ସିଓଲ୍: ଉତ୍ତର କୋରିଆର ବଢ଼ୁଥିବା ପରମାଣୁ ଓ କ୍ଷେପଣାସ୍ତ୍ର କାର୍ଯ୍ୟକ୍ରମ ମଧ୍ୟରେ ଦକ୍ଷିଣ କୋରିଆ ଏକ ପର୍ଯ୍ୟାୟକ୍ରମିକ ସମାଧାନର ପ୍ରସ୍ତାବ ରଖିଛି। ଦକ୍ଷିଣ କୋରିଆର ରାଷ୍ଟ୍ରପତି ଲି ଜେ-ମ୍ୟୁଙ୍ଗ ଏହି ସପ୍ତାହରେ ଜାତିସଂଘ ସାଧାରଣ ପରିଷଦରେ ଉତ୍ତର କୋରିଆର ପରମାଣୁ କାର୍ଯ୍ୟକ୍ରମ ନେଇ ପର୍ଯ୍ୟାୟକ୍ରମେ ଆଲୋଚନା ପାଇଁ ନିଜ ଯୋଜନା ଉପସ୍ଥାପନ କରିବେ।

ଲିଙ୍କ ପ୍ରସ୍ତାବ ଅନୁଯାୟୀ, ପ୍ରଥମ ପର୍ଯ୍ୟାୟରେ ଉତ୍ତର କୋରିଆର ପରମାଣୁ ଓ କ୍ଷେପଣାସ୍ତ୍ର କ୍ଷମତାର ଆହୁରି ବିକାଶକୁ ରୋକିବା, ଦ୍ୱିତୀୟ ପର୍ଯ୍ୟାୟରେ ଏହାର ଅସ୍ତ୍ରଶସ୍ତ୍ର କମାଇବା ଏବଂ ଶେଷରେ ପରମାଣୁ ଅସ୍ତ୍ର କାର୍ଯ୍ୟକ୍ରମକୁ ଭାଙ୍ଗିବା ଦିଗରେ ପଦକ୍ଷେପ ନିଆଯିବ। ପ୍ରତ୍ୟେକ ପର୍ଯ୍ୟାୟ ବଦଳରେ ରାଜନୈତିକ ଓ ଆର୍ଥିକ ପ୍ରୋତ୍ସାହନ ଦିଆଯାଇପାରେ।

ଲି କହିଛନ୍ତି ଯେ ଉତ୍ତର କୋରିଆର ପରମାଣୁ କ୍ଷମତା ଯେଉଁ ସ୍ତରରେ ପହଞ୍ଚିଛି, ସେହି ପରିସ୍ଥିତିରେ ଗୋଟିଏ ପଦକ୍ଷେପରେ ସମ୍ପୂର୍ଣ୍ଣ ନିରସ୍ତ୍ରୀକରଣ ଅପେକ୍ଷା କରିବା ବାସ୍ତବସମ୍ମତ ନୁହେଁ। ତେଣୁ ପ୍ରଥମେ ଏହାର ବିକାଶକୁ ଅଟକାଇବା ଆବଶ୍ୟକ ବୋଲି ସେ ମତ ଦେଇଛନ୍ତି।

ଏହି ପ୍ରସ୍ତାବ ଏଭଳି ସମୟରେ ଆସିଛି, ଯେତେବେଳେ ଉତ୍ତର କୋରିଆ ଆଲୋଚନା ପାଇଁ ଆଗ୍ରହ ଦେଖାଉନଥିବା ସହିତ ନିକଟରେ ଏକାଧିକ କ୍ଷେପଣାସ୍ତ୍ର ପରୀକ୍ଷଣ କରିଛି। ସେପ୍ଟେମ୍ବର ୨୦ରେ ମଧ୍ୟ ଉତ୍ତର କୋରିଆ ସମୁଦ୍ର ଦିଗକୁ ଦୁଇଟି ସ୍ୱଳ୍ପ ଦୂରତାର ବାଲିଷ୍ଟିକ୍ କ୍ଷେପଣାସ୍ତ୍ର ଉତ୍‌କ୍ଷେପଣ କରିଥିବା ଦକ୍ଷିଣ କୋରିଆର ସେନା କହିଥିଲା।

ଲି ଜେ-ମ୍ୟୁଙ୍ଗ କହିଛନ୍ତି ଯେ ଦକ୍ଷିଣ କୋରିଆ ଓ ଆମେରିକା ଉଭୟ ଉତ୍ତର କୋରିଆ ସହ ବିନା ପୂର୍ବସର୍ତ୍ତରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି। ଏଥିସହ ୧୯୫୦-୫୩ କୋରିଆ ଯୁଦ୍ଧକୁ ଔପଚାରିକ ଭାବେ ଶେଷ କରିବା ନେଇ ସମ୍ପୃକ୍ତ ପକ୍ଷଙ୍କ ମଧ୍ୟରେ ଆଲୋଚନା ହେବାର ପ୍ରସ୍ତାବ ମଧ୍ୟ ସେ ରଖିଛନ୍ତି।

ତେବେ ଉତ୍ତର କୋରିଆ ଏହି ପ୍ରସ୍ତାବକୁ କିପରି ଗ୍ରହଣ କରିବ, ତାହା ଏବେ ମଧ୍ୟ ସ୍ପଷ୍ଟ ନୁହେଁ। ପର୍ଯ୍ୟାୟକ୍ରମିକ ପଦକ୍ଷେପ ବଦଳରେ ଉତ୍ତର କୋରିଆ ଆର୍ଥିକ ସୁବିଧା କିମ୍ବା କଟକଣା ହ୍ରାସ ପାଇବା ପରେ ମଧ୍ୟ ସମ୍ପୂର୍ଣ୍ଣ ପରମାଣୁ ନିରସ୍ତ୍ରୀକରଣରେ ସହମତ ନ ହୋଇପାରେ ବୋଲି ଚିନ୍ତା ପ୍ରକାଶ ପାଇଛି।