ମହାନଦୀ ଓ ପାଇକା ନଦୀରେ ବନ୍ୟା ପରିସ୍ଥିତି ଉଗ୍ର ରୂପ ନେବା ସହ ଜଗତସିଂହପୁର ଜିଲ୍ଲାର କୁଜଙ୍ଗ ବ୍ଲକର ପାଞ୍ଚଟି ଗାଁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡ଼ିଛି। ବନ୍ୟାଜଳ ଘର, ରାସ୍ତା ଓ ଚାଷଜମିରେ ପ୍ରବେଶ କରିବାରୁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇଯାଇଛି।

ପ୍ରାଥମିକ ସୂଚନା ଅନୁସାରେ, ସାଇଲୋ ପଞ୍ଚାୟତର ହରିପୁର, ତାଳଦଣ୍ଡାର ମଧୁପୁର, ଝିଲାନାସି ପଞ୍ଚାୟତର ସହରାଡ଼ିହା ଏବଂ ବାଳିକାଣି ପଞ୍ଚାୟତର କାଳିକୁଦା ଓ ଚୌଧୁରୀକୁଦା ଗାଁ ସମ୍ପୂର୍ଣ୍ଣ ଜଳଘେରରେ ରହିଛି।

ଗାଁଗୁଡ଼ିକରେ ବନ୍ୟାଜଳ ପ୍ରବେଶ କରିବାରୁ ଲୋକମାନଙ୍କ ଦୈନନ୍ଦିନ ଜୀବନ ପ୍ରଭାବିତ ହୋଇଛି। ଯାତାୟାତ ବନ୍ଦ ହୋଇଥିବାବେଳେ ଲୋକମାନେ ଘରେ ଅବରୁଦ୍ଧ ଅବସ୍ଥାରେ ରହିଛନ୍ତି।

ପ୍ରଶାସନ ପକ୍ଷରୁ ମଧୁପୁର ୟୁପି ସ୍କୁଲ ଏବଂ ସାଇଲୋ ପଞ୍ଚାୟତ କାର୍ଯ୍ୟାଳୟରେ ରିଲିଫ୍ ଶିବିର ଖୋଲାଯାଇଛି। ସୁରକ୍ଷା ଦୃଷ୍ଟିରୁ ପ୍ରାୟ ୬୦ରୁ ୬୫ ଜଣଙ୍କୁ ସେଠାକୁ ସ୍ଥାନାନ୍ତର କରାଯାଇଛି।

ବନ୍ୟା ପ୍ରଭାବିତ ଅଞ୍ଚଳରେ ଯାତାୟାତ ପାଇଁ ୫ଟି ବଡ଼ ଡଙ୍ଗା ଓ ଗାଁ ଭିତରେ ଚଳାଚଳ ପାଇଁ ୬ଟି ଛୋଟ ଡଙ୍ଗା ନିୟୋଜିତ କରାଯାଇଛି। ଏହାଦ୍ୱାରା ଲୋକମାନଙ୍କୁ ଆବଶ୍ୟକ ସାମଗ୍ରୀ ଓ ଜରୁରୀ ସେବା ପହଞ୍ଚାଯାଉଛି।

ପ୍ରଶାସନ ପକ୍ଷରୁ ଶୁଖିଲା ଖାଦ୍ୟ, ଗୋ-ଖାଦ୍ୟ ଓ ଅନ୍ୟାନ୍ୟ ଆବଶ୍ୟକ ସାମଗ୍ରୀ ବଣ୍ଟନ କରାଯାଉଛି। ବନ୍ୟାରେ ଚାଷଜମି ଓ ଫସଲର ବ୍ୟାପକ କ୍ଷତି ହୋଇଥିବା ସୂଚନା ମିଳିଛି।

ରାଜ୍ୟ ମନ୍ତ୍ରୀ ସମ୍ପଦ ସ୍ୱାଇଁ ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନ କରି ସ୍ଥିତିର ସମୀକ୍ଷା କରିଛନ୍ତି। ପ୍ରଶାସନ ମହାନଦୀ ଓ ପାଇକା ନଦୀର ଜଳସ୍ତର ଉପରେ ନଜର ରଖିଥିବାବେଳେ ଆବଶ୍ୟକ ପଡ଼ିଲେ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ ବୋଲି ସୂଚନା ମିଳିଛି।