ତୃଣମୂଳ କଂଗ୍ରେସ (ଟିଏମସି) ମୁଖ୍ୟ ଏବଂ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଙ୍ଗଳବାର କୋଲକାତାରେ ଆୟୋଜିତ ଏକ ଦଳୀୟ କାର୍ଯ୍ୟକ୍ରମରେ ଦଳ ଛାଡ଼ି ବିଜେପିରେ ଯୋଗଦେଇଥିବା ନେତାମାନଙ୍କ ଉପରେ କଡ଼ା ଆକ୍ରମଣ କରିଛନ୍ତି।

ମମତା କହିଛନ୍ତି ଯେ, ଟିଏମସିର ନିର୍ବାଚନୀ ଚିହ୍ନରେ ଜିତିଥିବା କିଛି ନେତା ତାଙ୍କ ବିଶ୍ୱାସ ସହ ବିଶ୍ୱାସଘାତ କରି ବିଜେପିରେ ଯୋଗ ଦେଇଛନ୍ତି। ସେ କହିଛନ୍ତି, "ମୋ ପିଠିରେ ଛୁରୀ ମାରି ସବୁ ଚୋର ବିଜେପିରେ ମିଶିଗଲେ। ସେମାନଙ୍କୁ ମୁଁ କେବେ ବି ଆଉ ଟିଏମସିକୁ ଫେରାଇ ନେବି ନାହିଁ।"

ସେ ବିଜେପି ଉପରେ ଆଉ ଏକ ଗୁରୁତର ଅଭିଯୋଗ ଆଣି କହିଛନ୍ତି ଯେ, ରାମ ମନ୍ଦିରର ଦାନ ଅର୍ଥକୁ ନେଇ ମଧ୍ୟ ଦୁର୍ନୀତି ହୋଇଛି। ଏହା ସହ ସେ ଦାବି କରିଛନ୍ତି ଯେ, ଦିନେ ବିଜେପିର କଥିତ ଭୋଟ ଜାଲିଆତିର ସତ୍ୟ ପଦାକୁ ଆସିବ।

ଦିଲ୍ଲୀରେ ଚାଲିଥିବା ବିରୋଧୀ ଦଳର ଆନ୍ଦୋଳନକୁ ସମର୍ଥନ କରି ମମତା କହିଛନ୍ତି ଯେ, ଆବଶ୍ୟକ ପଡ଼ିଲେ ସେ ବ୍ୟକ୍ତିଗତ ଭାବେ ମଧ୍ୟ ଏହି ଆନ୍ଦୋଳନରେ ଯୋଗଦେବେ। ଆରମ୍ଭରୁ ସେ ଏହି ଆନ୍ଦୋଳନକୁ ସମର୍ଥନ କରିଆସୁଛନ୍ତି ଏବଂ ଆଗକୁ ମଧ୍ୟ ସମର୍ଥନ ଜାରି ରଖିବେ ବୋଲି କହିଛନ୍ତି।

ସେହିପରି ବିରୋଧୀ ଏକତା ଉପରେ ଜୋର ଦେଇ ମମତା କହିଛନ୍ତି ଯେ, ବିଜେପିକୁ ମୁକାବିଲା କରିବା ପାଇଁ ସିପିଏମ, କଂଗ୍ରେସ ସମେତ ସମସ୍ତ ବିରୋଧୀ ଦଳକୁ ଏକାଠି ହେବା ଆବଶ୍ୟକ। ବ୍ୟକ୍ତିଗତ ମତଭେଦ ଭୁଲି ଦେଶର ଗଣତନ୍ତ୍ର ସୁରକ୍ଷା ପାଇଁ ସମସ୍ତେ ଏକଜୁଟ ହେବାକୁ ସେ ଆହ୍ୱାନ ଦେଇଛନ୍ତି।