ଅନୁଗୁଳ ଜିଲ୍ଲା ପାଲଲହଡ଼ା ଉପଖଣ୍ଡ ଅନ୍ତର୍ଗତ ଖୁଲୁଡ଼ି ଝରଣା ଏହାର ପ୍ରାକୃତିକ ସୌନ୍ଦର୍ଯ୍ୟ, ପାହାଡ଼ ଓ ଘନ ଜଙ୍ଗଲ ପରିବେଶ ପାଇଁ ଦୀର୍ଘଦିନ ଧରି ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ପାଲଟିଛି। ନିକଟସ୍ଥ ବାବା ଗିରିଶ୍ୱର ମନ୍ଦିରକୁ ଆସୁଥିବା ହଜାର ହଜାର ଭକ୍ତ ଓ ପର୍ଯ୍ୟଟକ ପ୍ରତିଦିନ ଏହି ସ୍ଥାନ ପରିଦର୍ଶନ କରୁଛନ୍ତି।

କିନ୍ତୁ ବଢ଼ୁଥିବା ପର୍ଯ୍ୟଟକ ସଂଖ୍ୟା ସହିତ ବଢ଼ିଛି ଅଳିଆ ଆବର୍ଜନା ସମସ୍ୟା। ଝରଣା ପରିସର ଓ ମନ୍ଦିର ଚତୁଃପାର୍ଶ୍ୱରେ ପ୍ଲାଷ୍ଟିକ, ଖାଦ୍ୟ ପ୍ୟାକେଟ୍ ଓ ଅନ୍ୟାନ୍ୟ ବର୍ଜ୍ୟବସ୍ତୁ ଗଦା ହୋଇ ରହିଥିବାରୁ ଅଞ୍ଚଳର ପରିବେଶ ପ୍ରଦୂଷିତ ହେଉଛି। ଏଥିରୁ ଦୁର୍ଗନ୍ଧ ସୃଷ୍ଟି ହେବା ସହ ପ୍ରାକୃତିକ ସୌନ୍ଦର୍ଯ୍ୟ ନଷ୍ଟ ହେଉଥିବା ଅଭିଯୋଗ ହେଉଛି।

ଖୁଲୁଡ଼ି ଝରଣା ପାଲଲହଡ଼ା ଉପଖଣ୍ଡରୁ ପ୍ରାୟ ୧୯ କିଲୋମିଟର ଦୂରରେ ଝରାବଡ଼ା ପଞ୍ଚାୟତ ଅଧୀନରେ ଅବସ୍ଥିତ। ଏହା ଓଡ଼ିଶା ପର୍ଯ୍ୟଟନ ତାଲିକାରେ ସ୍ଥାନ ପାଇଥିଲେ ମଧ୍ୟ ପୂର୍ଣ୍ଣାଙ୍ଗ ପର୍ଯ୍ୟଟନସ୍ଥଳୀ ମାନ୍ୟତା ନ ପାଇଥିବାରୁ ଆବଶ୍ୟକ ଭିତ୍ତିଭୂମି ଓ ରକ୍ଷଣାବେକ୍ଷଣ ବ୍ୟବସ୍ଥାର ଅଭାବ ରହିଛି।

ସ୍ଥାନୀୟ ଲୋକଙ୍କ କହିବା ଅନୁସାରେ, ଦେବସ୍ଥାନ ବିଭାଗ ପକ୍ଷରୁ ପିକନିକ୍ ଶେଡ୍ ଓ ଶୌଚାଳୟ ଭଳି କିଛି ମୌଳିକ ସୁବିଧା କରାଯାଇଥିଲେ ମଧ୍ୟ ନିୟମିତ ସଫେଇ କାର୍ଯ୍ୟ ହେଉନାହିଁ। ଫଳରେ ପରିସର ଦିନକୁ ଦିନ ଅପରିଷ୍କାର ହେବାରେ ଲାଗିଛି।

ପର୍ଯ୍ୟଟକ ପ୍ରଦୀପ କୁମାର ସାହୁ କହିଛନ୍ତି, ଏହା ଏକ ପବିତ୍ର ଧାର୍ମିକ ସ୍ଥାନ ହୋଇଥିବାରୁ ଏଠାରେ ସ୍ୱଚ୍ଛତା ଓ ପରିଚ୍ଛନ୍ନତା ଉପରେ ବିଶେଷ ଗୁରୁତ୍ୱ ଦିଆଯିବା ଉଚିତ। କିନ୍ତୁ ପ୍ରଶାସନ ପକ୍ଷରୁ ପର୍ଯ୍ୟାପ୍ତ ଧ୍ୟାନ ଦିଆଯାଉନାହିଁ।

ସ୍ଥାନୀୟ ବାସିନ୍ଦା କାଳନ୍ଦୀ ଚରଣ ବରିକ କହିଛନ୍ତି ଯେ, ବର୍ଷ ବର୍ଷ ଧରି ଭକ୍ତମାନେ ଏଠାକୁ ଆସୁଥିଲେ ମଧ୍ୟ ଆବର୍ଜନା ପରିଚାଳନା ପାଇଁ କୌଣସି ସ୍ଥାୟୀ ବ୍ୟବସ୍ଥା ହୋଇନାହିଁ। ମନ୍ଦିର ପରିସରରେ ମଧ୍ୟ ଅଳିଆ ଗଦା ହୋଇ ରହୁଥିବାରୁ ଭକ୍ତମାନେ ଅସୁବିଧାର ସମ୍ମୁଖୀନ ହେଉଛନ୍ତି।

ଅନ୍ୟପକ୍ଷରେ ପାଲଲହଡ଼ା ଉପଜିଲ୍ଲାପାଳ ଓ ଦେବସ୍ଥାନ ବିଭାଗ ଅଧିକାରୀ ରବୀନ୍ଦ୍ର କୁମାର ପଟେଲ କହିଛନ୍ତି ଯେ, ସ୍ଥାନରେ ପରିଚ୍ଛନ୍ନତା ରକ୍ଷା ପାଇଁ ପଦକ୍ଷେପ ନିଆଯାଉଛି। ଖୁଲୁଡ଼ିକୁ ପୂର୍ଣ୍ଣାଙ୍ଗ ପର୍ଯ୍ୟଟନସ୍ଥଳୀ ଭାବେ ବିକଶିତ କରିବା ପାଇଁ ସରକାରୀ ସ୍ତରରେ ପ୍ରୟାସ ଚାଲିଛି ଏବଂ ପର୍ଯ୍ୟଟକଙ୍କ ମଧ୍ୟରେ ସଚେତନତା ଅଭିଯାନ ମଧ୍ୟ କରାଯିବ।