ଆମେରିକା ନିର୍ବାଚନରେ ଭାରତୀୟ ବଂଶୋଦ୍ଭବଙ୍କ ସଫଳତା

ଆମେରିକାର ୨୦୨୬ ମଧ୍ୟବର୍ତ୍ତୀକାଳୀନ ନିର୍ବାଚନରେ ଭାରତୀୟ ବଂଶୋଦ୍ଭବ ପ୍ରାର୍ଥୀଙ୍କ ସଫଳତା ଚର୍ଚ୍ଚାର ବିଷୟ ପାଲଟିଛି। ନଭେମ୍ବର ୩ ତାରିଖରେ ହୋଇଥିବା ଭୋଟ୍‌ଗ୍ରହଣ ପରେ ଫଳାଫଳ ଆସିବା ଆରମ୍ଭ ହୋଇଛି। ଏଥିରେ ପିଆ ଡାଣ୍ଡିଆ, ସୁହାସ ସୁବ୍ରମଣ୍ୟମ ଓ ଅରୁଣା ମିଲରଙ୍କ ବିଜୟ ଭାରତୀୟ ସମ୍ପ୍ରଦାୟ ପାଇଁ ଗର୍ବର ବିଷୟ ହୋଇଛି।

ଫ୍ଲୋରିଡାରୁ ବିଜୟୀ ହେଲେ ପିଆ ଡାଣ୍ଡିଆ

ଡେମୋକ୍ରାଟିକ୍ ପାର୍ଟିର ପ୍ରାର୍ଥୀ ପିଆ ଡାଣ୍ଡିଆ ଫ୍ଲୋରିଡାର ୨୨ତମ କଂଗ୍ରେସନାଲ୍ ଜିଲ୍ଲାରୁ ଆମେରିକା ପ୍ରତିନିଧି ସଭା ନିର୍ବାଚନରେ ବିଜୟୀ ହୋଇଛନ୍ତି। ସେ ରିପବ୍ଲିକାନ୍ ପ୍ରାର୍ଥୀ କେସି ଆସ୍କରଙ୍କୁ ପରାସ୍ତ କରିଛନ୍ତି।

ଘୋଷିତ ଫଳାଫଳ ଅନୁସାରେ, ପିଆ ୫୧.୯ ପ୍ରତିଶତ ଭୋଟ୍ ପାଇଥିବା ବେଳେ ତାଙ୍କ ପ୍ରତିଦ୍ୱନ୍ଦ୍ୱୀ ୪୯.୧ ପ୍ରତିଶତ ଭୋଟ୍ ପାଇଥିଲେ। ପିଆଙ୍କ ପିତାମାତା ଭାରତରୁ ଆମେରିକାକୁ ପ୍ରବାସ କରିଥିଲେ। ସେ ପୂର୍ବରୁ ଜଣେ ହାଇସ୍କୁଲ୍ ପ୍ରିନ୍ସିପାଲ୍ ଭାବେ କାମ କରିଥିଲେ। ନିମ୍ନ ଆୟକାରୀ ପରିବାରର ଛାତ୍ରଛାତ୍ରୀଙ୍କୁ ଉନ୍ନତ ଶିକ୍ଷା ଓ ଆର୍ଥିକ ସ୍ୱାଧୀନତାର ସୁଯୋଗ ଦେବା ତାଙ୍କ କାର୍ଯ୍ୟର ଏକ ପ୍ରମୁଖ ଲକ୍ଷ୍ୟ ରହିଛି।

ଭର୍ଜିନିଆରୁ ପୁଣି ଜିତିଲେ ସୁହାସ ସୁବ୍ରମଣ୍ୟମ

ଭାରତୀୟ ବଂଶୋଦ୍ଭବ ଡେମୋକ୍ରାଟିକ୍ ନେତା ସୁହାସ ସୁବ୍ରମଣ୍ୟମ ଭର୍ଜିନିଆର ୧୦ତମ କଂଗ୍ରେସନାଲ୍ ଜିଲ୍ଲାରୁ ପୁନଃନିର୍ବାଚିତ ହୋଇଛନ୍ତି। ସେ ରିପବ୍ଲିକାନ୍ ପ୍ରାର୍ଥୀ ଡେଭ୍ ବେକ୍ୱିଥ୍‌ଙ୍କୁ ପରାସ୍ତ କରିଛନ୍ତି।

ସୁହାସ ୬୧.୫ ପ୍ରତିଶତରୁ ଅଧିକ ଭୋଟ୍ ପାଇଥିବା ବେଳେ ତାଙ୍କ ପ୍ରତିଦ୍ୱନ୍ଦ୍ୱୀ ପ୍ରାୟ ୩୬.୪ ପ୍ରତିଶତ ଭୋଟ୍ ପାଇଥିଲେ। ୪୦ ବର୍ଷୀୟ ସୁହାସ ପୂର୍ବତନ ଆମେରିକା ରାଷ୍ଟ୍ରପତି ବାରାକ ଓବାମାଙ୍କ ପ୍ରଶାସନରେ ପରାମର୍ଶଦାତା ଭାବେ କାମ କରିଥିଲେ। ତାଙ୍କ ପିତାମାତା ଭାରତୀୟ ବଂଶୋଦ୍ଭବ।

ମେରିଲ୍ୟାଣ୍ଡରେ ଅରୁଣା ମିଲରଙ୍କ ପୁନଃବିଜୟ

ଅନ୍ୟପଟେ ଭାରତର ହାଇଦ୍ରାବାଦରେ ଜନ୍ମିତ ଅରୁଣା ମିଲର ମେରିଲ୍ୟାଣ୍ଡର ଲେଫ୍ଟନାଣ୍ଟ ଗଭର୍ଣ୍ଣର ପଦବୀରେ ପୁଣିଥରେ ବିଜୟୀ ହୋଇଛନ୍ତି। ସେ ଡେମୋକ୍ରାଟିକ୍ ଗଭର୍ଣ୍ଣର ୱେସ୍ ମୁରଙ୍କ ସହ ନିର୍ବାଚନ ଲଢ଼ିଥିଲେ।

ମୁର୍ ଓ ମିଲରଙ୍କ ଯୋଡ଼ି ରିପବ୍ଲିକାନ୍ ପ୍ରାର୍ଥୀଙ୍କୁ ପରାସ୍ତ କରିଛି। ଏହି ବିଜୟ ମେରିଲ୍ୟାଣ୍ଡର ଉଚ୍ଚସ୍ତରୀୟ ପ୍ରଶାସନରେ ଭାରତୀୟ ବଂଶୋଦ୍ଭବଙ୍କ ପ୍ରତିନିଧିତ୍ୱକୁ ଆହୁରି ମଜବୁତ କରିଛି।

ଅନ୍ୟ ଭାରତୀୟ ବଂଶୋଦ୍ଭବ ପ୍ରାର୍ଥୀଙ୍କ ଉପରେ ନଜର

ଏହି ନିର୍ବାଚନରେ ଆହୁରି ଅନେକ ଭାରତୀୟ ବଂଶୋଦ୍ଭବ ପ୍ରାର୍ଥୀ ବିଭିନ୍ନ ପଦବୀ ପାଇଁ ମଇଦାନରେ ଅଛନ୍ତି। କାଲିଫର୍ଣ୍ଣିଆରୁ ରୋ ଖାନ୍ନା ଓ ଅମି ବେରା, ୱାଶିଂଟନ୍‌ରୁ ପ୍ରମିଳା ଜୟପାଲ, ଟେକ୍ସାସ୍‌ରୁ ପୂଜା ସେଠୀ ଏବଂ ଆରିଜୋନାରୁ ଅମିଶ ଶାହଙ୍କ ଫଳାଫଳକୁ ନେଇ ମଧ୍ୟ ନଜର ରହିଛି।

ଏହା ସହିତ ଓହାଇଓର ଗଭର୍ଣ୍ଣର ପଦବୀ ପାଇଁ ରିପବ୍ଲିକାନ୍ ପ୍ରାର୍ଥୀ ବିବେକ ରାମସ୍ୱାମୀ ଡେମୋକ୍ରାଟିକ୍ ପ୍ରାର୍ଥୀ ଏମି ଆକ୍ଟନଙ୍କ ସହ କଡ଼ା ମୁକାବିଲାରେ ଅଛନ୍ତି। ଏହି ନିର୍ବାଚନର ସମସ୍ତ ଫଳାଫଳ ଆସିବା ପରେ ଆମେରିକାର ରାଜନୀତିରେ ଭାରତୀୟ ବଂଶୋଦ୍ଭବଙ୍କ ପ୍ରତିନିଧିତ୍ୱର ସ୍ଥିତି ଆହୁରି ସ୍ପଷ୍ଟ ହେବ।

ଆମେରିକା ରାଜନୀତିରେ ବଢ଼ୁଛି ଭାରତୀୟଙ୍କ ପ୍ରଭାବ

ଆମେରିକାର ମଧ୍ୟବର୍ତ୍ତୀକାଳୀନ ନିର୍ବାଚନ କେବଳ ସ୍ଥାନୀୟ ପ୍ରତିନିଧି ବାଛିବା ପାଇଁ ନୁହେଁ; ଏହା କଂଗ୍ରେସରେ କେଉଁ ଦଳର ନିୟନ୍ତ୍ରଣ ରହିବ, ତାହା ମଧ୍ୟ ନିର୍ଣ୍ଣୟ କରିବ। ଏହି ପରିପ୍ରେକ୍ଷୀରେ ପିଆ, ସୁହାସ ଓ ଅରୁଣାଙ୍କ ବିଜୟ ଭାରତୀୟ ବଂଶୋଦ୍ଭବଙ୍କ ରାଜନୈତିକ ଉପସ୍ଥିତିକୁ ଆହୁରି ଦୃଶ୍ୟମାନ କରିଛି।