କୋରାପୁଟ ଜିଲ୍ଲାର ଜୟପୁର ସହରରେ ଚାଲୁଥିବା ଏକ ବେଆଇନ ନିଶା ଇଞ୍ଜେକ୍ସନ କାରବାରକୁ ପୋଲିସ ଠାବ କରି ବଡ଼ ସଫଳତା ହାସଲ କରିଛି। ରବିବାର ଏହି ଅଭିଯାନରେ ୫ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ବେଳେ ବହୁ ପରିମାଣର ସନ୍ଦିଗ୍ଧ ନିଶା ଇଞ୍ଜେକ୍ସନ, ନଗଦ ଟଙ୍କା ଓ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି।
ପୋଲିସକୁ ମିଳିଥିବା ନିର୍ଦ୍ଦିଷ୍ଟ ଗୁଇନ୍ଦା ସୂଚନା ଆଧାରରେ ଏହି ଚଢ଼ାଉ କରାଯାଇଥିଲା। ସୂଚନା ମିଳିବା ପରେ ପୋଲିସ ଏକ ଗାଡ଼ିକୁ ଅଟକାଇ ତଲାସି କରିଥିଲା। ତଲାସି ସମୟରେ ବେଆଇନ ଭାବେ ନିଶା ଇଞ୍ଜେକ୍ସନ ବିକ୍ରି କରାଯାଉଥିବା ଅଭିଯୋଗ ସାମ୍ନାକୁ ଆସିଥିଲା।
ଅଭିଯାନ ସମୟରେ ପୋଲିସ ୧୫ଟି ପ୍ୟାକେଟରେ ରହିଥିବା ମୋଟ ୭୫୦ଟି ନମୁନା ଜବତ କରିଥିଲା। ସେହିପରି ୧୫ ହଜାର ଟଙ୍କା ନଗଦ, ୫ଟି ମୋବାଇଲ ଫୋନ ଏବଂ ଏକ କାର ମଧ୍ୟ ଜବତ କରାଯାଇଛି।
ଗିରଫ ଅଭିଯୁକ୍ତମାନେ ହେଲେ ଦେବାଶିଷ ପଟ୍ଟନାୟକ, ତପସ ସାହୁ, ରାମ ହରିଜନ, ପ୍ରଦୀପ୍ତ ଖରା ଏବଂ ସୂରଜ କୁମାର ଗୁପ୍ତା। ସମସ୍ତେ ଜୟପୁର ସହରର ବାସିନ୍ଦା ବୋଲି ପୋଲିସ ସୂଚନା ଦେଇଛି।
ପୋଲିସର କହିବା ଅନୁଯାୟୀ, ଜୟପୁରର କେନାଲ ରୋଡ଼ ନିକଟରେ କୌଣସି ବୈଧ ଲାଇସେନ୍ସ ବିନା ଏହି ନିଶା ଇଞ୍ଜେକ୍ସନ କାରବାର ଚାଲିଥିଲା।
ଜୟପୁର ଏସ୍ଡିପିଓ ଅର୍ଚ୍ଚିତା ମିତ୍ତଲ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଗୁଇନ୍ଦା ସୂଚନା ଆଧାରରେ ଏକ ଗାଡ଼ିକୁ ଅଟକାଇ ତଲାସି କରାଯାଇଥିଲା। ଗାଡ଼ିରେ ୬ ଜଣ ଥିବା ବେଳେ ୫ ଜଣଙ୍କୁ ଗିରଫ କରାଯାଇଛି। ଏକ୍ସିକ୍ୟୁଟିଭ୍ ମାଜିଷ୍ଟ୍ରେଟ ଓ ସରକାରୀ ସାକ୍ଷୀଙ୍କ ଉପସ୍ଥିତିରେ ତଲାସି ସମୟରେ ୬୫୦ଟି ପେଣ୍ଟାଜୋସିନ୍ ଇଞ୍ଜେକ୍ସନ ଓ ନଗଦ ୧୫ ହଜାର ଟଙ୍କା ଜବତ ହୋଇଥିଲା। ଜବତ ସାମଗ୍ରୀ ସମ୍ପର୍କିତ କୌଣସି ବୈଧ ଲାଇସେନ୍ସ କିମ୍ବା ଦଲିଲ ଅଭିଯୁକ୍ତମାନେ ଦେଖାଇପାରି ନଥିଲେ।
ଏହାପରେ ଅଭିଯୁକ୍ତମାନଙ୍କ ବିରୋଧରେ ନାର୍କୋଟିକ ଡ୍ରଗ୍ସ ଆଣ୍ଡ ସାଇକୋଟ୍ରୋପିକ ସବସ୍ଟାନ୍ସେସ୍ (NDPS) ଆଇନ ଏବଂ ଡ୍ରଗ୍ସ ଆଣ୍ଡ କସମେଟିକ୍ସ ଆଇନ ଅନୁଯାୟୀ ମାମଲା ରୁଜୁ କରାଯାଇଛି।
ପୋଲିସ ଅଧିକାରୀମାନେ ସୂଚନା ଦେଇଛନ୍ତି ଯେ, ଗିରଫ ଅଭିଯୁକ୍ତ ରାମ ହରିଜନ ଓ ସୂରଜ କୁମାର ଗୁପ୍ତାଙ୍କ ନାମରେ ପୂର୍ବରୁ ମଧ୍ୟ ନିଶାଦ୍ରବ୍ୟ କାରବାର ସମ୍ପର୍କିତ ମାମଲା ରହିଛି।
ଜବତ ହୋଇଥିବା ଇଞ୍ଜେକ୍ସନଗୁଡ଼ିକ କେଉଁଠାରୁ ଆସିଥିଲା ଏବଂ ଏହି କାରବାର ପଛରେ ଆଉ କେହି ସମ୍ପୃକ୍ତ ଅଛନ୍ତି କି ନାହିଁ, ସେନେଇ ପୋଲିସ ତଦନ୍ତ ଜାରି ରଖିଛି।
ରୁଷିଆର ସାରାତୋଭ ଅଞ୍ଚଳର ଏଙ୍ଗେଲ୍ସ ସହରରେ ଜଣେ ସେନା ଅଧିକ...
ହର୍ମୁଜ୍ ପ୍ରଣାଳୀରେ ନୌଚଳାଚଳର ସ୍ୱାଧୀନତାକୁ ସମର୍ଥନ କରିବ...
ଇରାନର ଦକ୍ଷିଣ ଅଞ୍ଚଳର କୁହେସ୍ତାକ ସହରରେ ମଙ୍ଗଳବାର ଏକ ବି...
କେରଳର କୋଚିରେ ଜଣେ କଲେଜ ଛାତ୍ରଙ୍କ ବିରୋଧରେ ଶିକ୍ଷକ ଓ ସହ...
ୟୁକ୍ରେନକୁ ସାମରିକ ସହାୟତା ଦେବା ପାଇଁ ଗୋଳାବାରୁଦ କିଣିବା...
ଦିଲ୍ଲୀରେ ବଢୁଥିବା ସାଇବର ଅପରାଧ ଓ ଟେକ୍ନୋଲୋଜି ଆଧାରିତ ଧ...
ମଙ୍ଗଳବାର ସନ୍ଧ୍ୟାରେ ମୁମ୍ବାଇ-ଅହମଦାବାଦବନ୍ଦେ ଭାରତ ଏକ୍ସ...
ଆଗ୍ରାରେ ତାମିଲନାଡୁ ଏକ୍ସପ୍ରେସ୍ର ଏକ ଅନରିଜର୍ଭ୍ଡ କୋଚ୍ରୁ...
