କେରଳର ନୂଆ ରାଜ୍ୟପାଳ ଭାବେ ଓମ୍ ପ୍ରକାଶ ମାଥୁର ଦାୟିତ୍ୱ ଗ୍ରହଣ କରିବା ପରେ ଲୋକ ଭବନର ରୋଷେଇ ବ୍ୟବସ୍ଥାକୁ ନେଇ ରାଜନୈତିକ ଚର୍ଚ୍ଚା ଆରମ୍ଭ ହୋଇଛି। ମାଥୁର ନିଜେ କଠୋର ନିରାମିଷାହାରୀ ହୋଇଥିବାରୁ ତାଙ୍କ ଖାଦ୍ୟ ପ୍ରସ୍ତୁତ ହେଉଥିବା ଲୋକ ଭବନ ରୋଷେଇ ଘରରେ ମାଛ କିମ୍ବା ମାଂସ ରାନ୍ଧା ନଯିବାକୁ ନିର୍ଦ୍ଦେଶ ଦିଆଯାଇଥିବା ରାଜଭବନ ସୂତ୍ରରୁ ଜଣାପଡ଼ିଛି।

ରାଜଭବନ ପକ୍ଷରୁ ସ୍ପଷ୍ଟ କରାଯାଇଛି ଯେ, ରୋଷେଇ ଘରର ଖାଦ୍ୟ ମୁଖ୍ୟତଃ ରାଜ୍ୟପାଳ ଓ ତାଙ୍କ କିଛି ବ୍ୟକ୍ତିଗତ କର୍ମଚାରୀଙ୍କୁ ପରିବେଷଣ କରାଯାଏ। ଅନ୍ୟ କର୍ମଚାରୀମାନେ ଘରୁ ଖାଦ୍ୟ ଆଣିପାରିବେ କିମ୍ବା ବାହାରେ ଖାଇପାରିବେ। ସେମାନଙ୍କ ଖାଦ୍ୟ ପସନ୍ଦ ଉପରେ କୌଣସି ନିଷେଧ ଲାଗୁ ହୋଇନାହିଁ।

ଏହି ନିର୍ଦ୍ଦେଶକୁ ନେଇ କଂଗ୍ରେସ ନେତା ତଥା ସାଂସଦ କେ.ସି. ବେଣୁଗୋପାଳ ତୀବ୍ର ପ୍ରତିକ୍ରିୟା ଦେଇଛନ୍ତି। କେରଳର ଖାଦ୍ୟ ସଂସ୍କୃତିରେ ନିରାମିଷ ଓ ଆମିଷ—ଦୁଇ ପ୍ରକାର ଖାଦ୍ୟର ପରମ୍ପରା ରହିଥିବା ଦର୍ଶାଇ ସେ କହିଛନ୍ତି ଯେ ଲୋକଙ୍କ ଖାଦ୍ୟ ପସନ୍ଦରେ ହସ୍ତକ୍ଷେପ କରାଯିବା ଉଚିତ ନୁହେଁ।

ବେଣୁଗୋପାଳଙ୍କ ଅଭିଯୋଗ ହେଉଛି, ରାଜ୍ୟପାଳ ନିଜ ପାଇଁ ନିରାମିଷ ଖାଦ୍ୟ ବାଛିବାକୁ ସ୍ୱାଧୀନ ହେଲେ ମଧ୍ୟ, ତାଙ୍କ ବ୍ୟକ୍ତିଗତ ଖାଦ୍ୟ ପସନ୍ଦକୁ ଅନ୍ୟମାନଙ୍କ ଉପରେ ଲାଗୁ କରିବା ଉଚିତ ନୁହେଁ। ଏହାକୁ ସେ ବ୍ୟକ୍ତିଗତ ସ୍ୱାଧୀନତା ଓ କେରଳର ବିବିଧ ଖାଦ୍ୟ ସଂସ୍କୃତି ସହ ଯୋଡ଼ିଛନ୍ତି।

ଓମ୍ ପ୍ରକାଶ ମାଥୁର ଅକ୍ଟୋବର ୨୩ରେ କେରଳର ୨୯ତମ ରାଜ୍ୟପାଳ ଭାବେ ଶପଥ ନେଇଛନ୍ତି। ସେ ପୂର୍ବରୁ ସିକ୍କିମର ରାଜ୍ୟପାଳ ଥିଲେ। ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କ ସ୍ଥାନରେ ମାଥୁର କେରଳର ରାଜ୍ୟପାଳ ହୋଇଛନ୍ତି।