ରାଉରକେଲା:ଶିକ୍ଷା ଓ ଗବେଷଣା କ୍ଷେତ୍ରରେ ଓଡ଼ିଶାର ଗୌରବ ବଢ଼ାଇଛି NIT ରାଉରକେଲା। ଏହି ଅନୁଷ୍ଠାନର ୨୯ ଜଣ ଅଧ୍ୟାପକ ଏବଂ ଜଣେ ପିଏଚ୍ଡି ଗବେଷକଙ୍କୁ ବିଶ୍ୱର ଶ୍ରେଷ୍ଠ ୨% ବୈଜ୍ଞାନିକଙ୍କ ୨୦୨୬ ତାଲିକାରେ ସ୍ଥାନ ମିଳିଛି। ଏହାଦ୍ୱାରା ଅନୁଷ୍ଠାନ ସହ ଜଡ଼ିତ ମୋଟ ୩୦ ଜଣ ଗବେଷକ ଏହି ସ୍ୱୀକୃତି ପାଇଛନ୍ତି।

ଷ୍ଟାନଫୋର୍ଡ ବିଶ୍ୱବିଦ୍ୟାଳୟର ପ୍ରଫେସର ଜନ୍ ପି.ଏ. ଇଓଆନିଡିସ୍ ଏବଂ ତାଙ୍କ ଟିମ୍ ଏହି ତାଲିକା ପ୍ରସ୍ତୁତ କରିଛନ୍ତି। ଏଲ୍ସେଭିୟର୍ ଏହାକୁ ନିଜର ଡାଟା ରିପୋଜିଟୋରି ମାଧ୍ୟମରେ ପ୍ରକାଶ କରିଛି। ଗବେଷକଙ୍କ ଗବେଷଣାପତ୍ରକୁ ମିଳିଥିବା ସାଇଟେସନ୍, ସହ-ଲେଖକଙ୍କ ଅବଦାନ ଏବଂ ଗବେଷଣାରେ ବ୍ୟକ୍ତିଗତ ଅବଦାନ ଭଳି ମାନଦଣ୍ଡକୁ ବିଚାରକୁ ନିଆଯାଇଛି। ଏଥିରେ ଦୀର୍ଘକାଳୀନ ଗବେଷଣା ପ୍ରଭାବ ଓ ଏକ ବର୍ଷର ଗବେଷଣା ପ୍ରଭାବକୁ ମଧ୍ୟ ଦେଖାଯାଇଛି।

ବିଭିନ୍ନ ବିଷୟର ଗବେଷକଙ୍କୁ ସ୍ୱୀକୃତି

NIT ରାଉରକେଲାର ଗବେଷକମାନେ ଜୀବ ବିଜ୍ଞାନ, ଧାତୁ ଓ ପଦାର୍ଥ ଅଭିଯାନ୍ତ୍ରିକୀ, ଗଣିତ, ରାସାୟନିକ ଅଭିଯାନ୍ତ୍ରିକୀ, ଜୈବ ପ୍ରଯୁକ୍ତିବିଦ୍ୟା ଓ ମେଡିକାଲ୍ ଅଭିଯାନ୍ତ୍ରିକୀ, ମାନବିକୀ ଓ ସାମାଜିକ ବିଜ୍ଞାନ, ସେରାମିକ୍ ଅଭିଯାନ୍ତ୍ରିକୀ, ଖାଦ୍ୟ ପ୍ରକ୍ରିୟାକରଣ, ଇଲେକ୍ଟ୍ରୋନିକ୍ସ ଓ ଯୋଗାଯୋଗ ଅଭିଯାନ୍ତ୍ରିକୀ, ପଦାର୍ଥ ବିଜ୍ଞାନ, ଜ୍ୟୋତିର୍ବିଜ୍ଞାନ, ସିଭିଲ୍ ଅଭିଯାନ୍ତ୍ରିକୀ ଓ ଖଣି ଅଭିଯାନ୍ତ୍ରିକୀ ଭଳି ବିଭିନ୍ନ କ୍ଷେତ୍ରରେ କାର୍ଯ୍ୟ କରୁଛନ୍ତି।

ଏହି ସଫଳତାକୁ ନେଇ NIT ରାଉରକେଲାର ନିର୍ଦ୍ଦେଶକ ପ୍ରଫେସର କେ. ଉମାମହେଶ୍ୱର ରାଓ ଖୁସି ପ୍ରକାଶ କରିଛନ୍ତି। ତାଙ୍କ ମତରେ, ଏହି ସ୍ୱୀକୃତି ଅନୁଷ୍ଠାନର ଗବେଷଣାର ଗୁଣବତ୍ତା, ନିରନ୍ତରତା ଏବଂ ବିଶ୍ୱସ୍ତରୀୟ ପ୍ରାସଙ୍ଗିକତାକୁ ପ୍ରତିଫଳିତ କରୁଛି। ଗବେଷକମାନଙ୍କ ଜ୍ଞାନ ବିକାଶ ପ୍ରତି ନିଷ୍ଠାକୁ ସେ ପ୍ରଶଂସା କରିବା ସହ ଏହା ଛାତ୍ରଛାତ୍ରୀ ଓ ଯୁବ ଗବେଷକଙ୍କୁ ପ୍ରେରଣା ଦେବ ବୋଲି ଆଶା ପ୍ରକାଶ କରିଛନ୍ତି।

NITର ପୂର୍ବତନ ପିଏଚ୍ଡି ଗବେଷକଙ୍କୁ ମଧ୍ୟ ସ୍ଥାନ

NIT ରାଉରକେଲାରୁ ପିଏଚ୍ଡି କରିଥିବା ଡକ୍ଟର ଶ୍ରୀମନ୍ତ ପାତ୍ର ମଧ୍ୟ ଏହି ତାଲିକାରେ ସ୍ଥାନ ପାଇଛନ୍ତି। ସେ ବର୍ତ୍ତମାନ IIT ଗୁଆହାଟୀରେ DST-INSPIRE ଫ୍ୟାକଲ୍ଟି ଭାବେ କାର୍ଯ୍ୟରତ ଅଛନ୍ତି।

ଏହାସହ ଅନୁଷ୍ଠାନର ୧୯ ଜଣ ଗବେଷକ ଷ୍ଟାନଫୋର୍ଡର ୨୦୨୬ ଶ୍ରେଷ୍ଠ ୨% ବୈଜ୍ଞାନିକ ତାଲିକାର ଦୀର୍ଘକାଳୀନ ଗବେଷଣା ପ୍ରଭାବ ବର୍ଗରେ ମଧ୍ୟ ସ୍ଥାନ ପାଇଛନ୍ତି। ଗବେଷଣା ଓ ଶିକ୍ଷା କ୍ଷେତ୍ରରେ ସେମାନଙ୍କ ଦୀର୍ଘଦିନର ଅବଦାନକୁ ଏହି ସ୍ୱୀକୃତି ଦର୍ଶାଉଛି।