ଆଗ୍ରାରେ ତାମିଲନାଡୁ ଏକ୍ସପ୍ରେସ୍ର ଏକ ଅନରିଜର୍ଭ୍ଡ କୋଚ୍ରୁ ଲାଲ୍ ସୁଟକେସ୍ ଭିତରେ ମିଳିଥିବା ମହିଳାଙ୍କ ଖଣ୍ଡବିଖଣ୍ଡ ମୃତଦେହ ମାମଲାରେ ପୋଲିସକୁ ବଡ଼ ସଫଳତା ମିଳିଛି। ଘଟଣାର ୨୪ ଦିନ ପରେ ମଣିପୁରର ଜିରିବାମ୍ ଜିଲ୍ଲାରୁ ଜଣେ ଦମ୍ପତିଙ୍କୁ ଗିରଫ କରାଯାଇଛି।

ଗିରଫ ଦୁଇଜଣ ହେଲେ ଆସାମର କାଛାର ଜିଲ୍ଲାର ୨୨ ବର୍ଷୀୟ ମାଣିକ ଉଦ୍ଦିନ ଲସ୍କର ଏବଂ ଓଡ଼ିଶାର କେନ୍ଦୁଝର ଜିଲ୍ଲାର ୨୧ ବର୍ଷୀୟ ଭଗବତୀ ମାଝୀ। ମଣିପୁର ଓ ତାମିଲନାଡୁ ପୋଲିସର ମିଳିତ ଟିମ୍ ଶନିବାର ଜିରିବାମ୍ର କାଶିମପୁର ଅଞ୍ଚଳରୁ ସେମାନଙ୍କୁ ଧରିଥିଲା।

ଅଗଷ୍ଟ ୫ ତାରିଖରେ ତାମିଲନାଡୁ ଏକ୍ସପ୍ରେସ୍ ଆଗ୍ରା କ୍ୟାଣ୍ଟ ଷ୍ଟେସନ୍ରେ ପହଞ୍ଚିବା ପରେ ଜଣେ ଅନରିଜର୍ଭ୍ଡ କୋଚ୍ରେ ଛାଡ଼ି ଦିଆଯାଇଥିବା ଲାଲ୍ ସୁଟକେସ୍ରୁ ଦୁର୍ଗନ୍ଧ ଆସିଥିଲା। ଏହାପରେ ସରକାରୀ ରେଲୱେ ପୋଲିସ ସୁଟକେସ୍ ଯାଞ୍ଚ କରିବାରୁ ଭିତରୁ ଜଣେ ମହିଳାଙ୍କ ମୁଣ୍ଡବିହୀନ ଖଣ୍ଡବିଖଣ୍ଡ ମୃତଦେହ ମିଳିଥିଲା।

ଫୋରେନସିକ୍ ଯାଞ୍ଚ ପରେ ମୃତକଙ୍କ ପରିଚୟ ୩୮ ବର୍ଷୀୟ ହାୟାଥୁନ୍ ନିଶା ଭାବେ ହୋଇଥିଲା। ସେ ଓଡ଼ିଶାର ମୂଳ ବାସିନ୍ଦା ଥିବାବେଳେ ଚେନ୍ନାଇ ନିକଟ ଗୁଡୁଭାଞ୍ଚେରୀରେ ରହୁଥିଲେ ଏବଂ ଏକ ଘରୋଇ ସଂସ୍ଥାରେ କାମ କରୁଥିଲେ।

ତଦନ୍ତ ସମୟରେ ଚେନ୍ନାଇ ସେଣ୍ଟ୍ରାଲ୍ ରେଳ ଷ୍ଟେସନ୍ର ଘଣ୍ଟା ଘଣ୍ଟାର CCTV ଫୁଟେଜ୍ ଯାଞ୍ଚ କରିଥିଲା ପୋଲିସ। ଏଥିରେ ମାଣିକ ଉଦ୍ଦିନ ଲସ୍କରଙ୍କୁ ଭାରୀ ଲାଲ୍ ସୁଟକେସ୍ ନେଇ ଯାଉଥିବା ଏବଂ ତାଙ୍କ ପତ୍ନୀ ଭଗବତୀ ମାଝୀ ତାଙ୍କ ସହ ଥିବା ଦେଖାଯାଇଥିଲା।

ଏହାପରେ ପୋଲିସ ସେମାନଙ୍କ ଗତିବିଧି ଅନୁସରଣ କରି ଚେନ୍ନାଇର ଗୁଡୁଭାଞ୍ଚେରୀସ୍ଥିତ ଏକ ଭଡ଼ା ଘର ପର୍ଯ୍ୟନ୍ତ ପହଞ୍ଚିଥିଲା। ଘରେ ତଲାସୀ ବେଳେ ଏକ ବଡ଼ ରୋଷେଇ ପାତ୍ର ଭିତରୁ ମୃତଦେହର ଅନ୍ୟାନ୍ୟ ଅଂଶ ମିଳିଥିଲା।

ପ୍ରଥମେ ଗୁଡୁଭାଞ୍ଚେରୀ ଥାନାରେ ଏହି ଘଟଣାକୁ ନିଖୋଜ ମାମଲା ଭାବେ ରୁଜୁ କରାଯାଇଥିଲା। ମୃତଦେହର ଅଂଶ ମିଳିବା ପରେ ମାମଲାକୁ ହତ୍ୟା ମାମଲାରେ ପରିବର୍ତ୍ତନ କରାଯାଇଥିଲା।

ପୋଲିସ ମାଣିକ ଓ ଭଗବତୀଙ୍କୁ ମୁଖ୍ୟ ସନ୍ଦିଗ୍ଧ ଭାବେ ଚିହ୍ନଟ କରିବା ପରେ ସେମାନେ ଫେରାର ହୋଇଯାଇଥିଲେ। ଏହାପରେ ଦେଶବ୍ୟାପୀ ଭାବେ ସେମାନଙ୍କୁ ଖୋଜାଯାଉଥିଲା। ଶେଷରେ ମଣିପୁରରେ ସେମାନଙ୍କ ସନ୍ଧାନ ମିଳିବା ପରେ ଗିରଫ କରାଯାଇଛି।

ଗିରଫ ଦମ୍ପତିଙ୍କୁ ପ୍ରଥମେ ମଣିପୁରର ସ୍ଥାନୀୟ ମାଜିଷ୍ଟ୍ରେଟ୍ଙ୍କ ନିକଟରେ ହାଜର କରାଯିବ। ପରେ ଟ୍ରାନ୍ଜିଟ୍ ୱାରେଣ୍ଟ ଜରିଆରେ ସେମାନଙ୍କୁ ତାମିଲନାଡୁ ନିଆଯିବ। ଜେରା ପରେ ଏହି ନିର୍ମମ ହତ୍ୟା ପଛର ପ୍ରକୃତ କାରଣ ଜଣାପଡ଼ିବ ବୋଲି ପୋଲିସ ସୂଚନା ଦେଇଛି।