ନନ୍ଦନକାନନ ଜୁଲୋଜିକାଲ୍ ପାର୍କରେ ଉଦ୍ଧାର ହୋଇଥିବା ୫ ଓରାଙ୍ଗୁଟାନ୍‌ ଶାବକଙ୍କୁ ନେଇ ଚିନ୍ତା ବଢ଼ିଛି। ସେମାନଙ୍କ ମଧ୍ୟରୁ ଜଣେ ଶାବକଙ୍କୁ ସୋମବାର ଜ୍ୱର ହୋଇଥିବା ଜଣାପଡ଼ିଛି। ଏହା ପରେ ଡାକ୍ତରୀ ଟିମ୍‌ ସଜାଗ ହୋଇ ସମ୍ପୃକ୍ତ ଶାବକର ସ୍ୱାସ୍ଥ୍ୟକୁ ନିକଟରୁ ନିରୀକ୍ଷଣ କରୁଛି।

ଜ୍ୱରରେ ଆକ୍ରାନ୍ତ ଶାବକକୁ ବିଶେଷ ନଜରରେ ରଖାଯାଇଥିବାବେଳେ ଆବଶ୍ୟକ ଚିକିତ୍ସା ଓ ଯତ୍ନ ଯୋଗାଇ ଦିଆଯାଉଛି। ଅନ୍ୟ ୪ ଶାବକଙ୍କ ସ୍ୱାସ୍ଥ୍ୟ ଉପରେ ମଧ୍ୟ ନିୟମିତ ନଜର ରଖାଯାଉଛି।

୩ ଘଣ୍ଟାରେ ଥରେ ଖାଦ୍ୟ

ଓରାଙ୍ଗୁଟାନ୍‌ ଶାବକମାନଙ୍କୁ ଏବେ ପ୍ରାୟ ପ୍ରତି ୩ ଘଣ୍ଟାରେ ଥରେ ଖାଦ୍ୟ ଦିଆଯାଉଛି। ଗ୍ୟାସ୍‌ ସମସ୍ୟା ଦେଖାଦେବା ପରେ ସେମାନଙ୍କ ଖାଦ୍ୟ ଓ ଯତ୍ନ ବ୍ୟବସ୍ଥା ଉପରେ ବିଶେଷ ଧ୍ୟାନ ଦିଆଯାଉଛି।

ଶାବକମାନଙ୍କୁ ରଖାଯାଇଥିବା କ୍ୱାରେଣ୍ଟାଇନ୍‌ ରୁମ୍‌ ଚାରିପଟେ ତାର ଜାଲି ଲଗାଯାଇଛି। ଏହାଦ୍ୱାରା ମଶା ଭିତରକୁ ପ୍ରବେଶ ରୋକିବା ସହ ଶାବକମାନଙ୍କ ପାଇଁ ଅଧିକ ସୁରକ୍ଷିତ ପରିବେଶ ରଖିବାକୁ ଉଦ୍ୟମ କରାଯାଇଛି।

୫ ଓରାଙ୍ଗୁଟାନ୍‌ ପାଇଁ ଗଠିତ ବିଶେଷଜ୍ଞ କମିଟି

ଏହି ମଧ୍ୟରେ ୫ ଓରାଙ୍ଗୁଟାନ୍‌ ଶାବକଙ୍କ ସ୍ୱାସ୍ଥ୍ୟ, କଲ୍ୟାଣ ଓ ପରିଚାଳନା ଉପରେ ନଜର ରଖିବାକୁ ୫ ଜଣିଆ ବୈଷୟିକ କମିଟି ଗଠନ କରାଯାଇଛି। PCCFଙ୍କ ପକ୍ଷରୁ ଗଠିତ ଏହି କମିଟିରେ ଓରାଙ୍ଗୁଟାନ୍‌ ପାଳନ ଓ ଚିକିତ୍ସାର ଅଭିଜ୍ଞତା ଥିବା ବିଶେଷଜ୍ଞମାନେ ସାମିଲ ଅଛନ୍ତି।

ନନ୍ଦନକାନନର ନିର୍ଦ୍ଦେଶକଙ୍କୁ କମିଟିର କନଭେନର ଦାୟିତ୍ୱ ଦିଆଯାଇଛି। କମିଟି ଶାବକମାନଙ୍କ ଯତ୍ନ ଓ ପରିଚାଳନା ସମ୍ପର୍କରେ ବୈଷୟିକ ପରାମର୍ଶ ଦେବ।

୬ ମାସ ରହିବ କମିଟି

ଏହି ବୈଷୟିକ କମିଟି ପ୍ରାଥମିକ ଭାବେ ୬ ମାସ କାର୍ଯ୍ୟ କରିବ। ଆବଶ୍ୟକତା ଅନୁସାରେ ଏହାର କାର୍ଯ୍ୟକାଳ ବଢ଼ାଯାଇପାରେ। ଏହି ସମୟ ମଧ୍ୟରେ ବିଶେଷଜ୍ଞମାନେ ଓରାଙ୍ଗୁଟାନ୍‌ ଶାବକଙ୍କ ସ୍ୱାସ୍ଥ୍ୟ ଓ ଯତ୍ନ ବ୍ୟବସ୍ଥାର ସମୀକ୍ଷା କରି ପରାମର୍ଶ ଦେବେ।