ଚଳିତ ଫିଫା ଫୁଟବଲ୍ ବିଶ୍ୱକପ୍-୨୦୨୬ର ଉତ୍ସାହ ସାରା ବିଶ୍ୱର ଫୁଟବଲ୍ ପ୍ରେମୀଙ୍କୁ ଆକର୍ଷିତ କରିଥିବା ବେଳେ ଏହାର ପ୍ରଭାବ ଏବେ ନବଜାତ ଶିଶୁଙ୍କ ନାମକରଣରେ ମଧ୍ୟ ଦେଖିବାକୁ ମିଳୁଛି। ଲାଟିନ୍ ଆମେରିକାର ପେରୁ, ମେକ୍ସିକୋ ଓ ଆର୍ଜେଣ୍ଟିନାରେ ହଜାର ହଜାର ଅଭିଭାବକ ନିଜ ସନ୍ତାନଙ୍କ ନାମ ଫୁଟବଲ୍ ତାରକାଙ୍କ ନାମରେ ରଖୁଛନ୍ତି।

ପେରୁର ଜାତୀୟ ନାଗରିକ ପଞ୍ଜୀକରଣ ସଂସ୍ଥା 'ରେନିଏକ୍' (RENIEC)ର ସୂଚନା ଅନୁସାରେ, ଶତାଧିକ ନବଜାତ ଶିଶୁଙ୍କ ନାମ 'ହାଲାଣ୍ଡ' ରଖାଯାଇଛି। ଏହାଛଡ଼ା, ଲିଓନେଲ୍ ମେସି, ନେମାର୍ ଓ କ୍ରିଷ୍ଟିଆନୋ ରୋନାଲ୍ଡୋଙ୍କ ନାମରେ ପ୍ରାୟ ୩୦ ହଜାର ଲେଖାଏଁ ପଞ୍ଜୀକରଣ ହୋଇଥିବା ଜଣାପଡ଼ିଛି।

ପେରୁ ଫିଫା ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିପାରିନଥିଲେ ମଧ୍ୟ ନରୱେର ତାରକା ଷ୍ଟ୍ରାଇକର୍ ଏର୍ଲିଂ ହାଲାଣ୍ଡଙ୍କ ଦମଦାର ପ୍ରଦର୍ଶନ ସେଠାରେ ତାଙ୍କୁ ବିପୁଳ ଲୋକପ୍ରିୟତା ଦେଇଛି।

ଅନ୍ୟପଟେ, ମେକ୍ସିକୋରେ ଜଣେ ନବଜାତ କନ୍ୟା ଶିଶୁଙ୍କ ନାମ 'କୁଇନୋନା ୟସିସିଦ୍ରା ମୋରିତା ହାଲାଣ୍ଡ ଗୁଏଭାରା' ରଖାଯାଇଥିବା ଜନ୍ମ ପ୍ରମାଣପତ୍ର ସାମାଜିକ ଗଣମାଧ୍ୟମରେ ଭାଇରାଲ୍ ହୋଇଛି। ଏହି ନାମରେ ମେକ୍ସିକୋର ଦୁଇ ଫୁଟବଲର୍ ଏବଂ ଏର୍ଲିଂ ହାଲାଣ୍ଡଙ୍କ ନାମକୁ ମିଶାଯାଇଥିବା ଦେଖିବାକୁ ମିଳିଛି।

ସେହିପରି ଆର୍ଜେଣ୍ଟିନାର ସାଲ୍ଟା ପ୍ରଦେଶରେ ବିଶ୍ୱକପ୍ ଫାଇନାଲ୍ ପୂର୍ବରୁ ଏନ୍ଜୋ, ଏମିଲିଆନୋ ଏବଂ ଲିଓନେଲ୍ ନାମ ସବୁଠାରୁ ଲୋକପ୍ରିୟ ଶିଶୁ ନାମ ଭାବେ ଉଭା ହୋଇଛି। ଏଥିପାଇଁ ଆର୍ଜେଣ୍ଟିନା ଦଳର ଚମତ୍କାର ପ୍ରଦର୍ଶନକୁ ଶ୍ରେୟ ଦିଆଯାଉଛି।

ଫୁଟବଲ୍ ତାରକାଙ୍କ ନାମରେ ଶିଶୁଙ୍କ ନାମକରଣ କରିବା ଲାଟିନ୍ ଆମେରିକାରେ କୌଣସି ନୂଆ ପରମ୍ପରା ନୁହେଁ। ୧୯୮୬ ବିଶ୍ୱକପ୍ ପରେ ଡିଏଗୋ ମାରାଡୋନାଙ୍କ ଲୋକପ୍ରିୟତା ଯୋଗୁଁ ମଧ୍ୟ ଏଭଳି ନାମକରଣର ଲହରୀ ଦେଖିବାକୁ ମିଳିଥିଲା। ଏବେ ପୁଣିଥରେ ମେସି ଓ ହାଲାଣ୍ଡଙ୍କ ଲୋକପ୍ରିୟତା ଏହି ପରମ୍ପରାକୁ ନୂଆ ମାତ୍ରା ଦେଇଛି।