ପ୍ରକୃତିର ଭୟଙ୍କର ତାଣ୍ଡବ ମଧ୍ୟରେ ମଣିଷର ବଞ୍ଚିବାର ଇଚ୍ଛାଶକ୍ତି ପୁଣିଥରେ ବିଜୟୀ ହୋଇଛି। ବନ୍ୟା ଓ ଭୂସ୍ଖଳନରେ ଭୟଙ୍କର ଭାବେ ପ୍ରଭାବିତ ନେପାଳରେ ଧ୍ୱଂସାବଶେଷ ଓ କାଦୁଅ ତଳୁ ଦୁଇଟି ଜୀବନକୁ ଉଦ୍ଧାର କରାଯାଇଛି। ଶନିବାର ଉଦ୍ଧାରକାରୀ ଦଳର ଅକ୍ଳାନ୍ତ ପରିଶ୍ରମ ଯୋଗୁଁ ଏହି ସଫଳତା ମିଳିଛି।

ସବୁଠାରୁ ଜଟିଳ ଉଦ୍ଧାର ଅଭିଯାନ ତ୍ରିଶୂଳୀ ଅଞ୍ଚଳରେ ହୋଇଥିଲା। ଏକ ହାଇଡ୍ରୋପାୱାର ପ୍ରକଳ୍ପର ପ୍ରାୟ୨୨୫ ମିଟର ଲମ୍ବା ସୁଡ଼ଙ୍ଗଭିତରେ ଜଣେ ଚୀନ୍ ନାଗରିକ ଫସି ରହିଥିଲେ। ନେପାଳ ସେନା ଓ ଦକ୍ଷିଣ କୋରିଆର ବିପର୍ଯ୍ୟୟ ପରିଚାଳନା ବିଶେଷଜ୍ଞମାନେ ମଳବା ହଟାଇ ସୁଡ଼ଙ୍ଗ ଭିତରକୁ ପ୍ରବେଶ କରିଥିଲେ।

ଦୀର୍ଘ ଉଦ୍ଧାର ଅଭିଯାନ ପରେ ତାଙ୍କୁ ଜୀବନ୍ତ ବାହାର କରାଯାଇଥିଲା। ତାଙ୍କ ଶରୀର ଓ ହାତରେ କାଦୁଅର ମୋଟା ଆସ୍ତରଣ ଲାଗିଥିଲା। ସେ ଅତ୍ୟନ୍ତ ଦୁର୍ବଳ ଓ କ୍ଳାନ୍ତ ଥିଲେ ମଧ୍ୟ ସଚେତ ଥିଲେ। ଉଦ୍ଧାର ପରେ ତାଙ୍କୁ ତୁରନ୍ତ ହେଲିକପ୍ଟର ଯୋଗେ ଡାକ୍ତରଖାନାକୁ ପଠାଯାଇଥିଲା। ଏହା ପୂର୍ବରୁ ଏହି ତ୍ରିଶୂଳୀ-୩ଏ ପ୍ରକଳ୍ପରୁ ଦୁଇଜଣ ନେପାଳୀ ଶ୍ରମିକଙ୍କୁ ମଧ୍ୟ ଜୀବନ୍ତ ଉଦ୍ଧାର କରାଯାଇଥିଲା।

୧୧ ଦିନ ପରେ ମିଳିଲା ଜୀବନ

ନୁୱାକୋଟ ଅଞ୍ଚଳରେ ଆଉ ଏକ ଆଶ୍ଚର୍ଯ୍ୟଜନକ ଉଦ୍ଧାର ଘଟଣା ସାମ୍ନାକୁ ଆସିଛି। ଏକ ଭୁଶୁଡ଼ି ପଡ଼ିଥିବା ଘରର ଧ୍ୱଂସାବଶେଷ ତଳୁ୬୪ ବର୍ଷୀୟା ଚଣ୍ଡିକା ଶ୍ରେଷ୍ଠଙ୍କୁ ଜୀବନ୍ତ ଉଦ୍ଧାର କରାଯାଇଛି।

ଉଦ୍ଧାରକାରୀ ଦଳ ତାଙ୍କୁ କମ୍ବଳରେ ଗୁଡ଼ାଇ ଧ୍ୱଂସସ୍ତୂପ ତଳୁ ବାହାର କରିଥିଲେ। ପରେ ତାଙ୍କୁ ଉନ୍ନତ ଚିକିତ୍ସା ପାଇଁ କାଠମାଣ୍ଡୁ ପଠାଯାଇଛି। ପ୍ରଳୟଙ୍କରୀ ବନ୍ୟା ଓ ଭୂସ୍ଖଳନର ୧୧ ଦିନ ପରେ ତାଙ୍କୁ ଜୀବନ୍ତ ମିଳିବା ଘଟଣା ଉଦ୍ଧାରକାରୀ ଦଳ ଓ ସାଧାରଣ ଲୋକଙ୍କ ମଧ୍ୟରେ ନୂଆ ଆଶା ସୃଷ୍ଟି କରିଛି।

ଏହି ଦୁଇଟି ଉଦ୍ଧାରକୁ ମିଶାଇ ନିକଟ ଅତୀତରେ ନେପାଳର ବିପର୍ଯ୍ୟୟରୁ ଜୀବନ୍ତ ଉଦ୍ଧାର ହୋଇଥିବା ଲୋକଙ୍କ ସଂଖ୍ୟାଚାରିରେ ପହଞ୍ଚିଛି।

ହଜାର ହଜାର ଲୋକ ଏବେ ବି ନିଖୋଜ

ନେପାଳ ଏବେ ଏକ ବଡ଼ ପ୍ରାକୃତିକ ବିପର୍ଯ୍ୟୟର ସାମ୍ନା କରୁଛି। ଗତ୨୬ ଅଗଷ୍ଟରେଆସିଥିବା ପ୍ରଳୟଙ୍କରୀ ବନ୍ୟାରେ ୧,୩୦୦ରୁ ଅଧିକ ଲୋକ ପ୍ରାଣ ହରାଇଥିବା ଏବଂ ୫,୦୦୦ରୁ ଅଧିକ ଲୋକ ଏବେ ବି ନିଖୋଜ ଥିବା ରିପୋର୍ଟରେ କୁହାଯାଇଛି।

ବିଭିନ୍ନ ହାଇଡ୍ରୋପାୱାର ପ୍ରକଳ୍ପର ପ୍ରାୟ୯୦୦ କର୍ମଚାରୀ ନିଖୋଜଥିବା ବେଳେ ପ୍ରାୟ ୫୦୦ ଜଣ ସୁଡ଼ଙ୍ଗ ଭିତରେ ଫସିଥିବା ଆଶଙ୍କା କରାଯାଉଛି। ନେପାଳ ସେନା ସହ ଭାରତ, ଚୀନ୍, ଅଷ୍ଟ୍ରେଲିଆ ଓ ଦକ୍ଷିଣ କୋରିଆର ବିଶେଷଜ୍ଞ ଦଳ ଦିନରାତି ଉଦ୍ଧାର ଅଭିଯାନରେ ସାମିଲ ହୋଇଛନ୍ତି।

ଭବିଷ୍ୟତରେ ମୃତଦେହଗୁଡ଼ିକର ପରିଚୟ ନିର୍ଦ୍ଧାରଣ ପାଇଁ DNA ନମୁନା ସଂଗ୍ରହ କରାଯାଇଥିବା ବେଳେ୧,୦୩୦ ମୃତଦେହର ସାମୂହିକ ସତ୍କାରକରାଯାଇଥିବା ରିପୋର୍ଟରେ ଉଲ୍ଲେଖ ରହିଛି।

ଏଭଳି ସଙ୍କଟ ସମୟରେ ରିଲିଫ୍ କ୍ୟାମ୍ପରେ ଆଶ୍ରୟ ନେଇଥିବା ହଜାର ହଜାର ଲୋକଙ୍କୁ ପ୍ରଧାନମନ୍ତ୍ରୀ ବାଲେନ୍ଦ୍ର ଶାହ ଆଶ୍ୱାସନ ଦେଇଛନ୍ତି। ସେମାନଙ୍କ ସୁରକ୍ଷିତ ପୁନର୍ବାସ ଏବଂ ଜୀବନକୁ ପୁଣି ସଜାଡ଼ିବା ପାଇଁ ସରକାର ଆବଶ୍ୟକ ସମସ୍ତ ସହାୟତା ଯୋଗାଇବେ ବୋଲି ସେ କହିଛନ୍ତି।

ଧ୍ୱଂସ ଓ ଦୁଃଖର ଏହି ବିଶାଳ ପୃଷ୍ଠଭୂମିରେ ଧ୍ୱଂସାବଶେଷ ତଳୁ ଜୀବନ୍ତ ଉଦ୍ଧାର ହୋଇଥିବା ଲୋକଙ୍କ ଘଟଣା ଏବେ ନେପାଳ ପାଇଁ ଆଶାର ଏକ ବଡ଼ କିରଣ ପାଲଟିଛି।