ନୂଆଦିଲ୍ଲୀ:ଲଗାତାର ପ୍ରବଳ ବର୍ଷା ଯୋଗୁଁ ଦିଲ୍ଲୀ-ଏନସିଆରରେ ଜନଜୀବନ ବ୍ୟାପକ ଭାବେ ପ୍ରଭାବିତ ହୋଇଛି। ଏହାରି ମଧ୍ୟରେ ଉତ୍ତର ପ୍ରଦେଶର ନୋଏଡା ସେକ୍ଟର-୧୬ ମେଟ୍ରୋ ଷ୍ଟେସନ ନିକଟରେ ଏକ ବଡ଼ ଅଘଟଣ ଘଟିଛି। ପ୍ରାୟ୫୦ ମିଟର ଲମ୍ବର ରୋଡ୍ ଡିଭାଇଡରହଠାତ୍ ଭୁଶୁଡ଼ି ପଡ଼ିବାରୁ ଜଣେ ବ୍ୟକ୍ତି ଆହତ ହୋଇଛନ୍ତି।

ସୂଚନା ଅନୁସାରେ, ଲଗାଣ ବର୍ଷା ପରେ ନୋଏଡା ସେକ୍ଟର-୧୬ ମେଟ୍ରୋ ଷ୍ଟେସନ ତଳେ ଥିବା ରାସ୍ତାର ଡିଭାଇଡରର ଏକ ବଡ଼ ଅଂଶ ହଠାତ୍ ଭାଙ୍ଗି ପଡ଼ିଥିଲା। ଘଟଣା ସମୟରେ ରାସ୍ତାରେ ଲୋକଙ୍କ ଯାତାୟାତ ଚାଲିଥିବାରୁ ଏକ ବଡ଼ ଦୁର୍ଘଟଣା ଅଳ୍ପକେ ଏଡ଼ିଯାଇଛି। ତେବେ ଏହି ଘଟଣାରେ ଜଣେ ବ୍ୟକ୍ତି ଆହତ ହୋଇଥିବା ଜଣାପଡ଼ିଛି।

ଘଟଣାର ସୂଚନା ପାଇବା ପରେ ପୁଲିସ, ନୋଏଡା ଅଥରିଟି ଏବଂ ପ୍ରଶାସନିକ ଅଧିକାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ପରିସ୍ଥିତିର ସମୀକ୍ଷା କରିଥିଲେ। ସୁରକ୍ଷା ଦୃଷ୍ଟିରୁ ସମଗ୍ର ଅଞ୍ଚଳକୁ ବ୍ୟାରିକେଡ୍ କରାଯାଇଥିବା ବେଳେ ଭାଙ୍ଗି ପଡ଼ିଥିବା ଡିଭାଇଡରକୁ ହଟାଇବା ଓ ମରାମତି କାମ ଜାରି ରହିଛି।

ଅନ୍ୟପକ୍ଷରେ, ପ୍ରବଳ ବର୍ଷା ଯୋଗୁଁ ଦିଲ୍ଲୀ-ଏନସିଆରର ବିଭିନ୍ନ ଅଞ୍ଚଳରେ ଜଳବନ୍ଦୀ ପରିସ୍ଥିତି ଦେଖାଦେଇଛି। ଅନେକ ପ୍ରମୁଖ ସଡ଼କରେ ପାଣି ଜମିଥିବାରୁ ଯାତାୟାତ ବାଧାପ୍ରାପ୍ତ ହୋଇଛି। ଭାରତୀୟ ପାଣିପାଗ ବିଭାଗ ଆଗାମୀ କିଛି ଘଣ୍ଟା ମଧ୍ୟରେ ଆହୁରି ପ୍ରବଳ ବର୍ଷା ନେଇ ସତର୍କତା ଜାରି କରିଛି।

ଏହି ଘଟଣା ପରେ ସହରର ଡ୍ରେନେଜ୍ ବ୍ୟବସ୍ଥା ଓ ଭିତ୍ତିଭୂମିର ଗୁଣବତ୍ତାକୁ ନେଇ ପୁଣିଥରେ ପ୍ରଶ୍ନ ଉଠିଛି। ଡିଭାଇଡର କାହିଁକି ଭୁଶୁଡ଼ି ପଡ଼ିଲା, ତାହାର ପ୍ରକୃତ କାରଣ ଜାଣିବା ପାଇଁ ସମ୍ପୃକ୍ତ କର୍ତ୍ତୃପକ୍ଷ ତଦନ୍ତ ଆରମ୍ଭ କରିଛନ୍ତି।