଚାରିପାଖରେ ଏକ low-pressure area ଗଠନ ହେବାର ସମ୍ଭାବନା ରହିଛି। ପରବର୍ତ୍ତୀ ସମୟରେ ଏହା ବଙ୍ଗୋପସାଗର ଦିଗକୁ ଗତି କରିପାରେ।

ତେବେ ବର୍ତ୍ତମାନ ସ୍ଥିତିରେ ଏହି ସିଷ୍ଟମ୍ ବାତ୍ୟାର ରୂପ ନେବ ବୋଲି କୌଣସି ନିଶ୍ଚିତ ପୂର୍ବାନୁମାନ ନାହିଁ। IMDର outlook ମଧ୍ୟ ମଧ୍ୟ-ଅକ୍ଟୋବରରେ depression formation ପାଇଁ ସୀମିତ ସମ୍ଭାବନା ଦେଖାଇଛି, ଏବଂ ଅଧିକ ସ୍ପଷ୍ଟତା medium-range forecast ଆସିବା ପରେ ମିଳିବ ବୋଲି ପାଣିପାଗ ବିଶେଷଜ୍ଞମାନେ କହିଛନ୍ତି। 

ଗଞ୍ଜାମ ଜିଲ୍ଲା ପୂର୍ବରୁ ଅନେକ ବଡ଼ ବାତ୍ୟାର ସାକ୍ଷୀ ହୋଇଛି। 1999ର ବାତ୍ୟା ଓ ପରେ 2013ର ଫାଇଲିନ୍ ଜିଲ୍ଲାରେ ବ୍ୟାପକ କ୍ଷୟକ୍ଷତି କରିଥିଲା। ଫାଇଲିନ୍ ଗୋପାଳପୁର ନିକଟରେ ଲ୍ୟାଣ୍ଡଫଲ୍ କରିବା ପରେ ଗଞ୍ଜାମରେ ବିଦ୍ୟୁତ୍ ବ୍ୟବସ୍ଥା, ରାସ୍ତା, ଘରବାଡ଼ି ଓ ଜୀବିକା ଉପରେ ଭୟାବହ ପ୍ରଭାବ ପଡ଼ିଥିଲା।

2014ର ହୁଡହୁଡ୍, 2018ର ତିତଲି ଓ ପରବର୍ତ୍ତୀ କିଛି ବାତ୍ୟା ଗଞ୍ଜାମରେ ଚିନ୍ତା ବଢ଼ାଇଥିଲେ ମଧ୍ୟ, ସେମାନଙ୍କର ମୁଖ୍ୟ ଲ୍ୟାଣ୍ଡଫଲ୍ ଅନ୍ୟ ସ୍ଥାନରେ ହୋଇଥିବାରୁ ଜିଲ୍ଲା କେତେକ ମାମଲାରେ ବଡ଼ କ୍ଷତିରୁ ବର୍ତ୍ତିଯାଇଥିଲା।

ତେଣୁ ଏବେ ନୂଆ ଲଘୁଚାପ ସମ୍ଭାବନାକୁ ନେଇ ଗଞ୍ଜାମବାସୀଙ୍କ ଚିନ୍ତା ସ୍ୱାଭାବିକ ହେଲେ ମଧ୍ୟ, ଏହାକୁ ଏହି ମୁହୂର୍ତ୍ତରେ ‘ଆସୁଥିବା ବାତ୍ୟା’ ବୋଲି କହିବା ପାଇଁ ପର୍ଯ୍ୟାପ୍ତ ପାଣିପାଗ ତଥ୍ୟ ନାହିଁ। ଆଗାମୀ କିଛି ଦିନର IMD update ଓ ସିଷ୍ଟମ୍‌ର ଗତିପଥ ଉପରେ ସମସ୍ତଙ୍କ ନଜର ରହିବ।