ଘରୋଇ LPG ଗ୍ରାହକଙ୍କ ପାଇଁ ଅକ୍ଟୋବର ୧, ୨୦୨୬ରୁ ନୂଆ ନିୟମ ଲାଗୁ ହେବ। ସରକାରଙ୍କ ନିର୍ଦ୍ଦେଶ ଅନୁସାରେ, ନିୟନ୍ତ୍ରିତ ଖୁଚୁରା ମୂଲ୍ୟ (RSP)ରେ ସବସିଡି ସହ LPG ରିଫିଲ୍‌ ବୁକ୍‌ କରିବାକୁ ଆଧାର ବାୟୋମେଟ୍ରିକ୍‌ ଅଥେଣ୍ଟିକେସନ୍‌ ସମ୍ପୂର୍ଣ୍ଣ କରିବା ଆବଶ୍ୟକ।

ସେପ୍ଟେମ୍ବର ୧୯, ୨୦୨୬ ପର୍ଯ୍ୟନ୍ତ ପ୍ରାୟ ୨୭.୪୩ କୋଟି ସକ୍ରିୟ ଘରୋଇ LPG ଗ୍ରାହକ, ଅର୍ଥାତ୍‌ ୮୯.୯% ଗ୍ରାହକ ଏହି ବାୟୋମେଟ୍ରିକ୍‌ ଯାଞ୍ଚ ସମ୍ପୂର୍ଣ୍ଣ କରିସାରିଥିଲେ। ଏମାନଙ୍କୁ ପୁଣି ଥରେ ଯାଞ୍ଚ କରିବାକୁ ପଡ଼ିବ ନାହିଁ।

କାହାକୁ ଯାଞ୍ଚ କରିବାକୁ ପଡ଼ିବ?

ଯେଉଁ ଘରୋଇ LPG ଗ୍ରାହକମାନେ ଏପର୍ଯ୍ୟନ୍ତ Biometric Aadhaar Authentication (BAA) କରିନାହାନ୍ତି, ସେମାନଙ୍କୁ ସବସିଡି ସହିତ ରିଫିଲ୍‌ ପାଇଁ ଏହି ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ହେବ।

କେମିତି କରିବେ ଆଧାର ବାୟୋମେଟ୍ରିକ୍‌ ଯାଞ୍ଚ?

ଗ୍ରାହକମାନେ ତିନୋଟି ଉପାୟରେ BAA କରିପାରିବେ—

• LPG ସିଲିଣ୍ଡର ଡେଲିଭରି ସମୟରେ: ଡେଲିଭରି କର୍ମଚାରୀ OMC ମୋବାଇଲ୍‌ ଆପ୍‌ ମାଧ୍ୟମରେ ଯାଞ୍ଚ କରିପାରିବେ।
• ଡିଷ୍ଟ୍ରିବ୍ୟୁଟରଙ୍କ ଶୋ’ରୁମ୍‌ରେ: ନିଜ LPG ଡିଷ୍ଟ୍ରିବ୍ୟୁଟରଙ୍କ ପାଖକୁ ଯାଇ ପ୍ରକ୍ରିୟା ସମ୍ପୂର୍ଣ୍ଣ କରିହେବ।
• ମୋବାଇଲ୍‌ ଆପ୍‌ ମାଧ୍ୟମରେ: Indane ପାଇଁ IndianOil ONE, Bharatgas ପାଇଁ HelloBPCL ଏବଂ HP Gas ପାଇଁ HP PAY ବ୍ୟବହାର କରିପାରିବେ।

ଆଧାର ଯାଞ୍ଚ ନକଲେ LPG ବନ୍ଦ ହେବ କି?

ନା। ଆଧାର ବାୟୋମେଟ୍ରିକ୍‌ ଅଥେଣ୍ଟିକେସନ୍‌ ନକରିଲେ LPG ସିଲିଣ୍ଡର ସମ୍ପୂର୍ଣ୍ଣ ବନ୍ଦ ହେବ ନାହିଁ। କିନ୍ତୁ ସବସିଡିଯୁକ୍ତ ଦରରେ ରିଫିଲ୍‌ ପାଇବାର ସୁବିଧା ମିଳିବ ନାହିଁ। ଏପରି ଗ୍ରାହକଙ୍କୁ ଲାଗୁଥିବା ବଜାର ଦରରେ LPG ଯୋଗାଇ ଦିଆଯିବ, ନିର୍ଦ୍ଦିଷ୍ଟ OMC ନିୟମ ଓ ଉପଲବ୍ଧତା ଅନୁସାରେ।

ସରକାରଙ୍କ ଅନୁସାରେ, ଏହି ବ୍ୟବସ୍ଥାର ଉଦ୍ଦେଶ୍ୟ ସବସିଡିର ଲାଭ ପ୍ରକୃତ ଓ ଯୋଗ୍ୟ ଗ୍ରାହକଙ୍କ ପାଖରେ ପହଞ୍ଚାଇବା, ଡୁପ୍ଲିକେଟ୍‌ ଓ ଅଯୋଗ୍ୟ କନେକ୍ସନ୍‌ ଚିହ୍ନଟ କରିବା ଏବଂ ଘରୋଇ LPGର ବାଣିଜ୍ୟିକ ବ୍ୟବହାରକୁ ରୋକିବା।

ସେପ୍ଟେମ୍ବର ୨୦୨୬ରେ ୧୪.୨ କେଜି ଘରୋଇ LPG ସିଲିଣ୍ଡର ପିଛା ଅନୁମାନିତ ଅନ୍ତର୍ନିହିତ ସବସିଡି ପ୍ରାୟ ₹୨୧୦ ଥିବା ସରକାର କହିଛି।