ବିଶ୍ୱର ଅନ୍ୟତମ ପ୍ରମୁଖ ଟେକ୍ନୋଲୋଜି କମ୍ପାନୀ ମାଇକ୍ରୋସଫ୍ଟ ନିଜ କାର୍ଯ୍ୟବଳରେ ବଡ଼ ପରିବର୍ତ୍ତନ ଆଣିବାକୁ ଯାଉଛି। କମ୍ପାନୀ ପ୍ରାୟ ୬୦,୦୦୦ କର୍ମଚାରୀଙ୍କୁ ସ୍ୱେଚ୍ଛାକୃତ ବାଏଆଉଟ୍ ଅଫର୍ ଦେଇଛି। ଏହି ପ୍ରୋଗ୍ରାମ୍ ଭାରତ, ଆମେରିକା, ବ୍ରିଟେନ୍ ଓ କାନାଡାର ଚୟନିତ ଟିମ୍‌ରେ ଲାଗୁ ହେବ। 

ମାଇକ୍ରୋସଫ୍ଟର Chief People Officer Amy Coleman କର୍ମଚାରୀମାନଙ୍କୁ ଏକ ଆଭ୍ୟନ୍ତରୀଣ ମେମୋ ମାଧ୍ୟମରେ ନୂଆ Voluntary Exit Offer (VEO) ବିଷୟରେ ଜଣାଇଛନ୍ତି। ଏହି ଅଫର୍‌ର ଉଦ୍ଦେଶ୍ୟ ହେଉଛି, ଯେଉଁ କର୍ମଚାରୀମାନେ ମାଇକ୍ରୋସଫ୍ଟ ବାହାରେ ନିଜ କ୍ୟାରିୟରର ନୂଆ ସୁଯୋଗ ଖୋଜୁଛନ୍ତି, ସେମାନଙ୍କୁ ଆର୍ଥିକ ସହାୟତା ଓ କ୍ୟାରିୟର ପ୍ଲାନିଂ ସହିତ କମ୍ପାନୀ ଛାଡ଼ିବାର ବିକଳ୍ପ ଦେବା। 

ଏହି ପ୍ରୋଗ୍ରାମ୍‌ରେ ମାଇକ୍ରୋସଫ୍ଟର ଲେଭେଲ୍ ୭୦ ଓ ତା’ଠାରୁ ତଳସ୍ଥରର ଯୋଗ୍ୟ କର୍ମଚାରୀମାନେ ସାମିଲ ହୋଇପାରିବେ। ତେବେ ସମସ୍ତ ବିଭାଗ ଏଥିରେ ସାମିଲ ନୁହେଁ। ରିପୋର୍ଟ ଅନୁସାରେ AI Experiences, Copilot, Windows + Devices, Xbox, Finance ଓ Human Resources ଭଳି କିଛି ଟିମ୍‌ରେ ଏହି ଅଫର୍ ଉପଲବ୍ଧ ହେବ। 

ଅନ୍ୟପକ୍ଷରେ, କିଛି ଡାଟା ସେଣ୍ଟର, ସେଲ୍ସ, ମାର୍କେଟିଂ, ସିକ୍ୟୁରିଟି ଓ ଅନ୍ୟାନ୍ୟ ବିଭାଗ ଏହି ପ୍ରୋଗ୍ରାମ୍‌ରୁ ବାହାରେ ରହିପାରନ୍ତି। କେଉଁ ଟିମ୍‌ରେ ଅଫର୍ ଲାଗୁ ହେବ, ତାହା ବ୍ୟବସାୟିକ ପ୍ରାଥମିକତା, ଗ୍ରାହକ ଆବଶ୍ୟକତା ଓ workforce needs ଉପରେ ନିର୍ଭର କରିବ। 

ମାଇକ୍ରୋସଫ୍ଟର ଏହି ପଦକ୍ଷେପ ପଛରେ AI ଉପରେ ବଢ଼ୁଥିବା ବିପୁଳ ନିବେଶ ଏବଂ କାର୍ଯ୍ୟବଳ ପୁନର୍ଗଠନ ଏକ ପ୍ରମୁଖ କାରଣ ଭାବେ ଦେଖାଯାଉଛି। କମ୍ପାନୀ ଏହାର AI ଭିତ୍ତିଭୂମି ଓ ଡାଟା ସେଣ୍ଟରରେ ବଡ଼ ଧରଣର ନିବେଶ କରୁଥିବା ବେଳେ ଅନ୍ୟ କ୍ଷେତ୍ରରେ ଖର୍ଚ୍ଚ ଓ କର୍ମଚାରୀ ସଂଖ୍ୟାକୁ ପୁନଃସମୀକ୍ଷା କରୁଛି। 

ଜୁନ୍ ଶେଷ ସୁଦ୍ଧା ମାଇକ୍ରୋସଫ୍ଟରେ ପ୍ରାୟ ୨,୨୩,୦୦୦ ଫୁଲ୍-ଟାଇମ୍ କର୍ମଚାରୀ ଥିଲେ। ଏହି ହିସାବରେ ୬୦,୦୦୦ କର୍ମଚାରୀଙ୍କ ପାଇଁ ଅଫର୍ କମ୍ପାନୀର ମୋଟ workforceର ପ୍ରାୟ ଏକ-ଚତୁର୍ଥାଂଶରୁ ଅଧିକ। 

ଏହା ମାଇକ୍ରୋସଫ୍ଟର ୨୦୨୬ର ଦ୍ୱିତୀୟ ବଡ଼ voluntary exit initiative। ଏହା ପୂର୍ବରୁ କମ୍ପାନୀ ପ୍ରାୟ ୮,୭୫୦ କର୍ମଚାରୀଙ୍କ ପାଇଁ ଏକ voluntary retirement programme ଆରମ୍ଭ କରିଥିଲା, ଯେଉଁଥିରେ ୩୦ ପ୍ରତିଶତରୁ ଅଧିକ ଯୋଗ୍ୟ କର୍ମଚାରୀ ଅଫର୍ ଗ୍ରହଣ କରିଥିଲେ। 

ନୂଆ VEO ପାଇଁ ଯୋଗ୍ୟ କର୍ମଚାରୀମାନଙ୍କୁ ବ୍ୟକ୍ତିଗତ ଅଫର୍‌ର ବିବରଣୀ ଇମେଲ୍‌ରେ ପଠାଯିବ। ରିପୋର୍ଟ ଅନୁସାରେ, ଯୋଗ୍ୟ କର୍ମଚାରୀମାନେ ଡିସେମ୍ବର ଆରମ୍ଭ ସୁଦ୍ଧା ନିଷ୍ପତ୍ତି ନେବେ ଏବଂ ଅଫର୍ ଗ୍ରହଣ କରୁଥିବା କର୍ମଚାରୀମାନଙ୍କ ବିଦାୟ ବର୍ଷ ଶେଷରେ ହେବାର ସମ୍ଭାବନା ରହିଛି।