ଭୁବନେଶ୍ୱର: MMDR ବିଲ୍‌କୁ ନେଇ ଓଡ଼ିଶାରେ ରାଜନୀତି ଆହୁରି ତୀବ୍ର ହୋଇଛି। ବିଜେଡି ସାମ୍ବାଦିକ ସମ୍ମିଳନୀ କରି ବିଲ୍‌ର ପ୍ରଭାବ ନେଇ ସରକାରଙ୍କୁ ପ୍ରଶ୍ନ କରିଛି।

ବିଜେଡି ବିଧାୟକ ଅରୁଣ ସାହୁ କହିଛନ୍ତି, MMDR ବିଲ୍‌କୁ ନେଇ ରାଜ୍ୟର ସ୍ୱାର୍ଥ ସହ ଜଡ଼ିତ ବିଷୟରେ ସରକାରଙ୍କୁ ସ୍ପଷ୍ଟତା ଦେବା ଆବଶ୍ୟକ। ଏଥିପାଇଁ ସର୍ବଦଳୀୟ ବୈଠକ ଡାକିବା ସହ ସ୍ୱତନ୍ତ୍ର ବିଧାନସଭା ଅଧିବେଶନ କରି ଆଲୋଚନା କରାଯାଉ ବୋଲି ସେ ଦାବି କରିଛନ୍ତି।

ଅରୁଣ ସାହୁଙ୍କ ଅଭିଯୋଗ ଅନୁସାରେ, ବିରୋଧୀ ଦଳର ନେତା ନବୀନ ପଟ୍ଟନାୟକ ଏନେଇ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ ମଧ୍ୟ ଏପର୍ଯ୍ୟନ୍ତ ଉତ୍ତର ମିଳିନାହିଁ। ରାଜ୍ୟର ଖଣି ଓ ଖଣିଜ ସମ୍ପଦ ସମ୍ପର୍କିତ ଅଧିକାରରେ ପରିବର୍ତ୍ତନ ଓଡ଼ିଶାର ସ୍ୱାର୍ଥକୁ କିପରି ପ୍ରଭାବିତ କରିବ, ସେନେଇ ସରକାର ସ୍ପଷ୍ଟ କରିବା ଦରକାର ବୋଲି ବିଜେଡି କହିଛି।

ଖଣିଜ ସମ୍ପଦ ଯୋଗୁଁ ଓଡ଼ିଶାକୁ ନିବେଶ ଆସୁଥିବା ବେଳେ ଅଧିକାର ସମ୍ପର୍କିତ ପରିବର୍ତ୍ତନ ପରେ ନିବେଶ ଆକର୍ଷଣ ନେଇ ମଧ୍ୟ ଅରୁଣ ସାହୁ ପ୍ରଶ୍ନ ଉଠାଇଛନ୍ତି। ଯଦି MMDR ବିଲ୍ ରାଜ୍ୟର ସ୍ୱାର୍ଥରେ ରହିଛି, ତେବେ ଏହାକୁ ନେଇ ସର୍ବଦଳୀୟ ଆଲୋଚନା କରିବାରେ ଅସୁବିଧା କଣ ବୋଲି ସେ ପ୍ରଶ୍ନ କରିଛନ୍ତି।

ଅନ୍ୟପଟେ, ବିଜେଡିର ଅଭିଯୋଗକୁ ବିଜେପି ନେତା ତଥା ପୂର୍ବତନ ସାଂସଦ ଅମର ପଟ୍ଟନାୟକ ଖଣ୍ଡନ କରିଛନ୍ତି। ବିଜେଡି ରାଜନୈତିକ ଫାଇଦା ପାଇଁ ଲୋକଙ୍କୁ ବିଭ୍ରାନ୍ତ କରୁଛି ବୋଲି ସେ ଅଭିଯୋଗ କରିଛନ୍ତି। ତାଙ୍କ ମତରେ, ବିଲ୍‌ର ପ୍ରଭାବରେ ସ୍ୱଳ୍ପମିଆଦିରେ କିଛି କ୍ଷତି ହୋଇପାରେ, କିନ୍ତୁ ଦୀର୍ଘମିଆଦିରେ ଓଡ଼ିଶା ଲାଭ ପାଇବ।

ଏହାକୁ ନେଇ MMDR ବିଲ୍‌କୁ କେନ୍ଦ୍ର କରି ବିଜେଡି ଓ ବିଜେପି ମଧ୍ୟରେ ରାଜନୈତିକ ବିବାଦ ଆହୁରି ତୀବ୍ର ହୋଇଛି।