ଭାରତର ଗଙ୍ଗା ନଦୀ କୂଳରେ ହେଉଥିବା ପ୍ରସିଦ୍ଧ ଗଙ୍ଗା ଆରତୀ ଏବେ ସାତ ସମୁଦ୍ର ପାର ହୋଇ ଲଣ୍ଡନର ଟେମ୍ସ ନଦୀ କୂଳରେ ପହଞ୍ଚିଛି। ରବିବାର ଲଣ୍ଡନରେ ପ୍ରଥମଥର ପାଇଁ ଟେମ୍ସ ନଦୀ କୂଳରେ ଗଙ୍ଗା ଆରତୀର ଆୟୋଜନ କରାଯାଇଥିଲା। ଏହାକୁ ନେଇ ସେଠାକାର ଭାରତୀୟ ଓ ହିନ୍ଦୁ ସମୁଦାୟ ମଧ୍ୟରେ ଉତ୍ସାହ ଦେଖାଦେଇଥିଲା।

ଚିନ୍ମୟ ମିଶନ ୟୁକେ ପକ୍ଷରୁ ବାର୍ଷିକ ‘ଟୋଟାଲି ଟେମ୍ସ’ ମହୋତ୍ସବର ସହଯୋଗରେ ‘ଗଙ୍ଗା ଆରତୀ ଅନ୍ ଦି ଟେମ୍ସ: ଏ ସେରିମନି ଅଫ୍ ଲାଇଟ୍’ ନାମରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। ଚିନ୍ମୟ ମିଶନର ୭୫ ବର୍ଷ ପୂର୍ତ୍ତି ଅବସରରେ ଏହି ବିଶ୍ୱସ୍ତରୀୟ କାର୍ଯ୍ୟକ୍ରମ ହୋଇଥିବା କୁହାଯାଇଛି।

ଭାରତର ଗଙ୍ଗା ଆରତୀର ଆଧ୍ୟାତ୍ମିକ ଭାବନାକୁ ଟେମ୍ସ ନଦୀ କୂଳରେ ମଧ୍ୟ ସମାନ ଭାବରେ ପ୍ରକାଶ କରାଯାଇଥିଲା। ନଦୀ, ପ୍ରକୃତି ଓ ଜୀବନ ପ୍ରତି କୃତଜ୍ଞତାର ପ୍ରତୀକ ଭାବେ ଲୋକମାନେ ଦୀପ ପ୍ରଜ୍ଜ୍ୱଳନ କରିଥିଲେ। ବହୁ ସଂଖ୍ୟକ ଲୋକ ଏହି ଆରତୀରେ ଅଂଶଗ୍ରହଣ କରିଥିଲେ।

ଚିନ୍ମୟ ମିଶନ ୟୁକେର ଆବାସିକ ଶିକ୍ଷୟିତ୍ରୀ ବ୍ରହ୍ମଚାରିଣୀ ଶ୍ରୀପ୍ରିୟା ଚୈତନ୍ୟ କହିଛନ୍ତି ଯେ, ପିଢ଼ି ପରେ ପିଢ଼ି ଲୋକମାନେ ଗଙ୍ଗା କୂଳରେ ଏକାଠି ହୋଇ ଦୀପ ଜାଳି ନଦୀ ଓ ପ୍ରକୃତି ପ୍ରତି କୃତଜ୍ଞତା ପ୍ରକାଶ କରିଆସୁଛନ୍ତି। ଟେମ୍ସ ନଦୀରେ ଆୟୋଜିତ ଆରତୀ ମଧ୍ୟ ସେହି ଭାବନାକୁ ପ୍ରତିଫଳିତ କରିଥିବା ସେ କହିଛନ୍ତି।

ଚିନ୍ମୟ ମିଶନର ଆଧ୍ୟାତ୍ମିକ ଦୃଷ୍ଟିକୋଣରେ ଗଙ୍ଗାକୁ ଜ୍ଞାନର ପ୍ରବାହର ପ୍ରତୀକ ଭାବେ ଦେଖାଯାଏ। ସଂଗଠନର ପ୍ରତିଷ୍ଠାତା ସ୍ୱାମୀ ଚିନ୍ମୟାନନ୍ଦ ବେଦାନ୍ତର ଜ୍ଞାନକୁ ସାଧାରଣ ଲୋକଙ୍କ ଦୈନନ୍ଦିନ ଜୀବନ ସହ ଯୋଡ଼ିବା ପାଇଁ ନିଜ ଜୀବନ ଉତ୍ସର୍ଗ କରିଥିଲେ।

ଏହି ଆରତୀ ମାଧ୍ୟମରେ ପ୍ରକୃତି ପ୍ରତି କୃତଜ୍ଞତା ସହ ତାହାର ସୁରକ୍ଷା ଓ ଯତ୍ନର ବାର୍ତ୍ତା ମଧ୍ୟ ଦିଆଯାଇଛି। କେବଳ ପ୍ରାର୍ଥନା ନୁହେଁ, ପରିବେଶ ପ୍ରତି ଦାୟିତ୍ୱବୋଧ ମଧ୍ୟ ପ୍ରକୃତି ପ୍ରତି କୃତଜ୍ଞତାର ଏକ ଅଂଶ ବୋଲି ଆୟୋଜକମାନେ ଉଲ୍ଲେଖ କରିଛନ୍ତି।

୧୯୫୧ ମସିହାରେ ପ୍ରତିଷ୍ଠିତ ଚିନ୍ମୟ ମିଶନ ଏକ ବିଶ୍ୱସ୍ତରୀୟ ଆଧ୍ୟାତ୍ମିକ ଆନ୍ଦୋଳନ। ବର୍ତ୍ତମାନ ବିଶ୍ୱର ବିଭିନ୍ନ ଦେଶରେ ଏହାର ୩୫୦ରୁ ଅଧିକ କେନ୍ଦ୍ର ରହିଛି।