ପୁଣେର ଚର୍ଚ୍ଚିତ ବ୍ୟବସାୟୀ କେତନ ଅଗ୍ରୱାଲ ହତ୍ୟା ମାମଲାରେ ରବିବାର ପୁଲିସ ତଦନ୍ତର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି। ମୁଖ୍ୟ ଅଭିଯୁକ୍ତ ତଥା କେତନଙ୍କ ସହ ନିର୍ବନ୍ଧ ହୋଇଥିବା ସିୟା ଗୋୟଲଙ୍କୁ ଲୋହଗଡ଼ ଦୁର୍ଗକୁ ନେଇ କ୍ରାଇମ୍ ସିନ୍ ରିକ୍ରିଏସନ୍ କରାଯାଇଛି।

ଗତ ଜୁନ୍ ୧୮ ତାରିଖରେ ଘଟିଥିବା ଏହି ହତ୍ୟାକାଣ୍ଡର ପ୍ରକୃତ ରହସ୍ୟ ଉଦ୍ଘାଟନ ପାଇଁ ପୁଣେ ଗ୍ରାମୀଣ ପୁଲିସ ସୁପରିଣ୍ଟେଣ୍ଡେଣ୍ଟ ସନ୍ଦୀପ ସିଂହ ଗିଲଙ୍କ ନିର୍ଦ୍ଦେଶରେ ଏକ ସ୍ୱତନ୍ତ୍ର ଟିମ୍ ଘଟଣାସ୍ଥଳରେ ପହଞ୍ଚିଥିଲା। ତଦନ୍ତକାରୀ ଦଳ ଅଭିଯୁକ୍ତମାନେ କେଉଁ ରାସ୍ତା ଦେଇ ଆସିଥିଲେ, ଘଟଣା ସମୟରେ ସେମାନଙ୍କର ଅବସ୍ଥାନ କେଉଁଠି ଥିଲା ଏବଂ କିପରି କେତନଙ୍କୁ ପାହାଡ଼ରୁ ତଳକୁ ଠେଲି ଦିଆଯାଇଥିଲା, ସେସବୁ ଦିଗରେ ତଦନ୍ତ କରିଛି।

ପୁଲିସ ସୂଚନା ଅନୁଯାୟୀ, ସିୟା ଗୋୟଲ ଘଟଣା ଦିନର ସମ୍ପୂର୍ଣ୍ଣ ରୁଟ୍ ଓ ଘଟଣାକ୍ରମ ବିଷୟରେ ତଦନ୍ତକାରୀଙ୍କ ସମ୍ମୁଖରେ ବିସ୍ତୃତ ତଥ୍ୟ ଦେଇଛନ୍ତି।

ଡେପୁଟି ସୁପରିଣ୍ଟେଣ୍ଡେଣ୍ଟ ଗଜାନନ ତୋମ୍ପେଙ୍କ କହିବା ଅନୁଯାୟୀ, କ୍ରାଇମ୍ ସିନ୍ ରିକ୍ରିଏସନ୍କୁ ଅଧିକ ବିଶ୍ୱସନୀୟ କରିବା ପାଇଁ କେତନଙ୍କ ଓଜନ ସମାନ ଏକ ମାନବ ସଦୃଶ ଡମି ବ୍ୟବହାର କରାଯାଇଥିଲା। ଅଭିଯୁକ୍ତମାନଙ୍କ ବୟାନ ସହ ଘଟଣାସ୍ଥଳର ପରିସ୍ଥିତିର ମେଳ ଯାଞ୍ଚ କରିବା ଏହାର ଉଦ୍ଦେଶ୍ୟ ଥିଲା।

ସୂଚନାଯୋଗ୍ୟ ଯେ, ୨୫ ବର୍ଷୀୟ କେତନ ଅଗ୍ରୱାଲ ମହାରାଷ୍ଟ୍ରର ପ୍ରମୁଖ ୱେୟାରହାଉସିଂ ଡେଭଲପର ସଂସ୍ଥା ‘ସକ୍ସେସ୍ ଗ୍ରୁପ୍’ର ନିର୍ଦ୍ଦେଶକ ଥିଲେ। ଚଳିତ ବର୍ଷ ଫେବୃଆରୀରେ ତାଙ୍କର ସିୟା ଗୋୟଲଙ୍କ ସହ ନିର୍ବନ୍ଧ ହୋଇଥିଲା ଏବଂ ନଭେମ୍ବରରେ ବିବାହ ପାଇଁ ପ୍ରସ୍ତୁତି ଚାଲିଥିଲା।

ତଦନ୍ତରୁ ଜଣାପଡ଼ିଛି ଯେ, ସିୟା ପୂର୍ବରୁ ଚେତନ ଚୌଧୁରୀ ନାମକ ଜଣେ ଯୁବକଙ୍କ ସହ ସମ୍ପର୍କରେ ଥିଲେ। ପୁଲିସ ଆଗରେ ସେ ସ୍ୱୀକାର କରିଛନ୍ତି ଯେ, କେତନଙ୍କୁ ବିବାହ କରିବାକୁ ସେ ଇଚ୍ଛୁକ ନଥିଲେ। ପରିବାରର ସମ୍ମାନ ରକ୍ଷା ପାଇଁ ବିବାହ ଭାଙ୍ଗିବା ପରିବର୍ତ୍ତେ ପ୍ରେମିକ ଚେତନଙ୍କ ସହ ମିଶି କେତନଙ୍କୁ ହତ୍ୟା କରିବାର ଷଡ଼ଯନ୍ତ୍ର ରଚିଥିବା ଅଭିଯୋଗ ରହିଛି।

ବର୍ତ୍ତମାନ ପୁଲିସ ଉଭୟ ଅଭିଯୁକ୍ତଙ୍କୁ ଗିରଫ କରି ସେମାନଙ୍କର ଡିଜିଟାଲ ପ୍ରମାଣ, ଫୋନ୍ ରେକର୍ଡ ଓ ଗତିବିଧିର ଗଭୀର ତଦନ୍ତ ଜାରି ରଖିଛି।