ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ନିଜର ମଜାଳିଆ ମନ୍ତବ୍ୟକୁ ନେଇ ଚର୍ଚ୍ଚାରେ। ଇସ୍ରାଏଲ୍‌ରେ ତାଙ୍କର ଲୋକପ୍ରିୟତା ୯୯ ପ୍ରତିଶତ ଥିବା ଦାବି କରି ସେ କହିଛନ୍ତି, ଯଦି ଆମେରିକାର ଲୋକମାନେ ତାଙ୍କଠାରୁ ଥକିଯାଆନ୍ତି, ତେବେ ସେ ଇସ୍ରାଏଲ୍‌କୁ ଯାଇ ସେଠାକାର ପ୍ରଧାନମନ୍ତ୍ରୀ ହୋଇଯିବେ ।

ନଭେମ୍ବର ୩ ତାରିଖରେ ଆମେରିକାର ମଧ୍ୟବର୍ତ୍ତୀ ନିର୍ବାଚନ ଦିନ ଫକ୍ସ ନ୍ୟୁଜ୍‌କୁ ଦେଇଥିବା ଏକ ସାକ୍ଷାତକାରରେ ଟ୍ରମ୍ପ ଏହି ମନ୍ତବ୍ୟ ଦେଇଥିଲେ। ଇସ୍ରାଏଲ୍‌ରେ ତାଙ୍କର ଆପ୍ରୁଭାଲ୍ ରେଟିଂ ୯୯ ପ୍ରତିଶତ ବୋଲି କହିବା ସହ ଇତିହାସରେ ତାଙ୍କର ସର୍ବାଧିକ ଲୋକପ୍ରିୟତା ରହିଥିବା ମଧ୍ୟ ଦାବି କରିଥିଲେ। ତେବେ ଏହି ୯୯ ପ୍ରତିଶତ ଦାବିକୁ ସମର୍ଥନ କରିବା ପାଇଁ ସେ କୌଣସି ସର୍ଭେ କିମ୍ବା ନିର୍ଦ୍ଦିଷ୍ଟ ତଥ୍ୟ ଦେଇନାହାନ୍ତି।

ଏହି ସାକ୍ଷାତକାରରେ ଟ୍ରମ୍ପ ଇସ୍ରାଏଲ୍‌କୁ ଆମେରିକାର ଜଣେ ଗୁରୁତ୍ୱପୂର୍ଣ୍ଣ ସହଯୋଗୀ ବୋଲି କହିବା ସହ ଦୁଇ ଦେଶର ସମ୍ପର୍କ ଉପରେ ମଧ୍ୟ ମତ ରଖିଥିଲେ। ଏଥିସହ ଇସ୍ରାଏଲ୍‌କୁ ପ୍ରତିବର୍ଷ ଦିଆଯାଉଥିବା ପ୍ରାୟ ୪ ବିଲିୟନ ଡଲାରର ଆମେରିକୀୟ ସହାୟତା ୨୦୨୬ ଶେଷ ସୁଦ୍ଧା ବନ୍ଦ କରାଯିବ ବୋଲି ସେ କହିଥିଲେ ।

ଟ୍ରମ୍ପଙ୍କ କହିବା ଅନୁଯାୟୀ, ଇସ୍ରାଏଲ୍‌ର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ନିଜେ ଏହି ସହାୟତା ବନ୍ଦ କରିବା ପ୍ରସ୍ତାବ ଦେଇଥିଲେ ଏବଂ ଉଭୟ ନେତା ଏନେଇ କିଛି ବର୍ଷ ଧରି ଆଲୋଚନା କରୁଥିଲେ। ଇସ୍ରାଏଲ୍‌ର ଆର୍ଥିକ ସ୍ଥିତି ମଜବୁତ ଥିବାରୁ ଦେଶଟିକୁ ଆଉ ଏହି ସହାୟତାର ଆବଶ୍ୟକତା ନାହିଁ ବୋଲି ଟ୍ରମ୍ପ ଯୁକ୍ତି ଦେଇଥିଲେ। ତେବେ ଆମେରିକାର ପୂର୍ବ ଚୁକ୍ତି ଅନୁସାରେ ୨୦୨୮ ପର୍ଯ୍ୟନ୍ତ ବାର୍ଷିକ ପ୍ରାୟ ୩.୮ ବିଲିୟନ ଡଲାର ସାମରିକ ସହାୟତା ଦେବାର ବ୍ୟବସ୍ଥା ରହିଛି। ଏହି ବ୍ୟବସ୍ଥାରେ ପରିବର୍ତ୍ତନ କିପରି ହେବ, ସେନେଇ ସବିଶେଷ ଯୋଜନା ସ୍ପଷ୍ଟ ହୋଇନାହିଁ।

ଅନ୍ୟପକ୍ଷରେ, ଇସ୍ରାଏଲ୍‌ରେ ନିଜର ଲୋକପ୍ରିୟତାକୁ ନେଇ ଟ୍ରମ୍ପଙ୍କ ଏହି ଦାବି ପୂର୍ବରୁ ମଧ୍ୟ ଚର୍ଚ୍ଚାକୁ ଆସିଥିଲା। ମେ’ ମାସରେ ମଧ୍ୟ ସେ ଇସ୍ରାଏଲ୍‌ରେ ୯୯ ପ୍ରତିଶତ ସମର୍ଥନ ଥିବା କହି ଏଭଳି ମନ୍ତବ୍ୟ ଦେଇଥିଲେ। ତେବେ ତାଙ୍କର ଏହି ଦାବିକୁ ସମର୍ଥନ କରୁଥିବା କୌଣସି ଭରସାଯୋଗ୍ୟ ସର୍ଭେ ମିଳିନାହିଁ ବୋଲି ଏକ ଫ୍ୟାକ୍ଟ-ଚେକ୍ ରିପୋର୍ଟରେ କୁହାଯାଇଛି।