ନୂଆଦିଲ୍ଲୀ: ମାଲେସିଆ ଯିବାକୁ ଯୋଜନା କରୁଥିବା ଭାରତୀୟଙ୍କ ପାଇଁ ଆସିଛି ଏକ ଗୁରୁତ୍ୱପୂର୍ଣ୍ଣ ସତର୍କତା। କୁଆଲାଲମ୍ପୁରସ୍ଥିତ ଭାରତୀୟ ହାଇ କମିଶନ ଭାରତୀୟ ନାଗରିକଙ୍କୁ ମାଲେସିଆର ୩୦ ଦିନିଆ ଭିସା-ଫ୍ରି ଏଣ୍ଟ୍ରି ସୁବିଧାରେ ଯାଇ ଚାକିରି ଖୋଜିବା କିମ୍ବା କାମ କରିବାରୁ ବିରତ ରହିବାକୁ କହିଛି। ଏହି ସୁବିଧା କେବଳ ପର୍ଯ୍ୟଟନ ଓ ସାମାଜିକ ଯାତ୍ରା ପାଇଁ ଉଦ୍ଦିଷ୍ଟ, ଚାକିରି ପାଇଁ ନୁହେଁ।

ହାଇ କମିଶନ କହିଛି ଯେ ନକଲି ଚାକିରିର ପ୍ରତିଶ୍ରୁତି ଦେଇ କିଛି ଏଜେଣ୍ଟ ଭାରତୀୟ ନାଗରିକଙ୍କୁ ମାଲେସିଆ ନେଉଛନ୍ତି। ଏଭଳି ମାମଲାରେ ଭିସା ଅବଧି ଶେଷ ହୋଇଯିବା, ଅବୈଧ ଭାବେ ରହିବା, ଶ୍ରମିକ ଶୋଷଣ, ଅଟକ ଏବଂ ଆଇନଗତ କାର୍ଯ୍ୟାନୁଷ୍ଠାନ ଭଳି ସମସ୍ୟା ହୋଇପାରେ।

ଭାରତୀୟ ହାଇ କମିଶନ ସ୍ପଷ୍ଟ କରିଛି ଯେ ମାଲେସିଆରେ ଚାକିରି କରିବାକୁ ହେଲେ ଉପଯୁକ୍ତ Work Permit କିମ୍ବା Visa with Reference (VDR) ଆବଶ୍ୟକ। ପର୍ଯ୍ୟଟନ ପାଇଁ ମିଳୁଥିବା ଭିସା-ଫ୍ରି ଏଣ୍ଟ୍ରି ମାଧ୍ୟମରେ ଚାକିରି କରିବା ମାଲେସିଆର ଇମିଗ୍ରେସନ୍ ନିୟମର ଉଲ୍ଲଂଘନ ହେବ।

ପର୍ଯ୍ୟଟନ ପାଇଁ ମାଲେସିଆ ଯାଉଥିବା ଭାରତୀୟଙ୍କୁ ଫେରିବା ଟିକେଟ୍, ହୋଟେଲ୍ ବୁକିଂ ଏବଂ Malaysia Digital Arrival Card (MDAC) ଯାତ୍ରାର ୩ ଦିନ ପୂର୍ବରୁ ଅନଲାଇନ୍ ଦାଖଲ କରିବା ସହ ପାସପୋର୍ଟର ଅତିକମରେ ୬ ମାସର ବୈଧତା ରଖିବାକୁ କୁହାଯାଇଛି।

ଭାରତୀୟ ହାଇ କମିଶନ ପୂର୍ବରୁ ମଧ୍ୟ ଏଜେଣ୍ଟମାନେ ଟୁରିଷ୍ଟ ଭିସାକୁ ପରେ ୱର୍କ ପରମିଟ୍‌ରେ ପରିଣତ କରିଦେବେ ବୋଲି କହୁଥିବା ଦାବି ଉପରେ ସତର୍କ କରିଛି। ଏଭଳି ପ୍ରତିଶ୍ରୁତିରେ ବିଶ୍ୱାସ ନକରିବାକୁ ମଧ୍ୟ କୁହାଯାଇଛି।